ၜဳကလေၚ်၊ ဂျောန် ၂၄
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ဒၞာဲကမၠောန်ယှိုဲမျှဝ် ၅ ဒၞာဲတံဂှ် ဒပ်ပၞာန်သီအဝဵု ကြဳလဝ်ဗုမ်ၜၚ်ကျာ ဇၞော်ကဵုဇြဟတ်နွံတုဲ ပရေၚ်ဒးဝပ်ချိုတ်အာလဝ် ဂၠိုၚ်မာန်ရောၚ် ညးတာလျိုၚ်ခရိုၚ်သဓီု KNU တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျောန် ၂၂ ဏံ စနူအခိၚ်နူဂယး ၁၁ နာဍဳ စဵုကဵုသဝ်တ္ၚဲ ၄ နာဍဳ အတိုၚ်လၟေၚ်ကြုၚ်ၜဳကလေၚ် မွဲဒမြိပ် ဒၞာဲကမၠောန်ယှိုဲမျှဝ် ၅ ဒၞာဲ အဟိန်ၜံက်ခါဲမံၚ်ထဝ်တံဂှ် ဒပ်ပၞာန်သီအဝဵု ကြဳလဝ်ဗုမ် နကဵုၜၚ်ကျာ ဂျက်ဖိုက်တာ ၁၂ အလန် မဒှ်ရ။
ကမၠောန်ယှိုဲမျှဝ် ဒးဒုၚ်ကြဳလဝ်ဗုမ်ၜၚ်ကျာတံဂှ် နွံမံၚ်ဗ္ဒာဲကွာန်ဗေၚ်ဗာန်၊ ဝေၚ်ကတိုက်၊ ညံၚ်တောဲလောဲ၊ ယှိုဲလံၚ်အေန် ကေုာံ ဗယျာတဝ်တံရောၚ် ဂွံတီကေတ်ရ။
အတိုင်တင်နၚ်ဂွံလဝ် ကိုပ်ကၠာအိုတ်ဂှ်မ္ဂး ဟိုတ်နူကမၠောန် ယှိုဲမျှဝ်တံဏံ ဒးဒုၚ်ကြဳဗုမ်တုဲ ရဲကမၠောန်ယှိုဲမျှဝ် ၁ တၠ ချိုတ်အာ၊ ၅ တၠပြၚ်ဂှ် ဒးလဝ်ဝပ်နွံတုဲ ဖံၚ်ထဝ်ဗွဲမဂၠိုၚ် လီုလာ်အာရ။
ကမၠောန်ယှိုဲမျှဝ်တံဏံ ဒးဒုၚ်ကြဳဗုမ်လဝ်လဝ်တုဲ စိုပ်အခိၚ်လပါ် နူဂယးတံဂှ်တှ်ေ ၜၚ်ကျာဒပ်ပၞာန်တံ ဆက်ပဝ်ယာန် ဂေတ်ရံၚ်မံၚ်ရဂှ် ညးအုပ်ကာခရိုၚ်သဓီု KNU ပဒိုသဝ်အေနိုၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူကမၠောန်ယှိုဲမျှဝ်တံဏံ ဒးဒုၚ်ကြဳဗုၚ်တုဲ ညးဍုၚ်ကွာန် ၁၀၀၀ ပြၚ်ၚ် နူကဵုကွာန်ဗေၚ်ဗာန်၊ ဝေၚ်ကတိုက်၊ ညံၚ်တောဲလောဲ၊ ယှိုဲလံၚ်အေန် ကဵု ဗယျာတဝ် နူကဵုကွာန်တံဏံဂှ် ဒးဂြိပ်ပါဲဒဴအောပ်မံၚ် ဒၞာဲဗၠးဘဲတံရ။
တုဲကၠုၚ် ဂိတုမာတ် ၁၆ တေံလေဝ် အပ္ဍဲပွိုၚ်ဍုၚ်ၜဳကလေၚ် ဒၞာဲကမၠောန်ယှိုဲမျှဝ်ကြုက်တံ နွံမံၚ်ဗ္ဒာဲ ကွာန်ဝေၚ်ကလေဝ်ဂှ် ဒးဒုၚ်ကြဳဗုမ်ၜၚ်ကျာတုဲ ရဲကမၠောန်ယှိုဲမျှဝ် ၅ တၠ ချိုတ်အာလဝ်ဂှ်တှ်ေ သီုကဵုကောန်ဍုၚ်ကြုက်တံလေဝ်ပါမံၚ်တုဲ ရဲကမၠောန်ယှိုဲမျှဝ် လၟိဟ်စှ်ပြၚ်ၚ် ဒးလဝ်ဝပ်ဇၞော်ကဵုဇြဟတ် နွံရ။
ပ္ဍဲပွိုၚ်ဍုၚ်ၜဳကလေၚ် အတိုၚ်လၟေၚ်ကြုၚ် ၜဳကလေၚ်မွဲဒမြိပ်မ္ဂး ကမၠောန်ယှိုဲမျှဝ် နွံမံၚ် ၁၀၀ ဒၞာဲပြၚ်မံၚ်တုဲ ကြဴနူဒပ်ပၞာန်သီအဝဵုဂှ် ကောန်ဍုၚ်ကြုက်ဗွဲမဂၠိုၚ်တံ ကၠုၚ်ကၠောန်မံၚ်ကမၠောန်ဒၞာဲတံဏံရောၚ် ဂွံတီကေတ်ရ။
ပရိုၚ် – သြင်လောန်တိုၚ်မ်
