မတ်မလီု၊ ဂျောန် ၂၆
တရဴကွဳပၟတ် အာစဴပွိုၚ်မွဲတ္ၚဲ လ္ဂုၚ်-မတ်မလီု၊ မတ်မလီု-လ္ဂုၚ် ကွဳပၟတ်မြက် မၞိဟ်ဍိုက် DEMU ခေတ်တၟိ သီုကဵု စက်ကျာဂံက်ပါမံၚ်ဂှ် ဂိတုဂျူလာၚ် ၁ ဏံမ္ဂး စဂြိပ်အာရောၚ် ပ္ဍဲဂိတုဂျောန် ၂၅ ဂှ် နူကဵုဂကောံအလဵုအသဳ ကဵုသမ္တီလလောၚ်တြးလဝ်ရ။
ကွဳပၟတ်မြက်မၞိဟ်ဍိုက် DEMU ခေတ်တၟိ စက်ကျာဂံက်ပါမံၚ်ဏံဂှ် ပ္ဍဲကဵုလၟေၚ်တရဴကွဳပၟတ် လ္ဂုၚ်-နေပျဳဒဝ် ကေုာံ လ္ဂုၚ်-မာန္တလေဝ်တံဂှ် ဂြိပ်မံၚ်နွံတုဲ ဟိုတ်နူရဲအာတရဴတံဒးစိုတ် ညးဍိုက်တိုန်ဂၠိုၚ်တုဲ အပ္ဍဲလၟေၚ်တရဴ လ္ဂုၚ်-မတ်မလီုဂှ် သၠုၚ်ပတိုန်အစဳဇန် စဂြိပ်ကဵုအာရောၚ် သ္ဂးရ။
ကွဳပၟတ်မြက်မၞိဟ်ဍိုက် DEMU လၟေၚ်တရဴ လပါ်တိုန် စၟတ် ၈၃ ဂှ်တှ်ေ အခိၚ်နူဂယး ၅ နာဍဳဂှ် စတိတ်နူလ္ဂုၚ်တုဲ စိုပ်မတ်မလီု အခိၚ်နူဂယး ၁၁ နာဍဳရ၊ လၟေၚ်တရဴ လပါ်စှ်ေ စၟတ် ၈၄ ဂှ် စတိတ်နူကဵုမတ်မလီု အခိၚ်လဒေါဝ်တ္ၚဲ ၁၂ နာဍဳတုဲ စိုပ်လ္ဂုၚ် သဝ်တ္ၚဲ ၆ နာဍဳရောၚ်။
အပ္ဍဲကဵုကွဳပၟတ် DEMU ခေတ်တၟိ သီုကဵုစက်ဟဂံက်ကျာပါမံၚ်ဏံဂှ် လၟေၚ်တရဴလပါ်တိုန် စၟတ် ၈၃၊ လၟေၚ်တရဴလပါ်စှ်ေ စၟတ် ၈၄ စဂြိပ်အာဏံမ္ဂး တောဲအဆံၚ်သၠုၚ် ၂ တောဲ၊ တောဲအဆံၚ်တန်ပထမ ၄ တောဲပါမံၚ်တုဲ ပ္ဍဲကဵုတောဲအဆံၚ်သၠုၚ်ဂှ် မၞိဟ် ၇၂ တၠ ကေုာံ ပ္ဍဲတောဲအဆံၚ်တန်ပထမဂှ် မၞိဟ် ၂၄၀ တၠ၊ အပံၚ်သီုဖအိုတ် မၞိဟ် ၃၁၂ တၠတံ ဍိုက်ဗက်အာမာန်ရ။
ၚုဟ်မးစၟတ်တဲ သွက်တောဲကဆံၚ်သၠုၚ် တရဴစနူကဵုတမ် စဵုစိုပ်ကၞောတ်ဂှ် ၂၂၀၀၀ ဒကေဝ်၊ သွက်အဆံၚ်တန်ပထမဂှ် ၁၆၀၀၀ ဒကေဝ်တုဲ လၟေၚ်မွဲဒမြိပ်တရဴမ္ဂး ဒေါအ်အာကဵု သၞေဟ်ကွဳပၟတ် တိုဝ်ကျံင်ကလေဝ်၊ ဗဂေါ၊ တိၚ်ဇယာတ်၊ ကျာ်ထဝ်၊ ဍုၚ်သဓီုကဵု ဍုၚ်ပံၚ်တံတုဲ အခိၚ်စဂြိပ်အာ စနူတမ်စဵုကဵုကၞောတ်တရဴမ္ဂး လံအခိၚ်ၜိုတ်ပွိုၚ် ၆ နာဍဳတုဲ တရဴအာကလေၚ် ပွိုၚ်မွဲတ္ၚဲ စိုပ်အာမာန်ရောၚ်။
သွက်လၟေၚ်တရဴ ကွဳပၟတ် DEMU ခေတ်တၟိ လၟေၚ်တရဴလပါ်တိုန်ဂှ် စၟတ် ၈၃၊ လၟေၚ်တရဴလပါ်စှ်ေ စၟတ် ၈၄ စဂြိပ်အာပြဟ်ဟ်ဏံမ္ဂး ဗကန်ရာန်ကေတ်စၟတ်တဲ နကဵုသၞောတ် Online Railways Ticketing and Payment System (ORTP) မာန်တုဲ သွက်လၟေၚ်တရဴ စနူတမ်စိုပ်ကၞောတ်မ္ဂး နူကဵုပွိုၚ် ၇ တ္ၚဲဂှ် ဒစးဒုၚ်ရာန်ကေတ်လဝ်မာန်တုဲ သွက်စၟတ်တဲ သၞေဟ်ကွဳပၟဟ်အကြာတံမ္ဂး နူကဵုပွိုၚ် ၅ တ္ၚဲ ဒးစးဒုၚ် ဒးရာန်ကေတ်လဝ်မာန်ရောၚ် ကဵုလဝ်သမ္တီနွံရ။
ပရိုၚ် – သြၚ်လောန်တိုၚ်မ်
Photo – Social Media