မတ်မလီု၊ ဂျောန် ၂၅
အပ္ဍဲကဵုတွဵုရးမန် ကိစ္စပရေၚ်ကၠောန်ဗဒှ် ဝိုၚ်ဝေၚ် ဂိတုတ္ၚဲဇမၠိၚ် ညံၚ်ရဴကဵုလဝ်အခေါၚ်လုပ်သၞောဝ်တံဂှ် သွက်ဂွံကၟာတ်ဆိုအ် တာဒၞာဗဒေါအ်ကဵု ဂလာန်ဗတိုက်ဖအောဝ်ကု ဂကောံအလဵုအသဳ ပၠုပ်ပတိုန်လဝ်ဂှ် အံၚ်ဇၞးအာလဝ်ကီုလေဝ် ပရေၚ်ဝိုၚ်ဝေၚ်တံဏံဂှ် ဆက်ကၠောန်မံၚ်ဖိုဟ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဂလာန်ပၠုပ်လဝ် သွက်ဂွံကၟာတ်ဆိုအ်တာဒၞာ ဗဒေါအ်ထောအ် ဝိုၚ်ဝေၚ်တံဂှ် ညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဒေသဆန္ဒမာဲ လၟိဟ် ၂ ဥူတဇြဝ် ပ္ဍဲကောံဓရီုစၠတ်ထဝ်တွဵုရးမန် ကၠောန်ဗဒှ်လဝ် ဂိတုဂျောန် ၁၆ တုဲကၠုၚ်တေံဂှ် ပတိုန်ထ္ၜးလဝ်ရောၚ်။
ဂလာန်ပၠုပ်လဝ်ဏံဂှ် ပ္ဍဲကောံဓရီုစၠတ်ထဝ်တွဵုရးမန် အလန်တတိယ ကောံဓရီုလၟေၚ်ဍာံ အလန်ဒုတိယ ကၠောန်လဝ် ဂိတုဂျောန် ၁၉ ဂှ် ညးစၞး ၅ တၠ ထံက်ဂလာန်သဳကၠဳတုဲ ပ္ဍဲစၠတ်ထဝ်ဂှ် ညးဒစဵုဒစးဟၟဲ သ္ပဒတန် ဖျေံကၠုၚ်သ္ဂုတ်သွာတ်နွံရ။
ဆဂး အပ္ဍဲစၠတ်ထဝ် ဂလာန်ပၠုပ်လဝ်အံၚ်ဇၞးအာလဝ်ကီုလေဝ် ပရေၚ်ဝိုၚ်ဝေၚ်တံဂှ် ဆက်ကၠောန်အာမံၚ် ပ္ဍဲဗလးတိ အတိုၚ်လၟေၚ် ဓမ္မတာဖိုဟ်ဏီတုဲ ဟိုတ်နူဒှ်မံၚ်အခိၚ်ဥတုဗြဲတုဲ ဝိုၚ်ဝေၚ်တံဂှ် ဆက်ပံက်အာမံၚ် အပ္ဍဲကဵုၝောံခန်ဇၞော်ဇၞော် ဒၞာဲဗြဲကျာလုၚ်ၚ်တံ မဒှ်ရ။
စဵုကဵုအခိၚ်လၟုဟ် ပြဟ်ဟ်ဏံ ဆက်ပံက်အာမံၚ်ဝိုၚ်ဝေၚ်တံနွံတုဲ စၠတ်ထဝ်ဗီုလဵုဟီုဟီု ဂကောံအလဵုအသဳမွဲဂှ် ဟွံကၠောန်ကမၠောန်တုဲ ပရေၚ်ဝိုၚ်ဝေၚ်တံ ညံၚ်ဂွံအိုတ်အာဟီုဂှ် ဂွံဒှ်အာဟွံလောဲပုဟ် ညးဒေသပွိုၚ်ဍုၚ်ၜဳကလေၚ်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“လပါ်ၜဳကလေၚ်ပိုဲဏံ ဆက်ကၠောန်မံၚ်ဖိုဟ်ရ။ စၠတ်ထဝ်ဗီုလဵုဟီုဟီုလေဝ် ဂကောံအလဵုအသဳမွဲဂှ် ကၠောန်ကမၠောန်မှ ဒှ်မာန်ရောၚ်။ ကမၠောန်ဟွံကၠောန်မွဲသာ် ပရေၚ်အုပ်လဒမ်သၞောဝ်ဓဝ်ဥပဒေ ဟွံကၠောန်မ္ဂး ပရေၚ်ဝိုၚ်ဝေၚ်လံၚ်သြန်တံဏံ ညံၚ်ဂွံအိုတ်အာဂှ် ဆၜိုတ်ဂလာန်ပၠုပ်လဝ် အံၚ်ဇၞးအာရနွံရောၚ်။ အလဵုအသဳဟီုဂှ်လေဝ် ဒှ်မံၚ်အလဵုအသဳညးဍုၚ်ကွာန် ရုဲစှ်လဝ်လေဝ် ဟွံသေၚ်။ ဒှ်အလဵုအသဳ ဒပ်ပၞာန်ပါလုပ်မံၚ် မွဲသ္ကုတ်မွဲသ္ကူကီုတုဲ ပရေၚ်ဝိုၚ်ဝေၚ်လံၚ်သြန်ဏံ ညံၚ်ဂွံအိုတ်အာဂှ် ဂွံဆဵုညာတ်အာ ဟွံလောဲပုဟ်”သာ်ဝွံ သ္ဂးရ။
တုဲပၠန် သွက်ပရေၚ်ဝိုၚ်ဝေၚ်လံၚ်သြန်ဏံ ဂွံအိုတ်အာဟီုမ္ဂး ညးကေတ်လဝ်အကံက် ကဵုလဝ်အခေါၚ်ပံက်တံဂှ်လေဝ် ဒးကေတ်အာအရေဝ်ချိုတ်တ်ပၠိုတ်တ်တုဲ ဆၜိုတ်ပတိုန်ထ္ၜးဂလာန် အပ္ဍဲစၠတ်ထဝ်ဂှ် ညံၚ်ဝိုၚ်ဝေၚ်တံဏံ ဂွံအိုတ်အာ ဒှ်ဟွံမာန်ပုဟ် သာ်ဝွံ ညးဆက်ဟီုရ။
အတိုၚ်ဌာန်ပရိုၚ် သြၚ်လောန်တိုၚ်မ် ဂၠိုက်ဂၠာဲသၟာန်သၟုက်ဂွံလဝ်တံမ္ဂး ပ္ဍဲကဵုတွဵုရးမန် သီုအလုံ ၁၀ ပွိုၚ်ဍုၚ်တံဂှ် ဆက်ကၠောန်အာမံၚ် ပရေၚ်ဝိုၚ်ဝေၚ်လံၚ်သြန်တံဖအိုတ်ဖိုဟ်တုဲ အပ္ဍဲဍုၚ်ဇၞော် ဍုၚ်မတ်မလီု အဝဵုအာဏာစက် အလဵုအသဳပၞာန် ပဵုနွံဂၠိုၚ်မံၚ်ဂှ်လေဝ် ဆက်ပံက်အာလဝ် ရုၚ်ဝိုင်ဝေၚ်လံၚ်သြန်တံ နွံမံၚ်ဖိုဟ်ရောၚ်။
ဂလာန်ပၠုပ်လဝ် သွက်ဂွံကၟာတ်ဝိုၚ်ဝေၚ်လံၚ်သြန်ဂှ် အံၚ်ဇၞးအာ ကီုလေဝ် ဆက်ကၠောန်မံၚ်ဖိုဟ်တုဲ ပရေၚ်ဒုစရိုတ်တံဏံ က္တဵုဒှ်ကၠုၚ် နူကဵုဝိုၚ်ဝေၚ်လံၚ်သြန် ဟီုကီုလေဝ် ဝိုၚ်ဝေၚ်တံဏံအိုတ်အာမာန် ဟွံထေၚ်ပုဟ် ညးဒေသပွိုၚ်ဍုၚ်မုဟ်ဍုၚ် မွဲတၠလေဝ် ဟီုကဵု ဌာန်ပရိုၚ် သြၚ်လောန်တိုၚ်မ်ရ။
