ပရေၚ်ဂီုကၠီုပယျဵု ဍိုန်လျမံၚ်တံဂှ် အကြာအလဵုအသဳကဵုအလဵုအသဳ ပ္ညဳပ္ညပ်အာရောၚ် သမ္မတသီအဝဵု ဟီု

နေပျဳဒဝ်၊ ဂျောန် ၂၄

စပ်ကဵုအကာဲအရာလၟုဟ်ပြဟ်ဟ်ဏံ ပရေၚ်ဂီုကၠီုဒေသပယျဵု ဍိုန်လျမံၚ်တံဂှ် ဒှ်ကိစ္စ အကြာအလဵုအသဳကဵု အလဵုအသဳ ဒးပ္ညဳပ္ညပ်အာရေၚ်သ္ကံတုဲ နူအလဵုအသဳရ ဒးဖန်ဖက်ကၠောန်အာဂွံတုဲ ဂကောံတၞဟ်ဟ်တံ လုပ်ဖန်ဖက်ဟွံဂွံပုဟ် သမ္မတအလဵုအသဳပၞာန် ဥူမေန်အံၚ်လှိုၚ် ဟီုရ။

အပ္ဍဲတရဴဍုၚ်ကြုက် သမ္မတသီအဝဵု ဒုၚ်ဆဵုဂဗသၟာန်သှ်လဝ်ကဵု ဌာန်ပရိုၚ် Phoenix ဍုၚ်ကြုက်ဂှ် စပ်ကဵုပရေၚ်ပြုပြေၚ်စဳရေၚ် မူဝါဒဒေသပယျဵုတံကဵု လတူပရေၚ်ဂီုကၠီုပိုန်ဒြပ်ကြုက်တံတုဲ သှ်ကဵုလဝ်ရောၚ်။

စပ်ကဵုပရေၚ်ပြုပြေၚ်စဳရေၚ် ဒေသပယျဵုဂှ် ဆေၚ်စပ်မံၚ်ကဵု အလဵုအသဳသၟးတုဲ ကိစ္စပရေၚ်ကူသာန်ဗၞိက်ဒေသပယျဵုဂှ် အလဵုအသဳဟေၚ် ဒးဖန်ဖက်ရေၚ်တၠုၚ်အာတုဲ ပြသၞာတံဂှ် ညံၚ်ဂွံဒှ်အာအတိုင်ဥပဒေ ဒးဂစာန်အာရောၚ် သ္ဂးရ။

စပ်ကဵုပရေၚ်ဂီုကၠီု တၠပရေၚ်ပိုန်ဒြပ်ကြုက်တံ ဓလိုက်လဝ်တမ်ရိုဟ်တံဂှ် နူကဵုအလဵုအသဳညးတံ ဖန်ဖက်ရေၚ်တၠုၚ်ကၠောန်ကဵုလဝ် နွံမံၚ်ဗွဲမဂၠိုၚ်တံကီု လ္တူအခက်အခုဲ ဒှ်ကၠုၚ်လဝ်တံဂှ်လေဝ် တတ်ၜက်အာလဝ်တုဲ အခိၚ်လၟုဟ်မ္ဂး အကာဲအရာခိုဟ်တိုန်ကၠုၚ်မံၚ်ရောၚ် ဥူမေန်အံၚ်လှိုၚ် ဟီုရ။

ကြဴနူသီအဝဵုပၞာန် ၂၀၂၁ တေံတုဲ ကမၠောန်ပရေၚ်ပတိတ်ကပေါတ် တံကီု ကမၠောန်ပရေၚ်ဆက်စၠောံတံကီု  ပရေၚ်ဓလိုက်တမ်ရိုဟ် ဍုၚ်သအာၚ် ဗွဲမဂၠိုၚ်တံ တိတ်အာလဝ်နူဍုၚ်ဗၟာ ဗွဲလၟေၚ်ၚ်တံတုဲ ညံၚ်သ္ဂောံကလေၚ်လုပ်ကၠုၚ်မာန်ပၠန်ဂှ် အလဵုအသဳပၞာန် ဒးဂစာန်မံၚ်ရောၚ်။

