မတ်မလီု၊ ဂျောန် ၂၄
အပ္ဍဲတွဵုရးမန် စပ်ကဵုပရေၚ်ရုဲစှ် သ္ကိုပ်ပရေၚ်အုပ်ဓုပ်အရာပ်၊ ကွာန်ဆေၚ်စပ်တံဂှ် ဟွံရုဲစှ်အာ အတိုင်သၞောဝ်ဥပဒေ၊ ခါန်ကၞက်ကေတ်မံၚ်သ္ၚိတ်တ်ဇြဇြတုဲ ပလေဝ်စလဝ် သွက်သ္ဂောံကဵုအာ တန်ဗတောန်မောမ်မာန်နွံမံၚ်ရောၚ် ညးကြပ်ကဵုဂကောံပရေၚ်အုပ်ဓုပ်တံဂှ် ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
သ္ကိုပ်ပရေၚ်အုပ်ဓုပ်တံ နူကဵုအလဵုအသဳပၞာန်သီအဝဵု ခါန်ကၞက်လဝ် သ္ၚိတ်တ်ဇြဇြတံဂှ်တှ်ေ သ္ကိုပ်ပရေၚ်အုပ်ဓုပ်တြေံတံကီု၊ ညးကြပ်ကဵု ဗော်ပျဳခိုၚ်ဖျိုဝ်တံကဵု ရဲထံက်ဂလာန်တံကဵု ဂကောံပရေၚ်အုပ်ဓုပ် အလဵုအသဳပၞာန်တံဗွဲမဂၠိုၚ်ပါလုပ်မံၚ် မဒှ်ရ။
သ္ကိုပ်ပရေၚ်အုပ်ဓုပ် ဒုၚ်ခါန်ကၞက်လဝ် သ္ၚိတ်တ်တံဂှ် စနူဂိတုဂျူလာၚ် ၇ ဏံမ္ဂး နူကဵုအလဵုအသဳပၞာန် သွက်သ္ဂောံကဵုအာ တန်ဗတောန်မောမ်မာန် ဆေၚ်စပ်ကဵုပရေၚ်အုပ်ဓုပ်တ္ၚဲဇမၠိၚ် နွံမံၚ်ရောၚ် ညးကြပ်ကဵု ဂကောံပရေၚ်အုပ်ဓုပ်တံ သ္ဂးရ။
အတိုင်ဥပဒေပရေၚ်အုပ်ဓုပ်အရာပ်၊ ဂအုံကွာန် ချူခၞံလဝ် သၞာံ ၂၀၁၂ ဂှ်မ္ဂး အလဵုအသဳတၟိဝွံ အတိုင်ပၟိက်ဆန္ဒ ညးဍုၚ်ကွာန်ဂမၠိုၚ်တံဂှ် ဒးကလေၚ်ရုဲစှ်ပတိုန်အာ သ္ကိုပ်ပရေၚ်အုပ်ဓုပ်အရာပ်၊ ကွာန်ဆေၚ်စပ် တံရောၚ် သ္ဂးလဝ်ရ။
ဆဂး နူကဵုဂကောံပရေၚ်အုပ်ဓုပ် အဆံၚ်ပွိုၚ်ဍုၚ်၊ ခရိုၚ်၊ တွဵုရး သၟဝ်တဲအလဵုအသဳပၞာန်လၟုဟ်ဏံဂှ် ပ္ဍဲအရာရုဲစှ်အာ သ္ကိုပ်ပရေၚ်ပရၚ်အုပ်ဓုပ်တံမ္ဂး ဟွံလးထ္ၜးလဝ်ကဵုညးဍုၚ်ကွာန်တံ သောင်ၚ်ကၠးကၠးကီု ရုဲစှ်ကေတ်မံၚ် သ္ၚိတ်တ်ဇြဇြ နွံမံၚ်တုဲ လ္တူကဵုအာတန်ဗတောန်ဏံဂှ်လေဝ် ပရေၚ်ပါ်ပါဲအပ္ဍဲဒေသတံသၠုၚ်တိုန်ကၠုၚ်မံၚ်ကွေံကွေံရောၚ်။
အတိုင်သၞောဝ်ဥပဒေ ပရေၚ်အုပ်ဓုပ်အရာပ်၊ ဂအုံကွာန် ကလေၚ်ချူခၞံပလေဝ်လဝ် ပ္ဍဲသၞာံ ၂၀၁၆ ဂှ်မ္ဂး အာယုက်တာလျိုၚ် သ္ကိုပ်ပရေၚ်အုပ်ဓုပ်တံဂှ် ဒှ်အတိုင်အာယုက်တာလျိုၚ် သမ္မတကၟိန်ဍုၚ်လၟုဟ်ဏံရောၚ် ချူခၞံလဝ်ရ။
တုဲပၠန် အာယုက်တာလျိုၚ် သ္ကိုပ်ပရေၚ်အုပ်ဓုပ်တံဂှ် တုပ်ကဵုအာယုက်တာလျိုၚ် သမ္မတတၟိကီုတုဲ စဵုကဵုအခိၚ်ရုဲစှ်ခါန်ကၞက် ကဵုတာလျိုၚ် သ္ကိုပ်ပရေၚ်အုပ်ဓုပ်အရာပ်၊ ဂအုံကွာန်တၟိတုဲဒှ်အာဂှ် ဒးယိုက်ဂၠေၚ်အာတုဲ နနဲ ဗီုပြၚ်သၞောတ်စှ်ေစှ်ေ ဒးသၠောဲပအပ်ကဵုဏာ တာလျိုၚ်ကမၠောန်တံဂှ်ရောၚ် သ္ဂးရ။
စပ်ကဵုပရေၚ်ကလေၚ်ရုဲစှ် သ္ကိုပ်ပရေၚ်အုပ်ဓုပ်တံတုဲ ပ္ဍဲကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ပ္ဍဲဂိတုဂျောန် ၁၆ တေံဂှ် ညးစၞးစၠတ်ထဝ်တွဵုရး ပွိုၚ်ဍုၚ် ၜဳကလေၚ် လၟိဟ် ၂ ဥူတေန်ယဳ သၟာန်သၟုက်လဝ်တင်သၟာန် နွံမံၚ်ကီုရ။
လတူတင်သၟာန်ဂှ်မ္ဂး အတိုင်သၞောဝ်ဥပဒေဂှ် ရုဲစှ်အာသ္ကိုပ်ပရေၚ်အုပ်ဓုပ်တံရောၚ် ဝန်ဇၞော်ပရေၚ်မၞိဟ် ဂကောံအလဵုအသဳပၞာန် တွဵုရးမန် ဥူတေန်ဇြဝ်ထောန် ဟီုဂးလဝ်ကီုလေဝ် အခိၚ်ကာလ၊ အစီအဇန် သွက်သ္ဂောံရုဲစှ်အာ သ္ကိုပ်ပရေၚ်အုပ်ဓုပ်တံဂှ် ဟီုစုတ်လဝ်ဟၟဲပုဟ်။
အပ္ဍဲတွဵုရးမန်မ္ဂး နွံမံၚ် ၁၀ ပွိုၚ်ဍုၚ်၊ ဂအုံအရာပ်ကွာန် နွံမံၚ် ၄၆၈ ဂအုံ တုဲ ကွာန်နွံမံၚ် ၁၁၄၇ ကွာန်ကီုလေဝ်၊ ပ္ဍဲအရာရုဲစှ်လဝ် သ္ကိုပ်ပရေၚ်အုပ်ဓုပ်တံဂှ် ညံၚ်ရဴလက်ထက်အလဵုအသဳ တုဲကၠုၚ်တေံ ရုဲစှ်လဝ်သောၚ်ၚ်ကၠးကၠး ဟၟဲပုဟ် ညးဒေသတံ ဟီုလဴတုဲ ဂွံတီကေတ်ရ။
ပရိုၚ် – သြင်လောန်တိုၚ်မ်
Photo – MOI
အပ္ဍဲတွဵုရးမန် ခါန်ကၞက်ကေတ်မံၚ်သ္ကိုပ်ပရေၚ်အုပ်ဓုပ်တံ သ္ၚိတ်တ်ဇြဇြတုဲ ပလေဝ်စမံၚ်သွက်သ္ဂောံကဵုတန်ဗတောန်
By
sanlontai
