မတ်မလီု၊ ဂျောန် ၂၅
အပ္ဍဲတွဵုရးမန် ဌာန်ဂအုပ်ပၞာန်ရးအဂၞဲ ဖျေံသ္ဇိုၚ်ဍုၚ်မတ်မလီုဂှ် စိုပ်လက်ထက်သ္ကိုပ်ရး ရတခတၟိဏံဂှ်တှ်ေ ပရေၚ်ဗတိုက်ကြဳဗုမ်နူၜၚ်ကျာ ပဵုဂၠိုၚ်တိုန်ကၠုၚ်မံၚ်ရောၚ် ဂွံတီကေတ် နူကဵုတၚ်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်တံရ။
ဂိတုအေဗရာတုဲကၠုၚ်တေံဂှ် သ္ကိုပ်ရး ရတခ သ္ကိုပ်ပၞာန် ကျဝ်လေန်မိုၚ် အဆံၚ်တာလျိုၚ်သၠုၚ်တိုန်အာ နဒဒှ်သ္ကိုပ်ဂကောံလဝေၚ်ပၞာန်တၟေၚ် စၟတ် (၄) တုဲ ခါန်ကၞက်လဝ် သ္ကိုပ်ရးရတခတၟိ ဒုသ္ကိုပ်ပၞာန် သူရ ဇြဝ်လွောန်သိုဝ် ဂှ်ရောၚ်။
ပ္ဍဲလက်ထက်သ္ကိုပ်ရး ရတခတၟိ ဒုသ္ကိုပ်ပၞာန် သူရ ဇြဝ်လွောန်သိုဝ် ဒှ်ကောန်ဌာန်ဇာတိ ပွိုၚ်ဍုၚ်ကျာ်မြဟ်ဂှ် အပ္ဍဲတွဵုရးမန်မ္ဂး ပရေၚ်ဗတိုက်ကြဳဗုမ်ကဵုၜၚ်ကျာ ပဵုတုဲဂၠိုၚ်တိုန်ကၠုၚ် မဒှ်ရ။
အတိုၚ်ဌာန်ပရိုၚ်သြၚ်လောန်တိုၚ်မ် ပကောံလဝ်တင်နၚ်တံမ္ဂး အပ္ဍဲကဵုပွိုၚ်ၜါဂိတု ဒုသ္ကိုပ်ပၞာန် သူရ ဇြဝ်လွောန်သိုဝ် ဒှ်ကၠုၚ်သ္ကိုပ်ရးရတခဏံတုဲ ဒပ်ပၞာန်သီအဝဵုတံ ကၠောန်လဝ်ပရေၚ်ဗတိုက်ဗလးကျာ အပ္ဍဲတွဵုရးမန်ဂှ် ဟွံအောန်နူကဵု ၁၅ ဝါနွံမံၚ်ရောၚ်။
အပ္ဍဲပရေၚ်တံဏံ နကဵုတၚ်တၟေၚ်မွဲမ္ဂး အပ္ဍဲကဵုဒေသကၞောတ်ၜဳရေဝ် ဒၞာဲတိဍာ်ဗော်ဍုၚ်မန်တၟိ ဥက္ကဌ နာဲဟံသာပၠတရဴ သဳကၠဳမံၚ်ပရေၚ်ဓဝ်ၜိုဟ်လလမ် ကဵုဒပ်ပၞာန်သီအဝဵုတံဂှ် ဒှ်လဝ်ပရေၚ်ဗတိုက်ဗလးကျာ ၃ ဝါနွံရ။
အပ္ဍဲလက်ထက်သ္ကိုပ်ရး ရတခတၟိဏံမ္ဂး အပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်ကေုာံဍုၚ်ရေဝ် ဒၞာဲဒပ်ပၠန်ဂတးချဳဒရာၚ် ဇြဟတ်တဴမံၚ်တံဂှ် ပရေၚ်ဗတိုက်ဗလးကျာပဵုတုဲကၠောန်ကၠုၚ်မံၚ်ရောၚ် ဂွံတီရ။
ပရေၚ်ဗတိုက်ဗလးကျာ ဒပ်ပၞာန်သီအဝဵုဗွဲမဂၠိုၚ်တံဂှ်မ္ဂး ပ္ဍဲဒၞာဲညးဍုၚ်ကွာန် မံၚ်စံၚ်တန်တဴမံၚ်ဂှ်ကီု၊ ဒၞာဲကၠောန်မံၚ်ကမၠောန် ယှိုဲမျှဝ်တံဂှ် တော်ခယျလဝ် ဒၞာဲဒပ်ပၠန်ဂတးတံချဳဒရာၚ်မာန်ရောၚ်ဂးတုဲ ကြဳမံၚ်ဗုမ်ရောၚ်။
အပ္ဍဲတွဵုရးမန် စိုပ်လက်ထက်သ္ကိုပ်ရး ရတခတၟိဏံ ဟိုတ်နူ ပရေၚ်ဗတိုက်ဗလးကျာတံဂှ် မၞိဟ်ဟွံအောန်နူ ၂၀ တၠ ချိုတ်အာလဝ်တုဲ ညးဒးဝပ်နွံမံၚ် ကြပ် ၄၀ တၠ မဒှ်ရ။
သ္ကိုပ်ရး ရတခ ဒုသ္ကိုပ်ပၞာန် သူရဇြဝ်လွောန်သိုဝ်ဝွံ ဒှ်ညးကေတ်လဝ်တာလျိုၚ်အဓိက စပ်ကဵုကိစ္စကေၚ်ကာ ပရေၚ်စဵုဒၞာ၊ ပရေၚ်ဂီုကၠီု ကေုာံ လဝေၚ်ပၞာန်တွဵုရးမန်ကဵု တွဵုရးကရေၚ်တံ မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media