ဝါယှေန်တာန်၊ ဂျောန် ၂၅
စပ်ကဵု သမ္မတအမေရိကာန် ဒဝ်နေဝ်ထရ ဖန်ဖက်မံၚ် ပရေၚ်ပေါဲပၞာန်အဳရာန်တုဲ ကန်ဂရက်အမေရိကာန် ဖျေံဏာလဝ် သ္ဂုတ်သွာတ် လုပ်ဝင်မွဲရ။
ပ္ဍဲဂျောန် ၂၄ ဂှ် စၠတ်ထဝ်လ္တူ အမေရိကာန် ဗော်ရဳပါတ်ဘလဳကာန်တံ ထိၚ်ဒဝ်လဝ်ဗွဲမဂၠိုၚ်ဂှ် သွက်ထရ ဂွံဒေါအ်ထောံ ပေါဲပၞာန်အဳရာန် ဟွံသေၚ်မ္ဂး ယဝ်ရမိက်ဂွံဆက်ကၠောန် ပရေၚ်လဝေၚ်ပၞာန်မ္ဂး ဒးကေတ်အခေါၚ် နူစၠတ်ထဝ်ကန်ဂရက်ကၠာရောၚ် ဂလာန်ပတိုန်ထ္ၜး အာတ်မိက်လဝ်ဂှ် သ္ပလဝ်ဒတန် နကဵုမာဲရ။
ပ္ဍဲအရာပါ်လဝ်မာဲဂှ် ဂွံလဝ်မာဲထံက်ဂလာန် ၅၀၊ မာဲဒစဵုဒစး ၄၈ မာဲ ရောၚ်။
အမာတ်စၠတ်ထဝ် ဗော်ရဳပါတ်ဘလဳကာန် လ္ၚဵုတံလေဝ် ပံၚ်တောဲလဝ်ကဵု ဗော်ဒီမိုကရက်တေတ်တုဲ ကဵုလဝ်မာဲထံက်ဂလာန်အိုတ်ရ။
ဂလာန်ပတိုန်ထ္ၜးဏံဂှ် စၠတ်ထဝ်သၟဝ်လေဝ် ပ္ဍဲအဒေါဝ်ဂိတုပြဟ်ဟ်ဏံ သ္ပလဝ်ဒတန်တုဲဒှ်မံၚ်ကီုရ။
ဆဂး တင်သ္ဂုတ်သွာတ်ဏံဝွံ ဟွံသေၚ်ကဵုဥပဒေ ဒးဒုၚ်ဒ္ဂေတ်ဗက်အာအတေၚ်အဓ္ဓမတုဲ ဒှ်ဆၜိုတ်သ္ဂုတ်သွာတ် နဒဒှ်သင်္ကေတ ထမံက်ထ္ၜးလစွံစိုတ် ကန်ဂရက်စၠတ်ထဝ်ဟေၚ်တုဲ ပလံၚ်ဗ္စိုပ်ကဵုသမ္မတ သွက်ဂွံထ္ပက်စၟတ်တဲဟွံသေၚ်တုဲ သြဇာဥပဒေလေဝ်ဇီုကပိုက်ဟၟဲပုဟ် ဂွံတီကေတ်ရ။
ထရဂှ် ပါ်ပါဲလဝ်တင်သ္ဂုတ်သွာတ်ဏံ ဇၞော်ကဵုဇြဟတ်တုဲ “ဒှ်ပရေၚ်ပါ်မာဲ ဟၟဲကဵုအဓိပ္ပါယ် ဟွံကိတ်ညဳကဵုအခိၚ်” ဟီုလဝ် ရ။
ထရ ဟီု “အခိၚ်ကြပ်မံၚ်ကဵု သွက်ဂွံဍိုက်ဇြဟတ်ဟရိုဟ်ကဵု အဳရာန်ဂှ် စၠတ်ထဝ်လ္တူ ကၠောန်ဗဒှ်ပရေၚ်ပါ်မာဲသာ်ဏံဂှ် ပခက်ကမၠောန်အဲ ပဵုညံၚ်ဂွံဝါတ်ဂါတ်အာရ။ ဆဂး သာ်လဵုဒှ်ဒှ် ညံၚ်ဂွံတုဲဒှ် အဲကၠောန်ကဵုရောၚ်” သာ်ဝွံ ချူလဝ်ပ္ဍဲဇာဖိုၚ်မှာဇန် Truth Social ရ။
ကြဴနူသၞောဝ်ဥပဒေ War Powers Resolution သၞာံ ၁၉၇၃ ချူခၞံပတိတ်လဝ်တုဲ သွက်ဂွံဗဒေါအ်အာ ပရေၚ်ချဳဒရာၚ်ပၞာန် ကုသမ္မတမွဲတၠ ပွမအာတ်မိက်သ္ပဒတန် နူစၠတ်ထဝ်သီုၜါဂှ် အလန်ဏံ ဒှ်အလန်ကၠာအိုတ်ရ။
သ္ဂုတ်သွာတ်ဏံဂှ် နကဵုဥပဒေထိၚ်ဒဝ်ဟွံမာန်ကီုလေဝ် လတူပေါဲပၞာန်ဏံ ပရေၚ်ဟွံပေၚ်စိုတ် ညးဍုၚ်ကွာန်အမေရိကာန်တံ ထမံက်ထ္ၜးမံၚ်ရောၚ် သာ်ဝွံ ညးလ္ၚတ်ပရေၚ်ဍုၚ်ကွာန်တံ သ္ၚဳဂၠိပ်လဝ်အိုတ်ရ။
ပဋိပက္ခက္တဵုဒှ်မံၚ်ကဵု အဳရာန်ဂှ် ကြပ်ပေၚ် ၅ ဂိတုတုဲ ဟိုတ်နူၚုဟ်မးကၠေၚ်ဍေၚ်တံ တိုန်မံၚ်ဂှ် ပ္ဍဲအကြာညးဍုၚ်ကွာန်တံ ဒှ်ကၠုၚ်ပေါဲပၞာန်ပရေၚ်မၞိဟ်ဟွံပေၚ်စိုတ် မွဲကီုရ။
ပြဟ်ဟ်ဏံမ္ဂး အမေရိကာန် ကဵု အဳရာန်တံ ဆက်ထိၚ်ဒဝ်မံၚ် ပရေၚ်ဒေါအ်ပန်ပှော် တုပ်လဝ်စိုတ် ပ္ဍဲအေဗရာ ၇ တေံတုဲ အတိုၚ်လိက်တုပ်စိုတ် (MoU) သမ္မတၜါဍုၚ် ထ္ပက်လဝ်စၟတ်တဲ အပ္ဍဲသတ္တဟတုဲကၠုၚ်တေံဂှ် သွက်ဂွံဂွံတၚ်တုပ်စိုတ် ညံၚ်ဂွံသရောပ်ကၟာတ်ကၠေံထောံပေါဲပၞာန်ဂှ် သဳကၠဳမံၚ်အိုတ်ရ။
အတိုၚ်တၚ်တုပ်စိုတ်ဏံမ္ဂး အမေရိကာန် ကဵု အဳရာန်တံ သွက်ဂွံဂွံတၚ်တုပ်စိုတ် ဗွဲမလှဲလး သီုအရာဂွံကၟာတ်အာ ကိုန်အစဳဇန်နျူကလဳယျာအဳရာန်တံဂှ် ဂွံလဝ်အခိၚ်ပွိုၚ် ၆၀ တ္ၚဲရောၚ် ဂွံတီကေတ်ရ။
Ref:BBC