ၜင်ကံက်၊ ဂျောန် ၂၄
သွက်သ္ဂောံၜက်အာ နူဍုၚ်သြန်လုပ်အဆံၚ်လဒေါဝ်တုဲ အပ္ဍဲပွိုၚ် ၁၂ သၞာံဏံ ညံၚ်သ္ဂောံဒှ်အာ ဍုၚ်သြန်လုပ်ခိုဟ်အိုတ်ဂှ် အလဵုအသဳသေံ ဂစာန်လွဳပရာအာရောၚ် ဟီုလဴကၠုၚ်ရ။
ကမ္မတဳပရေၚ်သဳကၠဳပ္ညဳပ္ညပ် အကြာညးဍုၚ်ကွာန်ကဵု ပုဂ္ဂလိကတံ ကၠောန်ဗဒှ်လဝ် ပ္ဍဲဂျောန် ၂၂ တေံ အပ္ဍဲကောံဓရီုပထမအလန်ကၠာအိုတ်ဂှ် လလောၚ်တြးကၠုၚ်လဝ် တိုၚ်ပ္ကဴရန်တၟံဗီုဏံရောၚ်။
ပးဒၞက်က္တဵုဒှ်စလေပ်မံၚ် အကြာဍုၚ်သြန်လုပ်အဆံၚ်လဒေါဝ်တံဂှ် တတ်ၜက်အာမာန်ရောၚ် အလဵုအသဳၜင်ကံက် ဟီုရ။
အပ္ဍဲဍုၚ်သေံ သွက်ဂွံဒှ်အရာပရေၚ်ပြိုၚ်ပ္ကာန် ကိုပ်ကၠာဟွံစိုပ် သၞာံ ၂၀၃၀ ဂှ် ညံၚ်သ္ဂောံပါလုပ်အာ အပ္ဍဲစရၚ် ဍုၚ်အဆံၚ်သၠုၚ် ၂၀ ဂၠးကဝ်ဂှ်လေဝ် အလဵုအသဳသေံ ရန်တၟံလဝ်ရောၚ်။
ကြဴနူကောံဓရီုဏံတုဲ အလဵုအသဳ ကေုာံ ကဏ္ဍပုဂ္ဂလိကတံ ပံၚ်တောဲတုဲ သွက်ပရေၚ်ပိုန်ဒြပ် ဇြဟတ်ဂွံခိုဟ်အာ အခိၚ်ဍာ်ဇမၠိ၊ ဍာ်ဇမၠိၚ်၊ အခိၚ်လဒေါဝ်တံဂှ် ဒးချူခၞံအာ မူပၞောန်မွဲရောၚ် ဒုသ္ကိုပ်ဝန်ဇၞော်၊ ဝန်ဇၞော်ပရေၚ်ဘဏ္ဍာ အဳနက်သဳ နဳသဳသမ် ဖရာဖာတ်သ် ဟီုလဝ်ရ။
အလဵုအသဳ ကေုာံ ကဏ္ဍပုဂ္ဂလိကတံ ပံၚ်တောဲအာတုဲ သွက်သ္ဂောံတတ်ၜက်အာ ပးဒၞက်သြန်လုပ်လဒေါဝ်တံမာန်ဂှ် ဒှ်အရာကိစ္စဇၞော်အိုတ်ရောၚ် ဝန်ဇၞော်အဳနက်သဳ သ္ဂးရ။
အတိုင်ကိုန်အစဳဇန်အခိၚ်လဒေါဝ်မ္ဂး အလဵုအသဳသေံ သွက်သ္ဂောံသၠုၚ်ပတိုန်အာ ၚုဟ်မးပတိတ်ကပေါတ်အပ္ဍဲဍုၚ် (GDP) ကိုပ်ကၠာဟွံစိုပ် ၂၀၃၀ မာန်ဂှ် ဒးသၠုၚ်ပတိုန်အာ လတူ ၃ က္ဍိုပ်ကၠမ်ရောၚ်။
ပ္ဍဲကဵုအရာရေၚ်တၠုၚ်ပရေၚ်ကမၠောန်သာ်ဏံမ္ဂး ညံၚ်ရဴဂကောံတေအ်ဗဝ်မွဲဂကောံကီု ပရေၚ်ဆက်စၠောံ အကြာမုက်ဂတ၊ လဒေါဝ် ကေုာံ လက်ကရဴတံ ဇြဟတ်ခိုဟ်မှ အံၚ်ဇၞးရောၚ် မေတ်သတာအဳနက်သဳ ဟီုရ။
သွက်ကမၠောန်ပရေၚ်ပိုန်ဒြပ် အဇာဍောတ်တံ ဂွံညိၚ်ဝပ်၊ သွက်ရဲဓလိုက်တမ်ရိုဟ်တံ ဂလာန်ပတေဟ်ဂွံနွံဂၠိုၚ်တိုန်၊ သွက်သ္ဂောံဗပေၚ်အာ ဇြဟတ်စေဝ်ပၞောန်ပရေၚ်ဘဏ္ဍာ၊ သွက်သ္ဂောံစဵုဒၞာအာကဵု ပရေၚ်ဇီုပိုန်ဒြပ် နူတင်ယုက်ဒေက်ပဋိပက္ခဂၠးကဝ်တံဂှ်လေဝ် ဒးဖန်ဖက်အာရောၚ် ညးဟီုရ။
ၜိုန်ရဗွိုၚ်ဖျာဂၠးကဝ်တံ ဒှ်ကၠုၚ်လဝ်ပရေၚ်ဂရံက်ဂရိုက်ကီုလေဝ် အကြာ ၇-၈ ဂိတုလောန်ကၠုၚ်ဏံဂှ် ဟိုတ်နူဥပဒေစေဝ်ပၞောန်ပရေၚ်ဘဏ္ဍာဍုၚ်သေံတုဲ ပရေၚ်ပိုန်ဒြပ်တံ ညိၚ်ဝပ်ကၠုၚ်လဝ်ဂှ်လေဝ် ညးဟီုရ။
သွက်သ္ဂောံဂွံအာ ပရေၚ်ဓါတ်လလဳ ကေုာံ ရိုဟ်ကၞက်ဍာ်ဂွံရုံဂပ်၊ သွက်သၞောတ်ဇြဟတ်ဓါတ်သ္အးဇ္ၚးတံ သ္ဂောံဇြဟတ်ခိုဟ်၊ သွက်သၞောတ်ဒဳဂျေတ်တေလ် ကေုာံ ညာဏ်ပညာ AI တံဂွံနွံအာ၊ ပရေၚ်ပလေဝ်သၠာဲသၞောဝ်ဥပဒေ၊ ပရေၚ်တောတက်ဇြဟတ်မၞိဟ်တံဂှ် သ္ပအာသ္ဇိုၚ်မူအဓိက သွက်ပရေၚ်ပိုန်ဒြပ်တောတက်တုဲ ကဵုဖျုန်ဖန်ဖက်ရေၚ်တၠုၚ်အာရောၚ် မေတ်သတာအဳနက်သဳ ဟီုလဴလဝ်ရ။
Ref:Bangkokpost