လ္တူအကာဲအရာဏံ စပ်ကဵုပရေၚ်ကေၚ်ကာဍုၚ်ဗၟာဂှ် အလဵုအသဳကြုက် လုပ်ပြံက်လုပ်ပါကၠုၚ်တုဲ သွက်ပရေၚ်ဂုဏ်ဖဵု ပိုန်ဒြပ်ကြုက် သွက်သ္ဂောံဇၞော်သၠုၚ်ပတိုန်အာ ပရေၚ်ဓလိုက်တမ်ရိုဟ်ကဵု ပရေၚ်ကူသာန်ဗၞိက်တံဂှ် နူကဵုအလဵုအသဳပၞာန် ဒုၚ်ကဵုလဝ်တာလျိုၚ်ပရေၚ်ဂီုကၠီု မဒှ်ရ။

စပ်ကဵုပရေၚ်ဓလိုက်တမ်ရိုဟ် နူကဵုဍုၚ်ကြုက် ဍုၚ်သအာၚ်တံမ္ဂး ဒပ်ပၞာန်စဵုဒၞာအာ နကဵုပရေၚ်ပၞာန်တုဲ ဗီုပြၚ်လုပ်အုပ်ဓလုံအာ တိဍာ်တံဂှ် ကၠောန်ကၠုၚ်မာန်ရောၚ် ဗိုလ်ဇၞော် CDM ဇြေန်ယဝ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။

“စပ်ကဵုပရေၚ်ဂုဏ်ဖဵု ပိုန်ဒြပ်ကြုက်တံဂှ် ဒပ်ပၞာန်ကီု၊ ဒပ်ပၠန်ဂတးတံကီု၊ သီုဂကောံကောန်ဍုၚ်အရၚ် တံကီု တးပါဲအာ ဟွံမာန်ပုဟ်။ ဟိုတ်ဂှ်ရ ဒးဟီုတှ်ေ သီုၜါလပါ် ဗတိုက်ညးသ္ကံဟွံဂွံ (ကမၠောန်ပရေၚ်ပိုန်ဒြပ် ကြုက်နွံပ္ဍဲဗၟာ) ဒေသဗၠးၜးပေါဲပၞာန်တံ မံက်တိုန်ဂၠိုၚ်ကၠုၚ်ဏောၚ်။

ဖန်ဗဒှ်ဒေသဗၠးၜးပေါဲပၞာန်ဗွဲမဂၠိုၚ်တုဲမှ ဒၞာဲဒပ်ပၠန်ဂတးတံ ဖျေံသ္ဇိုၚ်ဂှ် ညံၚ်သ္ဂောံဍောတ်စှ်ေအာတုဲ စဵုဒၞာအာကဵုပရေၚ်ပၞာန် (ဒၞာဲဗ္ဒာဲ) ဏောၚ် အဲတော်ခယျလဝ်ရ” သာ်ဝွံ သ္ဂးရ။

တုဲကၠုၚ် စပ်ကဵုပရေၚ်လဝေၚ်ပၞာန် ၁၀၂၇ ကီု ပရေၚ်လဝေၚ်ပၞာန် သေံ-မာန္တလေဝ် ကေုာံ ပရေၚ်လဝေၚ်ပၞာန် ဒေသလဒေါဝ်တံမ္ဂး အပ္ဍဲဒၞာဲကိုန်အစဳဇန်ကြုက်တံ နွံမံၚ်ဂှ် ဒပ်ပၞာန်ကီု၊ ဂကောံပၠန်ဂတး တံကဵု  ဂကောံကောန်ဍုၚ်အရၚ်တံကီု ပရေၚ်ဒှ်ပန်လဝ်ညးသ္ကံ ဟွံမွဲပုဟ်ဂှ် ဒှ်သက်သဳမွဲရောၚ် ညးထံက်ထ္ၜးရ။

အပ္ဍဲတရဴဍုၚ်ကြုက် ဥူမေန်အံၚ်လှိုၚ်ဏံ သွက်သ္ဂောံသၠုၚ်ပတိုန်အာ ပရေၚ်ထမံက်ရုပ်ရဴ စင်္ကြံပရေၚ်ပိုန်ဒြပ် ကြုက်-ဗၟာ ကေုာံ ပရေၚ်ပံၚ်တောဲ ကိုန်အစဳဇန်သၞေဟ်ၜၚ်ဇြိုဟ် ကျံက်ဖျူ၊ ဂၠံၚ်ကွဳပၟတ် မာန္တလေဝ်-မူသေဝ်တံဂှ် သၠုၚ်ပတိုန်အာ အသိၚ်ရောၚ်ဂှ် တုပ်လဝ်စိုတ်နွံရ။

