မတ်မလီု၊ ဂျောန် ၂၆
အပ္ဍဲတွဵုရးမန် ဍုၚ်မတ်မလီု သၟတ်စိုပ်မံၚ်အဝဲယိုက်ဝန်ပၞာန်တံ သွက်ဂွံပတိုန်စရၚ်ယၟုမၞိဟ်တံဂှ် ဗက်ပလံၚ်ဗ္စိုပ်မံၚ် လိက်ရုၚ်ကော်ရောၚ် ရဲလ္တူဍုၚ်မတ်မလီုတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
သၟတ်လုပ်အဝေါၚ် ညးစိုပ်မံၚ်အဝဲယိုက်ဝန်ပၞာန်တံဂှ် စနူပွိုၚ်ၜိုတ်ၜါပိတ္ၚဲတုဲကၠုၚ်တေံဂှ်ရ နူကဵုသ္ကိုပ်ပရေၚ်အုပ်ဓုပ်အရာပ် ကွာန်ဆေၚ်စပ်တံမွဲအဆံၚ်ဂှ် ဗက်ပလံၚ်ဗ္စိုပ်မံၚ် လိက်ရုၚ်ကော်တံဂှ် ဂွံဆဵုကေတ်ရ။
သွက်ဂွံပၠုပ်စရၚ်ယၟု ရဲဒးယိုက်ဝန်ပၞာန် ရဲဂွံလဝ်လိက်ရုၚ်ကော်လဝ်တံမ္ဂး ဂိတုဂျောန် ၂၅ ဏံ စွံလက်ကရဴအိုတ်တုဲ ညိဟွံဂွံယောၚ်ယာ ညံၚ်ဂွံကၠုၚ်ပလံၚ်ပရိုၚ် ဗိုန်န်ညိဂှ် စၞောန်ပ္ညုၚ်လဝ်နွံတုဲ ယဝ်ရ ဆောတ်ယောၚ်အာမ္ဂး ကေတ်အရေဝ် နကဵုဥပဒေယိုက်ဝန်ပၞာန်ညးဍုၚ်ကွာန်ရောၚ် ကဵုလဝ်သတိနွံရ။
ညးဒးဒုၚ်ကော်လဝ်ယိုက်ဝန်ပၞာန် အတိုၚ်လိက်တၞးဗီုပြၚ် (၂)တံဂှ် ဒးအာပတိုန်စရၚ်ယၟုမၞိဟ်ကၠာတုဲ ဒဒှ်ရ ယိုက်အာဝန်ပၞာန်ဍာံဍာံရောၚ်ဂှ် ဒးထ္ပက်စၟတ်တဲ ပ္ဍဲကဵုတၞးလိက်ဗီုပြၚ် (၃-က) မဒှ်ရ။
ဟိုတ်နူဒးဒုၚ်ကော်လဝ် ပရေၚ်ယိုက်ဝန်ပၞာန်တုဲ သၟတ်လ္ၚဵုတံ အခိၚ်သွက်ဂွံပတိုန်လိက်အာတ်မိက် အခေါၚ်ဗၠးနူယိုက်ဝန်ပၞာန်တံ ဟွံဂတာပ်တုဲ ဂွိၚ်ဖေက်ဒးဒုၚ်ပကောံလုပ်အာပၞာန်ပြဟ်ဟ်တုဲ သၟတ်လ္ၚဵု ဒးဒုၚ်ကော်လဝ်တံ ဂြိပ်ပါဲဓလေတ်နွံမံၚ်ရောၚ် ရဲလ္တူဍုၚ်တံ သ္ဂးရ။
ပ္ဍဲဂိတုမေတုဲကၠုၚ်တေံဂှ် ညံၚ်ဂွံပကောံလဝ်စရၚ်မၞိဟ် သၟတ်လုပ်အဝေါၚ် စိုပ်အဝဲယိုက်ဝန်ပၞာန်တံတုဲ သွက်ဂွံကော်အာနကဵုသၞောတ်လၟေၚ် အလန်ညးကဵုညးမာန်ဂှ် ပတိုန်လဝ်စရၚ်ယၟုမၞိဟ်ညိ နူကဵုဂကောံအလဵုအသဳ ဌာနဝန်ဇၞော်ပရေၚ်စဵုဒၞာ သ္ကိုပ်ပၞာန်ဇၞော်ထောန်အံၚ် စၞောန်ပ္ညုၚ်လဝ်နွံရ။
ဟိုတ်ဂှ်ရ သွက်ဂွံဂွံတၚ်နၚ် ဇြဟတ်ယိုက်ဝန်ပၞာန်ဍာံဍာံဂှ် နူကဵုကံၚ်သဳနေပျဳဒဝ်၊ ရး/တွဵုရးတံဂှ် ညံၚ်ဂွံပံၚ်တောဲအာကဵု ဌာနလဝက ဆေၚ်စပ်တုဲ ပ္ဍဲတိဍာ်ဇကု သၟတ်လုပ်အဝေါၚ်စိုပ်အဝဲတံ နွံမံၚ်ၜိုတ်လဵုမာန်ဂှ် ညံၚ်ဂွံပကောံလဝ်စရၚ်တုဲပတိုန်ယၟုညိဂှ် စၞောန်ပ္ညုၚ်လဝ်ရောၚ်။
ပ္ဍဲလက်ထက်ကံၚ်သဳပၞာန်ကဵု ကဝ်မယှေန်ပၞာန်တံမ္ဂး သွက်ဂွံယိုက်ဝန်ပၞာန်ဂှ် ပကောံကၠုၚ်လဝ် နကဵုဂၠံက်ကေတ်မာဲကီု၊ ရပ်ကေတ်အတေၚ်အဓ္ဓမကီု၊ တံၚ်ရပ်ပဝ်တာ၊ ဖံက်ပကဝ်ပလီုအမိၚ် ဒေသန္တရဂးတုဲ ကဵုလုပ်ယိုက်ဝန်ပၞာန်၊ လိၚ်ကေတ်မၞိဟ်တံကီု ကၠောန်လဝ်နွံရောၚ်။
ပြဟ်ဟ်ဏံ သ္ကိုပ်ပၞာန်ဗွဲမဂၠိုၚ်တံပကောံတုဲ ဒက်ပတန်လဝ်ဗီုပြၚ်အလဵုအသဳဂှ် နကဵုသၞောတ်လၟေၚ်အလန် ညးကဵုညး ညံၚ်ဂွံကော်ကေတ် သၟတ်စိုပ်အဝဲယိုက်ဝန်ပၞာန်တံမာန်ဂှ်ဂစာန်တုဲ ကဵုပၠုပ်မံၚ်စရၚ် ပတိုန်လဝ်ယၟုရောၚ်။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ်ပကောံဂွံလဝ်မ္ဂး ပ္ဍဲကဵုတွဵုရးမန် ဒပ်ပၞာန်သီအဝဵုပံက်ကၠုၚ်မံၚ် တန်ဗတောန်ယိုက်ဝန်ပၞာန်ညးဍုၚ်ကွာန် လၟေၚ်ၚ်ဂိတုတံဂှ် စနူလၟေၚ် ၁ စဵုကဵုလၟေၚ် ၂၅ သၟတ်အပ္ဍဲဒေသတံ ဟွံအောန်နူကဵု ၅၂၀၀ တၠ ဒးဒုၚ်ပကောံဏာလဝ် နဒဒှ်ကောန်ပၞာန်တံနွံရ။
ပရိုၚ် – သြၚ်လောန်တိုၚ်မ်
Photo – MOI