တနၚ်သဳ၊ ဂျောန် ၂၅
အပ္ဍဲကဵုရးတနၚ်သဳ အဃောစိုပ်မံၚ်အခိၚ်ဥတုဗြဲလုပ်ကၠုၚ်ဏံ ညးပါဲဘဲပၞာန်ဗွဲမဂၠိုၚ်တံ ယဲဇွဟ်က္တဵုဒှ်ဂၠိုၚ်မံၚ်ရောၚ် သာ်ဝွံ ဂွံတီကေတ် နူဂကောံသုတေသနဒေသ FE5 Thanintharyi ရ။
စနူအဒေါဝ်ဂိတုမေ တုဲကၠုၚ်တေံ အပ္ဍဲရးတနၚ်သဳဂှ် ဗြဲဂူရိုပ်မံၚ်တုဲ ဒးဇီုကပိုက်မံၚ်ကဵု ပရေၚ်ကျာလပါ် ဗြဲထတ်ကီုလေဝ် ဟိုတ်နူ ပေါဲဗတိုက်အကြာၜါလပါ်ဒှ်မံၚ်ဂှ်ကီု ၜၚ်ကျာပၞာန်ဗတိုက်ဂှ်လေဝ် ပဵုဂၠိုၚ်ကၠုၚ်တုဲ လၟိဟ်ညးပါဲဘဲပၞာန်တံ ဆက်တုဲပဵုဂၠိုၚ်တိုန်ကၠုၚ်မံၚ်ရောၚ်။
တုဲကၠုၚ်ဂိတုမေတေံဂှ်တှ်ေ ပေါဲဗတိုက်ကီု ပရေၚ်တံၚ်မါၚ်ဗတိုက်လဝ်တံ အပ္ဍဲရးတနၚ်သဳ ဟွံအောန်နူကဵု ၆၀ ဝါ က္တဵုဒှ်လဝ်တုဲ ပေါဲဗတိုက်ဗွဲမဂၠိုၚ်က္တဵုဒှ်လဝ် အကြာဂၠံၚ်အာဍုၚ်မဝ်တံၚ် ပယျဵုသေံ-ဗၟာ ကေုာံ ကွာန်ပွဳပွူဂှ်တုဲ လၟိဟ်ညးပါဲဘဲပၞာန် နွံကၠုၚ် ၉၃၂၀၀ ပြၚ် သ္ဂးရ။
မွဲလပါ်ပၠန် ဟိုတ်နူ အခိၚ်ဥတုဗြဲလုပ်ကၠုၚ်တုဲ ညးပါဲဘဲပၞာန်ဗွဲမဂၠိုၚ် ဒးဂြိပ်ပါဲမံၚ် အကြာဗြဲအကြာကျာ တ္ၚဲလံလအာဂှ်ရ ယဲမနက် ဥတုရာသဳကေုာံ ယဲဇွဟ်က္တဵုဒှ်မံၚ်ဂှ် မွဲမွဲကွာန်မ္ဂး လၟိဟ်ၜိုတ် ၁၀ တၠ နွံမံၚ်ရောၚ် ညးတာလျိုၚ် FE5 Thanintharyi မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တုဲပၠန် ဟိုတ်နူပရေၚ်ကၟာတ်ဆိုအ် ဒပ်ပၞာန်သီအဝဵုတံတုဲ စပ်ကဵုကရိယာစၟဳစၟတ်ယဲဇွဟ် နွံပၟိက်တံကီု ဂဥုဲဇဗနာနာတံလေဝ် ဒှ်မံၚ်အခက်အခုဲကီုရောၚ် သ္ဂးရ။
အပ္ဍဲရးတနၚ်သဳ ဥတုဗြဲသၞာံဏံဂှ်တှ်ေ ဟွံတုပ်ညံၚ်ရဴသၞာံအာ တုဲတုဲကၠုၚ်တေံတုဲ ဟိုတ်နူပေါဲဗတိုက်ကီု ပရေၚ်ၜၚ်ကျာပၞာန်တံဗတိုက်ကီုဂှ် ညးဒေသတံဒးအောပ်ပါဲမံၚ် အကြာဗြဲအကြာဍာ်တံတုဲ ဟိုတ်နူ နွံမံၚ်ပၟိက်ကဵုစၞစဇွောံမကေုာံဂဥုဲဇဗနာနာတံတုဲ ဒးဇီုကပိုက်မံၚ်ကဵုပြသၞာပရေၚ်ထတ်ယုက်တံ မဒှ်ရ။
ပ္ဍဲဂိတုအေဗရာ တုဲကၠုၚ်တေံလေဝ် ဟိုတ်နူပရေၚ်ပေါဲဗတိုက် အကြာဒပ်ပၞာန်ကဵု ဂကောံဇြဟတ်ပၠန်ဂတး တံၜါလပါ်ကီု ၜၚ်ကျာပၞာန်လေဝ်ဗတိုက်မံၚ်တုဲ ပ္ဍဲရးတနၚ်သဳ ညးဒးထောံလဝ် ဌာန်ဒၞာဲဝါဲညးပါဲဘဲပၞာန်တံ လၟိဟ်နွံကၠုၚ် ကြပ် ၈၃၇၀၀ တၠရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media