နေပျဳဒဝ်၊ ဂျောန် ၂၅
ကြဴနူပၞာန်သီအဝဵုတုဲ အပ္ဍဲပဋိပက္ခဍုၚ်ဗၟာမ္ဂး ကောန်ၚာ်အဝဲမံၚ်ဘာတံ အခေါၚ်ကတ်ဗ္တောန်ပညာသ္ဇိုၚ် ဆက်ဒှ်အာမံၚ်ပရေၚ်အခက်အခုဲဖိုဟ်ရောၚ် နူကဵုဂကောံလ္ၚတ်မဟာဗျူဟာကေုာံ မူဝါဒပရေၚ်ဍုၚ်ဗၟာ ISP Myanmar ပတိတ်လလောၚ်တြးလဝ် လိက်ကၞပ်ကံက်တင်နၚ်ပရေၚ်မွဲကၞပ် ပ္ဍဲဂိတုဂျောန် ၂၃ ရ။
စိုပ်အခိၚ်ပံက်ဘာ သၞာံပညာ ၂၀၂၆-၂၀၂၇ ဏံ ဟိုတ်နူပရူပရာ နာနာသာ်တံတုဲ ညးဒးဒုၚ်ဆောံလေၚ်အာလဝ် အခေါၚ်ကတ်ဗ္တောန် ပရေၚ်ပညာသ္ဇိုၚ် ဆက်နွံအာမံၚ် ၆ ဒသမ ၃ ပြကောဋိကိုတ်ပြၚ်ဏီတုဲ ပရေၚ်ပညာဍုၚ်ဗၟာမ္ဂး ပါဲနူတင်ဂွံစၟဳညာတ်အာဂတ ဟွံမာန်ဏီသၟးဟွံက ဆၜိုတ်ဂွံဂတာပ် ပ္ဍဲအရာပရေၚ်ဂွံဂွံအခေါၚ် ကတ်ဗ္တောန်ပညာသ္ဇိုၚ်တံဂှ်လေဝ် ဒှ်မံၚ်အခက်အခုဲဖိုဟ်ရောၚ်။
အတိုၚ်တၚ်နၚ် ISP Myanmar ဂှ်မ္ဂး လၟိဟ်ညးလုပ်အပ်ဘာပရေၚ်ပညာသ္ဇိုၚ် နွံဆၜိုတ် ၆ ဒသမ ၇ ပြကောဋိကိုတ်ဏီတုဲ ယဝ်ရ တော်ဆအာကဵု လၟိဟ်ကွးဘာအဝဲမံၚ်ဘာ ဒးကတ်ဗ္တောန်ပညာသ္ဇိုၚ် ပွဳပွူ ၁၃ ပြကောဋိကိုတ်တံမ္ဂး ဆၜိုတ်အပ္ဍဲပွိုၚ်ကတ်ပညာ မွဲသၞာံဏံဓဝ်ဂှ် ညးဒးဆောံလေၚ်အာလဝ် အခေါၚ်ကတ်ဗ္တောန်ပညာသ္ဇိုၚ် နွံမံၚ်ကြပ်ကဝက် ဒှ်ကီုရ။
ပြဟ်ဟ်ဏံ စနူသၞာံပရေၚ်ကတ်ပညာဏံတုဲ ပ္ဍဲဘာအလဵုအသဳတံမ္ဂး ပေါဲသၟာန်ပရေၚ်စမ်ၜတ်လိက် အခေါၚ်ဂွံလုပ်ဘာ (placement test) တံဂှ် စၟတ်ပိုၚ်ခြာလဝ် စဵုကဵုအာယုက် ၁၅ သၞာံ စွံအဓိက ရန်တၟံလဝ်ကဵု သွက်ကဆံၚ်တန်မူလတံကဵု ကဆံၚ်တန်လဒေါဝ်သၟးတုဲ သွက်အဝဲရဲမိက်ဂွံကလေၚ်တိုန်ဘာတန်သၠုၚ်တံ ဒှ်မံၚ်အခက်အခုဲရောၚ် သ္ဂးရ။ တုဲပၠန် အဟိန်ဂြိပ်ပါဲမံၚ်ပၞာန်တံဂှ် စိုပ်အာဒေသတၞဟ်ဟ်တံတုဲ ကွးဘာတံဟိုတ်နူဂွံထ္ၜးသက်သဳ လိက်အခေါၚ်ပြံၚ်ဘာဟၟဲကီု၊ ပတိတ်တၞးလိက်အခေါၚ်ပြံၚ်ဘာဟွံဂွံလဝ်တုဲ အပ်ဘာဟွံဂွံတံဂှ် ဒှ်မံၚ်အခက်အခုဲအိုတ်ရောၚ်။
ဂကောံပါလုပ်မံၚ် အပ္ဍဲပဋိပက္ခတံဂှ်လေဝ် သွက်ဂွံထပက်အဇာပရေၚ်ပညာတံဏံမာန်ဂှ် နကဵုနဲကဲနာနာ ဂစာန်ကၠုၚ်မံၚ်ကီုလေဝ် ဟိုတ်နူအကာဲအရာပၞာန်၊ တၚ်နွံပၟိက် ဒၞာဲစမြိုၚ်သ္ဇိုၚ် ခဒမ်ဗတောန်လိက်တံ ဟွံလောဲသွာတုဲ ကၠောန်အာဇြဟတ်ဇၞော်ဇၞော်ဟွံမာန်ပုဟ် နူကဵု ISP Myanmar ထံက်ထ္ၜးလဝ်ရ။
