ကွာလာလမ်ပူ၊ ဂျောန် ၂၆
မလေယှာဂှ် ဟွံသ္ပလဝ်စၟတ်သမ္တီ အလဵုအသဳတိုန်ကၠုၚ် နူကဵုပေါဲရုဲမာဲဍုၚ်ဗၟာ ပြဟ်ဟ်ဏံရောၚ် ဝန်ဇၞော်ပရေၚ်ဍုၚ်သအာၚ် မလေယှာ မဝ်ဟာမက် ဟာသာန် ဟီုဏာရ။
တုဲကၠုၚ်တေံ ဟိုတ်နူညးအာလဝ်နေပျဳဒဝ် ဆဵုဂဗလဝ်ကဵု ဝန်ဇၞော်ပရေၚ်ဍုၚ်သအာၚ်ဗၟာ ဥူတာန်သွိုယ်တုဲ မလေယှာ သ္ပဏာစၟတ်သမ္တီ ကံၚ်သဳပၞာန်ရဟာ သာ်ဝွံ တၚ်သၟာန်တံဏံ မံက်တိုန်ကၠုၚ်ရ။
ဆဂး ဝန်ဇၞော် ဟာသာန် ဂှ် ညးတံ ဟွံသ္ပလဝ်စၟတ်သမ္တီဏီ ဟိုတ်နူဟွံသ္ပလဝ်စၟတ်သမ္တီဂှ် လ္တူညးတံ နူလပါ်မလေယှာ ဟွံကော် အလဵုအသဳဏီပုဟ် သာ်ဝွံ ဂျောန် ၂၅ တေံဂှ် ဟီုလဴကဵုလဝ် ပ္ဍဲစၠတ်ထဝ်ရ။
လၟေၚ်တရဴဍုၚ်ဗၟာညးဂှ် သွက်ဂွံအာထံက်ဂလာန် အလဵုအသဳပၞာန် ဟွံသေၚ်၊ သွက်ဂွံသဳကၠဳ ပရေၚ်ထမံက်ရုပ်ရဴ တၚ်တုပ်စိုတ်ဘုံ ၅ တၚ် အာသဳယာန်ရောၚ် သ္ဂးရ။
အပ္ဍဲပရေၚ်သဳကၠဳတံမ္ဂး ပရေၚ်ဍုၚ်ကွာန်ဍုၚ်ဗၟာ ညံၚ်ဂွံညိၚ်ဝပ်အာ၊ ပေါဲသဳကၠဳပရေၚ်ဍုၚ်ကွာန် သီုညးဖအိုတ်တံ ညံၚ်ဂွံပါလုပ်အာမာန်၊ ပရေၚ်ညဳသၟဟ်ကောန်ဂကူ၊ ကိစ္စကောန်ထံၚ်ပရေၚ်ဍုၚ်ကွာန်၊ ပြသၞာရဲဒဒိုက်ရိုဟေန်ဂျာ ကေုာံ ပရေၚ်ဗတိုက်ပလီုလီသြန်အန်လာၚ်တံ ပါလဝ်ရောၚ် ဟီုရ။
တုဲပၠန် နူလပါ်မလေယှာ သွက်ဍုၚ်ဗၟာ ကဵုဏာသွဟ်ပရေၚ်ဍုၚ်ကွာန်ဍာ်ဇမၠိၚ်မွဲဂှ် ပံက်ကဵုအခေါၚ် သၞောတ်ပရေၚ်အုပ်ဓုပ်ဇကုဇကုဂၠိုၚ်ၚ် ကေုာံ သ္ကုတ်သၞောတ်ဖိတ်ဒရေဝ်လ္ၚဵုတံ ညံၚ်ဂွံချပ်အာဂှ်လေဝ် ကဵုလဝ်ကသပ်ကီုရောၚ် ဂွံတီကေတ်ရ။
သွက်ဂွံစွံပသှ်ေလဝ် ဍုၚ်ဗၟာက္ဍိုပ်မွဲမဓဝ်ဂှ် အာသဳယာန် ဒုၚ်ဒှ်ဟွံမာန်တုဲ ယဝ်ရကၠောန်ဗဒှ်အာသာ်ဂှ်မ္ဂး သြဇာဍုၚ်ဇြဟတ်ဇၞော်ဇၞော် နူမ္ၚးတံ သွက်ဂွံလုပ်အုပ်ဓလီုဂှ် ပဵုဂွံအာအခေါၚ်အရာ ဂၠိုၚ်အာမာန်ရောၚ် ဝန်ဇၞော် ဟာသာန် သ္ဂးရ။
လတူအလဵုအသဳပၞာန်ဗၟာဂှ် ပြဟ်ဟ်ဏံ မလေယှာ ဟွံသ္ပစၟတ်သမ္တီဗွဲမလုပ်သၞောဝ်ဏီပုဟ် သာ်ဝွံ ဟီုလဝ်သောင်သောင်ကလးကလးကီုလေဝ် သွက်ပရေၚ်ဓဝ်ၜိုဟ်လလမ် အာသဳယာန်ဂစာန်မံၚ်တံဂှ် ဆက်စၠောံသဳကၠဳမံၚ်ဖိုဟ်ရောၚ် အကာဲအရာတံနွံမံၚ်ရ။
Ref:NST