“ဝိုၚ်ဝေၚ်လံၚ်သြန်တံ၊ ဝိုၚ်အာဝါဒေဝ်တံ ပ္ဍဲမုဟ်ဍုၚ်ပိုဲမ္ဂး စဵုကဵုလၟုဟ် ဆက်နွံမံၚ်ဖိုဟ်ရ။ ပရေၚ်ပၠံၚ်ၜး၊ ပရေၚ်ကမၠတ်၊ ပရေၚ်ဒုစရိုတ် ဗွဲမဂၠိုၚ်တံ က္တဵုဒှ်ကၠုၚ် နူကဵုဝိုၚ်ဝေၚ်လံၚ်သြန်တံဏံတုဲ အတိုၚ်လညာတ်အဲမ္ဂး ဂွံအိုတ်အာဂှ် ဒှ်မာန်ဟာ၊ သ္ပလဝ်ဒတန်ကီုလေဝ် ညံၚ်ဂွံအိုတ်အာဂှ် ဒှ်ဟွံမာန်ပုဟ် အဲထေၚ်ရ” သာ်ဝွံ သ္ဂးရ။
ညံၚ်ဝိုၚ်ဝေၚ်လံၚ်သြန်တံဏံ ညံၚ်ဂွံအိုတ်အးအာအပ္ဍဲဒေသကီု ပရေၚ်ရပ်စပ်ကေတ်အရေဝ်တံ ညံၚ်ဂွံသၠုၚ်ပတိုန်အသိၚ်ဂှ် ပ္ဍဲကဵုကောံဓရီုဂကောံအလဵုအသဳ သ္ဂုတ်သွာတ်လဝ်တုဲတုဲရရောၚ် ဝန်ဇၞော်ပရေၚ်မၞိဟ် ဂကောံအလဵုအသဳတွဵုရးမန် ဥူတေန်ဇြဝ်ထောန် ဟီုရ။
တုဲပၠန် ညးတာလျိုၚ်အဆံၚ်ၚ်တံ ညံၚ်ဂွံထိၚ်ကြာပ်ရပ်စပ်အာ ပရေၚ်ဝိုၚ်ဝေၚ်တံဏံကီု ၊ ဝိုၚ်ဝေၚ်လံၚ်သြန် ညံၚ်ဂွံယအ်စှ်ေကီု ညံၚ်ဂွံအိုတ်ကၠေံအာတုဲ ညံၚ်ဟွံဂွံကလေၚ်ဒှ်ကၠုၚ်ပၠန်ဂှ် ဗက်ဂၠာဲနဲကဲနာနာတုဲ ဆက်ကၠောန်အာရောၚ် ကဵုလဝ်ဂလာန်ကတိ ပ္ဍဲကဵုစၠတ်ထဝ်နွံရ။
စပ်ကဵုပရေၚ်ကိစ္စ သွက်ဂွံကၟာတ်ထောံဝိုၚ်ဝေၚ်တံဂှ် ပ္ဍဲစၠတ်ထဝ် တွဵုရးမန် ပၠုပ်လဝ်ဂလာန်ဂှ် အံၚ်ဇၞးလဝ်ကီုလေဝ် လ္တူဂကောံအလဵုအသဳတွဵုရးမန်တံ ဟွံထမံက်အာမံၚ်ရုပ်ရဴ ပရေၚ်ကမၠောန်ဂှ် ညးဍုၚ်ကွာန်တံပါ်ပါဲမံၚ်နွံတုဲ စပ်ကဵုအခန် ပရေၚ်ကဏ္ဍစၠတ်ထဝ်ဂှ်လေဝ် သၟာန်သၟုက်မံၚ်အိုတ်ရ။
ပရေၚ်ဝိုၚ်ဝေၚ် တွဵုရးမန်ဂှ် ပ္ဍဲကဵုလက်ထက်အလဵုအသဳ သ္ကိုပ်ဝန်ဇၞော်တြေံ ဥူအံၚ်ကျဳတိၚ် နူညးဒှ်လဝ် ဥက္ကဌကံၚ်သဳပၞာန် တွဵုရး အခိၚ်ကၠာတေံဂှ် ညံၚ်ရဴပရေၚ်လုပ်သၞောဝ်မွဲ ကဵုအခေါၚ် ပံက်လဝ် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