ဘာအၚ်၊ ဂျောန် ၂၆
ညးကၠုၚ်ဝေၚ်လ္တူဒဵုဇြဲၜၚ် ဍုၚ်ဘာအၚ် တွဵုရးကရေၚ်တံ ယဝ်ရ ကၠဟ်ထၟိက်ဟၟဲကဵုစေဝ်ပၞောန်မ္ဂး ကေတ်အာအရေဝ်ပိုတ်တ်ရောၚ် နူကဵုဌာနပရေၚ်အုပ်ဓုပ်ပွိုၚ်ဍုၚ် လလောၚ်ပတိတ်လဝ်အမိၚ်ရ။
နူကဵုသ္ကိုပ်ပရေၚ်အုပ်ဓုပ် ဌာနပရေၚ်အုပ်ဓုပ်နာနာပွိုၚ်ဍုၚ်ဘာအၚ် ဂကောံအလဵုအသဳ တွဵုရးကရေၚ် လလောၚ်ပတိတ်ဏာအမိၚ်ဒေသန္တ ပ္ဍဲကဵုဂိတုဂျောန် ၂၃ ဂှ်ရောၚ်။
ဒၞာဲဒေသအာတရဴ တွဵုရးကရေၚ် ဒဵုဇြဲၜၚ်ဝွံ ဒှ်ဒၞာဲဒဵုဝင် ဒယှ်ပြာကတ် နဒဒှ်စၟတ်သမ္တီလက်သန်တွဵုရး ညးတံမွဲတုဲ ရဲအာတရဴဗွဲမဂၠိုၚ် ကၠုၚ်ဝေၚ်မံၚ်ဟွံပိုတ်ကီုရောၚ်။
ဟိုတ်နူကဵု ပရေၚ်ကၠဟ်ထၟိက်ဟၟဲကဵုစေဝ်ပၞောန် အကြာပွဳဗွိုၚ် ဒဵုဇြဲၜၚ်တံဂှ်ရ ဒှ်ကၠုၚ်ကဵုတင်ယုတ်ဒေက် သွက်ပရေၚ်သာယာကျေဝ်ဂေါဝ် ဒေသအာတရဴတံမာန်တုဲ နူကဵုဌာနညးတာလျိုၚ်တံကဵု ဂကောံ စွံလဝ်ထိုၚ်ထၟိက်တံ အတိုၚ်မွဲဒမြိပ်ဂၠံၚ်တိုန်စှ်ေ ဒဵုဇြဲၜၚ်တံဂှ် ပရေၚ်ကၠဟ်ထောံထၟိက် သွက်ဂွံနွံကဵုသၞောတ်စှ်ေစှ်ေဂှ် စွံကဵုလဝ်ထိုၚ်ကၠဟ်ထၟိက်တံတုဲ နကဵုစောဝ်ပၞောန်တံဂှ် ဒးဒဂေတ်ဗက်ကၠောန်အာရောၚ် သ္ဂးလဝ်ရ။
ယြဴညးလဵုမွဲဟွံဟီု အာဝေၚ်တရဴပရေဝ်လၟောၚ် တိုန်လ္တူဒဵုဇြဲၜၚ်မ္ဂး ညံၚ်ဂွံကၠဟ်ထောံထၟိက် နွံကဵုစေဝ်ပၞောန် ဒၞာဲစၟတ်ပိုၚ်ခြာလဝ်တံကီု ညံၚ်ဟွံဂွံကၠဟ်ထောံလဝ်ထၟိက်ပြးဇး ဟၟဲကဵုစေဝ်ပၞောန်တံ ညးညးအဲအဲတံ ဒ္ဂေတ်ဗက်အာအိုတ်ညိဂှ် သ္ကိုပ်ပရေၚ်အုပ်ဓုပ် ပွိုၚ်ဍုၚ်ဘာအၚ် ပတိတ်လလောၚ်လဝ်အမိၚ်ရ။
ယဝ်ရ ဂွံဆဵုညာတ်ကေတ် ပရေၚ်ကၠဟ်ထၟိက် ဟၟဲကဵုစေဝ်ပၞောန်မ္ဂး ညးကလိလောန်ကၠောန်လဝ်ဂှ် ဒးဒုၚ်တပ်ဒဏ် သြန် ၅၀၀၀၀ ဒကေဝ်တုဲ သြန်တပ်ဒဏ်ကဝက်ဂှ် ဖျေံကဵုလာပ် သွက်လိင်မတ်မၞိဟ်ဂှ် ကဵုအာတုဲ ရပ်ထ္ၜးကဵုသက်သဳမာန်ဂှ်ကီု နူကဵုသြန်သှ်ေတံမ္ဂး စွံအာသြန်ဂအုံ ဂကောံစဳရေၚ်ပ္ညဳပ္ညပ် ဒေသအာတရဴ (DMO) ရောၚ် ပ္ဍဲလိက်လလောၚ်တြးဂှ် ချူထမံက်လဝ်ရ။
ယြဴပူဂဵုညးလဵုမွဲဟွံဟီု ဟွံဒ္ဂေတ်ဗက်မ္ဂး နကဵုၝောံပိုဒ် ရာဇသာဒ်ဇၞော် ၁၈၈ ကီု၊ နကဵုဥပဒေတန်တဴမံၚ်မွဲမွဲကီု ကေတ်အာအရေဝ် ပိုတ်တ်ရောၚ် သ္ကိုပ်ပရေၚ်အုပ်ဓုပ် ပွိုၚ်ဍုၚ်ဘာအၚ် လလောၚ်ပတိတ်ဏာလဝ် အမိၚ်ရ။
သွက်ဒဵုဇြဲၜၚ် ဂွံသ္အးဇ္ၚး သာယာကျေဝ်ဂေါဝ်အာတုဲ ပ္ဍဲဂိတုဂျောန် ၁၃ တုဲကၠုၚ်တေံ နူကဵုဂကောံအလဵုအသဳ တွဵုရးကရေၚ်ကဵု ဌာနနာနာတံကီု၊ ဂကောံရီုဗၚ်ပရေၚ်မၞိဟ်နာနာ လၟိဟ်မၞိဟ် ၄၀၀ ပြၚ်ၚ် ကၠောန်ဗဒှ်ဖန်ဖက်လဝ် ကၚ်ပိၚ် ဗက်ကပှ်ထၟိက်လ္တူ ဒဵုဇြဲၜၚ်ရ။
ပရိုၚ် – သြၚ်လောန်တိုၚ်မ်
Photo – CJ