နကဵုအစဳအဇန် ပရေၚ်ပညာကာလအကြာ အလဵုအသဳညဳသၟဟ်ဂကူ NUG မ္ဂး သွက်သၞာံပညာ ၂၀၂၃-၂၀၂၄ တေံဂှ် ဗတောန်ကဵုကွးဘာ ၇၂၇,၈၆၀ တၠတံ နွံရ။ ဆဂး ပ္ဍဲသၞာံပညာလၟုဟ်ဏံမ္ဂး အစဳအဇန်ဗီုလဵု ဖန်ဖက်လဝ် နွံမံၚ်တံဂှ် ဟွံတီကေတ်ဏီပုဟ်။
စပ်ကဵုပရေၚ်ပညာသ္ဇိုၚ်ဂှ် ဗီုလဵုစဳရေၚ်လဝ်နွံမံၚ်ကီုရော ဂွံတီကေတ် မာန် နူကဵုဌာန်ပရိုၚ်သြၚ်လောန်တိုၚ်မ် ဆက်စၠောံသၟာန်လဝ်ကဵု ညးအခေါၚ်ဟီုဂးနွံ ဂကောံအလဵုအသဳညဳသၟဟ်ဂကူ NUG ကီုလေဝ် ကလေၚ်ပရိုၚ် ခၠေဝ်သှ်ဟီုနၚ်လဝ် ညိလေဝ်ဟၟဲဏီပုဟ်။
အတိုၚ်လိက်လလောၚ်တြး ကံၚ်သဳပရေၚ်ပညာ ဍုၚ်တအာၚ် TLEC မ္ဂး ပ္ဍဲသၞာံပညာ ၂၀၂၄-၂၀၂၅ ဂှ် ဗတောန်ကဵုလဝ်ပညာ ကုကွးဘာတံ ကြပ် ၇၀,၀၀၀ တၠနွံရောၚ် သ္ဂးရ။
ဟိုတ်နူဒပ်ပၞာန် ကလေၚ်သီကေတ်လဝ်ဍုၚ်ကီု၊ ပရေၚ်ဗတိုက် ပၞာန်ကျာတံနွံတုဲ ပ္ဍဲသၞာံပညာဏံ ဘာဗတောန်လိက်ကြပ် ၂၀၀ ဒၞာဲ ဒးကၟာတ်လဝ်ဂှ်ရ လၟိဟ်ကၠုၚ်အပ်ဘာ နွံမံၚ်ကြပ်ပွဳပွူ ၅၀,၀၀၀ ရောၚ် ပ္ဍဲလိက်ကၞပ် ပရေၚ်ကံက်တင်နၚ် ISP Myanmar ဂှ် ချူထမံက်လဝ်ရ။
ပရေၚ်ပညာဍုၚ်ဗၟာ သွက်ဂွံကလေၚ်ဒှ် ဗီုအခိၚ်ကၠာဟွံဂွံသီအဝဵုတေံ ဟီုဂှ်တှ်ေ ဆက်ဝါတ်ဂါတ်အာမံၚ်ဏီတုဲ ဟိုတ်နူအကာဲအရာ ပရေၚ်ပိုန်ဒြပ်ဟွံခိုဟ်ကီု ဒးရီုဗၚ်မံၚ်သ္ၚိ၊ ကဵုစရိတ်ဘာဟွံမာန်၊ ဟိုတ်နူပဋိပက္ခပၞာန်တံဒှ်မံၚ်တုဲ ဒးစ္ဍးခြာမံၚ်နူကဵုဘာကီု၊ သွက်ဂွံတိတ်ကၠောန်ကမၠောန် ဍုၚ်သအာၚ်တုဲ ဒးတိတ်အာ နူဘာတံလေဝ် နွံမံၚ်ဗွဲမဂၠိုၚ်ကီုရောၚ်။
မွဲလပါ်ပၠန်ဂှ်လေဝ် နူကဵုအလဵုအသဳပၞာန် အပ္ဍဲသၞာံဘဏ္ဍာ ၂၀၂၆-၂၀၂၇ ဏံ သွက်ကဏ္ဍပရေၚ်ပညာ ဒးသုၚ်စောဲအာ ၆ ဒသမ ၉၂ က္ဍိုပ်ကၠမ်ရောၚ် ဥူမေန်အံၚ်လှိုၚ် ဟီုပတိတ်လဝ်တုဲ ပ္ဍဲသၞာံဘဏ္ဍာ ဂတဏံမ္ဂး ပဵုသုၚ်စောဲအာ ဟွံအောန်နူကဵု ၁၀ က္ဍိုပ်ကၠမ်ရောၚ် သ္ဂးလဝ်ရ။
အပ္ဍဲကဵုလက်ထက် အာယုက်အလဵုအသဳပွိုၚ် ၅ သၞာံ ညးသ္ကိုပ်သ္ကမံၚ်ဏံဂှ် သွက်ဂွံထပဵုပတိုန်အာစဵုကဵုစိုပ် ၂၀ က္ဍိုပ်ကၠမ်ရောၚ် ဟီုလဝ်ကီုလေဝ် သွက်ကဏ္ဍပရေၚ်ပညာ အရာသုၚ်စောဲမံၚ်ပြဟ်ဟ်ဏံမ္ဂး ဗီုကေၚ်သုၚ်စောဲလဝ် သၞာံ ၂၀၂၀-၂၀၂၁ တေံ ၈ က္ဍိုပ်ကၠမ် ဂှ်လေဝ် ဟွံစိုပ်မံၚ်ဏီပုဟ် ISP Myanmar ထံက်ထ္ၜးလဝ်ရ။
ပရိုၚ် – သြၚ်လောန်တိုၚ်မ်
Photo – CJ