ကိုန်အစဳဇန် စင်္ကြံပရေၚ်ပိုန်ဒြပ်တံဏံဂှ် နူဍုၚ်ကူမေန် ရးယူနန် ဍုၚ်ကြုက်ဂှ် သွက်ဂွံဆက်စၠောံအာကဵု ဍုၚ်ပရေၚ်ပိုန်ဒြပ်ဗၟာ ဒၞာဲအဓိကတံ နူကဵုမူသေဝ်၊ မာန္တလေဝ်၊ လ္ဂုၚ် ကေုာံ ကျံက်ဖျူ တံရောၚ်။

ဒၞာဲဂၠံၚ်ကိုန်အစဳဇန်လ္ၚဵု တတ်အာဂှ် ဟိုတ်နူနွံသၟဝ်တဲ ပရေၚ်ဒပ်ပၞာန်ဗၟာ ထိၚ်ချုက်အုပ်ဓုပ်လဝ်ဟွံသေၚ်တုဲ နူကဵုလပါ်ကြုက် သွက်သ္ဂောံကဵုကၠုၚ်ဇြဟတ်ဟရိုဟ် ကုဂကောံ ကောန်ဍုၚ်အရၚ်ဒေသပယျဵုတံ နွံမာန်တုဲ သီုကဵု ပရေၚ်သွက်ဂွံ ဒးဇီုကပိုက်ကၠုၚ်ကဵု ပၠန်ဂတးတမ်က္ညၚ်လေဝ် ဒှ်ကၠုၚ်မာန်ရောၚ် ညးခါတ်အကာဲတံ သ္ၚဳဂၠိပ်လဝ်အိုတ်ရ။

မွဲလပါ်ဂှ်လေဝ် စပ်ကဵုတရဴအာလဝ်အိန္ဒိယတုဲ သွက်သ္ဂောံပသၠဲပတိုန် ပရေၚ်ပိုန်ဒြပ်ၜါဍုၚ်တံဂှ် အကာဲအရာညိၚ်ဝပ်မှ ဒှ်ကၠုၚ်မာန်တုဲ နကဵုနဲကဲၜိုဟ်လလမ် ဂကောံပၠန်ဂတးတံ ညံၚ်ဂွံပံၚ်တောဲလုပ်ကၠုၚ်ညိဂှ် သမ္မတသီအဝဵု ဥူမေန်အံၚ်လှိုၚ် ကေၚ်ဟီုပတိတ်လဝ် ပ္ဍဲဂိတုဂျောန် ၃ တေံ မဒှ်ရ။

ဗွဲကြဴဏံမ္ဂး သွက်ပရေၚ်ကူသာန်ဗၞိက်ဒေသပယျဵု ဍုၚ်ကိစ္စဇၞော် မံၚ်တံဂှ် ဒပ်ပၞာန်ဗၟာ သုၚ်စောဲဇြဟတ်ဗွဲမဂၠိုၚ်တုဲ ကလေၚ်ထပက်ပၞာန် ပံၚ်တောဲဗတိုက်လဝ် ဗလးတိ ဗလးကျာတံတုဲ ပ္ဍဲဂျောန် ၂၀ ဂှ် ကလေၚ်သီဂွံအာ ဂၠံၚ်ဇၞော် ကလေဝ်-တမူ ပယျဵု အိန္ဒိယ-ဗၟာ သီုဍုၚ် ခါန်ပါတ်တံရ။

ပြဟ်ဟ်ဏံ အပ္ဍဲကဵု ဒေသဒးဗလးလဝ်တဲတံမ္ဂး အကြာဂှ်
ဍုၚ်ခါန်ပါတ်၊ ကဝ်လေန်၊ ဗြဝတဳ၊ ဠာယှိုဲ၊ သဳဇြိုၚ်၊ မိုဝ်ဗြေဝ်၊ တပိက်ကျေန်၊ နံၚ်ချို၊ ကျံက်မေဝ်၊ တဳပဝ်၊ မိုဝ်မုက်၊ မိုဝ်ဂုက်၊ သေတ်ကူ၊ ဗာန်မံက်၊ တကံၚ်၊ ဖဠာန်၊ တောန်ဇြာန်၊ အေန်တဝ်၊ မဝ်ဠူ၊ မဝ်တံၚ်တံဂှ် ဒပ်ပၞာန်ဗၟာ ကလေၚ်ထိၚ်ချုက်မာန်ကၠုၚ်လဝ် မဒှ်ရ။

ပရိုၚ် – သြင်လောန်တိုၚ်မ်
Photo – HOS