ဗြဝတဳ၊ ဂျောန် ၂၄
အပ္ဍဲတွဵုရးကရေၚ် ပွိုၚ်ဍုၚ်ဗြဝတဳ ဒေသမေန်လက်ပါန်ကဵုဖလူတံ ဟိုတ်နူပေါဲဗတိုက်ထပ်က္တဵုဒှ် မကမ်လွဟ်ဒတုံလုပ်စိုပ်အာ အပ္ဍဲဍုၚ်သေံဂှ်ရ ဒပ်ပၞာန်သေံတံပလေဝ်စပရေၚ်ဂီုကၠီုတုဲ သီုဒးကၟာတ်လဝ်ဘာဗတောန်လိက် လ္ၚဵုတံဂှ်ရောၚ် ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲဂိတုဂျောန် ၂၂ ဂှ် အကြာကရောၚ်ပၞာန်ဒပ်သီအဝဵုတံကဵု ဂကောံဇြဟတ်ပၠန်ဂတး KNLA မဟာဒပ် ၆ တံ ဒှ်လဝ်ပေါဲဗတိုက် လပါ်သၠုၚ်ကျာဍုၚ်ဗြဝတဳ ပယျဵုဗၟာ-သေံ ပွဳဗွိုၚ်ဒေသမေန်လက်ပါန် ကဵုဖလူတံဂှ်တုဲ မကမ်လွဟ်လ္ၚဵု ဒတုံစိုပ်အာလဝ် အပ္ဍဲကွာန်မေန်ကိုကေၚ် ဍုၚ်သေံတုဲ ဌာန်စမြိုၚ်ဒၞာဲလ္ၚဵုတံ ဒးလဝ်မကမ်နွံရ။
ဟိုတ်နူ အကာဲအရာပေါဲဗတိုက်က္တဵုဒှ်မံၚ် အပ္ဍဲကဵုပွိုၚ်ဍုၚ်ဗြဝတဳကီု ဒပ်ပၞာန်ဗမာကၠုၚ်ဗပေၚ်လဝ်ဇြဟတ်ကြပ် ၂၀၀ နွံတုဲ ညးတာလျိုၚ်သေံတံ ဒးကၟာတ်ထောံဘာဗတောန်လိက် ကွာန်မေန်ကိုကေၚ်တုဲ ဘာဗတောန်လိက် ကွးဘာ ရဲပါဲဘဲပၞာန်ကောန်ဍုၚ်ဗၟာလ္ၚဵုတံဂှ်လေဝ် ဒးကၟာတ်လဝ်ကီုရောၚ် ရဲပါဲဘဲပၞာန် နူကွာန်ဖလူမွဲတၠ သ္ဂးရ။
သွက်သ္ဂောံသီကေတ် ဒေသမေန်လက်ပါန် ကဵု ဖလူ ဗ္ဒာဲဍုၚ်တၟိ လေဝ်ကေကဝ် ပွိုၚ်ဍုၚ်ဗြဝတဳဂှ် ကရောၚ်ပၞာန်ဒပ်ပၞာန်ဗၟာ ၝောံဒပ် ၂၂ က္ဍိုက်ပ်တုဲ စနူဂိတုအံက်တဝ်ဗါတုဲကၠုၚ်တေံ ထပက်ကၠုၚ်လဝ် ပၞာန်ကီုလေဝ် ပရေၚ်ဒးဝပ်ချိုတ်လဝ်နွံမံၚ်ဗွဲမဂၠိုၚ်တုဲ စဵုကဵုစိုပ်ဂိတုဂျောန်သၞာံဏံဂှ် သီကေတ်ဟွံမာန်ဏီပုဟ်။
ဟိုတ်ဂှ်ရ နူကဵုဒပ်ပၞာန် အာတ်အရီုဗၚ်ပရေၚ်ပၞာန် ကုဒပ်မၚ်ပယျဵု ကရေၚ် BGF ကေုာံ ဂကောံ DKBA ဗိုလ်ဗိတံတုဲ သွက်သ္ဂောံပလံၚ်ဗစိုပ်ဏာဒပ်ရီုဗၚ် ကုဗ္ဒိုပ်ဗျူဟာပၞာန် ဝဝ်လေဂှ်ကီု သွက်သ္ဂောံ ကလေၚ်သီကေတ် ကွာန်မေန်လက်ပါန်ကဵုကွာန်ဖလူတံမာန်ဂှ် ဂစာန်ရေၚ်တၠုၚ် ဖန်ဖက်ကၠုၚ်မံၚ်ရ။
ဒပ်မၚ်ပယျဵုကရေၚ် BGF ကေုာံ ဂကောံဒပ် DKBA ဗိုလ်ဗိက္ဍိုက်ပ် တံဂှ် ပ္ဍဲကဵုပရေၚ်လဝေၚ်ပၞာန် ဂၠံၚ်ဖာပန်-ကၟမံၚ် ဒေသမဟာဒပ် ၅ ခရိုၚ်ဖာပန် KNU ဂှ် ပြဟ်ဟ်ဏံ ပါလုပ်ရီုဗၚ်မံၚ်ကဵု ဒပ်ပၞာန်ဗမာဂှ်ကီု ပ္ဍဲပရေၚ်လဝေၚ်ပၞာန် ကအ်ကြိက်-ကြုၚ်ဒဵု ကေုာံ လဝေၚ်ပၞာန်ဂၠံၚ်အာယှတံဂှ်လေဝ် ကဵုလဝ်ရီုဗၚ်ပရေၚ်ပၞာန်တံ နွံကၠုၚ်လဝ်ရောၚ်။
အပ္ဍဲကိုန်အစဳဇန်ပွိုၚ် ၁၀၀ တ္ၚဲ အလဵုအသဳပၞာန်သီအဝဵုဏံ သၠုၚ်ပတိုန်အသိၚ်ထပက်ပၞာန် အပ္ဍဲတွဵုရးကရေၚ်တုဲ လတူကွာန် နွံမံၚ်သၟဝ်တဲပရေၚ်အုပ်ဓုပ် KNU တံမ္ဂး ပန်စုတ်လွဟ်ဇၞော်ကီု ကြဳဗုမ်နူၜၚ်ကျာကီု၊ ပရေၚ်ကြဳဗုမ်နကဵုဒရုၚ်တံ ကၠောန်မံၚ်အဆက်က်ရဂှ် ဂွံတီရ။
ပရိုၚ် – သြင်လောန်တိုၚ်မ်
Photo – Social Media