တိုကျဝ်၊ ဂျောန် ၂၇
ပ္ဍဲဍုၚ်ဂျပါန် အခိၚ်ဂမ္တဴလဗိုတ်ကျာ ၂ မ ကြပ်ကၠုၚ်မံၚ်ဏံ မၞိဟ် ၄ တၠ ဒးဝပ်လဝ်တုဲ သွက်ဂွံပြံၚ်အာ ဒၞာဲဂီုကၠီု မၞိဟ် ၁ ပြကောဋိကိုတ်ပြၚ်ဂှ် ပ္ဍဲဂျောန် ၂၆ ဂှ် ညးတာလျိုၚ်တံ ကဵုလဝ်သတိရ။
လဗိုတ်ကျာ မက်ခါလာ နူကိုပ်ကၠာနွံလဝ်အဆံၚ်တိုၚ်ဖန်ဂှ် လၟုဟ် ဇြဟတ်ယအ်စှ်ေအာတုဲ ၜိုန်ရပြံၚ်လှာဲအာ အဆံၚ်လဗိုတ်ကျာ ဂမ္တဴကီုလေဝ် ပ္ဍဲမွဲနာဍဳမ္ဂး ဇြဟတ်ကျာလပိုက် ၁၀၈ ကဳလဝ်မဳတာ ဆက်နွံမံၚ်ဖိုဟ်ရ။
ဟိုတ်နူလကျာတုဲ ပ္ဍဲဒေသလပါ်သၟဝ်ကျာ ကေုာံ လပါ်ပလိုတ် ဍုၚ်ဂျပါန်တံ ဗြဲဂူသကာတ်ထတ်မံၚ်တုဲ ဘဲအန္တရာဲဍာ်ဇၞော် တိလိုက်တံ ပဵုဂၠိုၚ်တိုန်မံၚ်ရ။
အပ္ဍဲပွိုၚ်သတ္တဟဏံ လဗိုတ်ကျာဏံ ၜက်အာတ္ကအ် ကျူယှူ၊ ယှူကိုကု ကေုာံ ဟန်ယှူရောၚ် တော်လဝ်တုဲ ဍုၚ်ဇၞော်မၞိဟ်ဂၠိုၚ်ၚ် ညံၚ်ရဴအိုဆာကာ၊ နာဂိုယာ ကေုာံ တိုကျဝ်တံလေဝ် ဒးဒုၚ်ဇီုကပိုက်မာန်ရ။
ပ္ဍဲမွဲအခိၚ်ဓဝ်ဏံရ ဟိုတ်နူကဵု လဗိုတ်ကျာဂမ္တဴ ဟဳဂဝ်စ် ချဳဒရာၚ်မံၚ် လပါ်မှာသၟိတ်ပသဳဖိတ်တုဲ အကာဲအရာပရေၚ်ဇီုကပိုက်ဂတးဂတန် လဗိုတ်ကျာၜါမ “ဖူဂျဳဝါရာ” က္တဵုဒှ်မာန်ရေၚ် သာ်ဝွံ တၠပညာဗြဲကျာတံ ကဵုလဝ်သတိရ။
ဟိုတ်နူဗီုပြၚ် က္တဵုဒှ်ဗီုဏံတုဲ သွက်ဂွံတော်အာ လၟေၚ်တရဴဇြဟတ်လဗိုတ်ကျာဂှ် ပဵုဝါတ်ဂါတ်တိုန်အာမာန်ရ။
စဵုကဵုအခိၚ်ပြဟ်ဟ်ဏံ မၞိဟ် ၁ တၠ ဒးဝပ်ဇၞော်ကဵုဇြဟတ်တုဲ ၃ တၠပၠန် ဒးဝပ်ညိည ပ္ဍဲဒေသကာဂိုယှဳမာလေဝ် စမြိုၚ်ဒၞာဲဗွဲမဂၠိုၚ် ဍာ်လုပ်မံၚ်ရောၚ် ညးအခေါၚ်ဟီု အလဵုအသဳဂျပါန် မဳနဝ်ရူ ကဳဟာရာ သ္ဂးရ။
နူကဵုအလဵုအသဳ ပံၚ်တောဲကဵု ညးတာလျိုၚ်ဒေသတံတုဲ ကမၠောန်ဟံၚ်ပြာ်ကာမံက်တိုန် ကေုာံ ကမၠောန်ကလေၚ်ပလန်ဒုၚ်ဒဝ်ဘဲအန္တရာဲတံဂှ် ကၠောန်မံၚ်ရောၚ် သ္ဂးရ။
ဟိုတ်နူအသိၚ်လဗိုတ်ကျာမုဟ်တုဲ နူဂျပါန်အေဝေဝ် (JAL) ကေုာံ All Nippon Airways (ANA) တံ လၟေၚ်တရဴဗ္လးကျာအာစဴ အိုကဳနာဝါ ကေုာံ ကာဂိုယှဳမာ အပံၚ်သီုဖအိုတ် ၁၂၀ ဂှ် ဒးပလီုလဝ်ရ။
ညးတာလျိုၚ်ဒေသတံ ကဵုလဝ်ကသပ် မၞိဟ် ၁ ပြကောဋိကိုတ်ပြၚ်တံဂှ် သွက်ဂွံပြံၚ်အာ ဒၞာဲဂီုကၠီုတုဲ ပရေၚ်တိလိုက်စှ်ေ ဍာ်ဇၞော် ကေုာံ ဟိုတ်နူဗြဲဂူထတ်တုဲ ဘဲအန္တရာဲသဘာဝတၞဟ် က္တဵုဒှ်မာန်ဂှ်လေဝ် ညံၚ်ဂွံနွံကဵုသတိဂှ် ဗတိုက်ဖအောဝ်လဝ်ရ။
ပ္ဍဲဍုၚ်ကျိုတဝ် ကေုာံ အိုဆာကာတံလေဝ် ဟိုတ်နူဍာ်ကြုၚ်သၠုၚ်တိုန်မံၚ်တုဲ ဍာ်သွက်ဂွံဇၞော် ဒှ်ကၠုၚ်မာန်ရောၚ် သာ်ဝွံ ညးတာလျိုၚ်မဆေၚ်စပ်တံ ကဵုလဝ်သတိရ။
ဟိုတ်နူဂၠံၚ်ကၟာတ်ဆိုအ်အာတုဲ ကာန်ပဏဳပတိတ်ကွဳစက် တိုယိုတာ ကမၠောန်ရုၚ်စက် ကျူယှူဂှ် ဒေါအ်လဝ်မွဲခဏတုဲ နကဵုကာန်ပဏဳနိသာန်လေဝ် စဳဇန်လဝ် သွက်ဂွံဒေါအ်လဝ်ကမၠောန်လ္ၚဵုတံရောၚ် သာ်ဝွံ ပ္ဍဲပရိုၚ်နာနာ ချူထမံက်လဝ်ရ။
ပ္ဍဲဍုၚ် ထာၚ်ဝါန်လေဝ် ဟိုတ်နူလဗိုတ်ကျာ မက်ခါလာတုဲ ဗြဲဂူသကာတ်ထတ် ဍာ်ဇၞော် တိလိုက်စှ်ေမံၚ်တံ က္တဵုဒှ်မံၚ်ရ။
မၞိဟ် ၁,၆၀၀ ပြၚ်တံဂှ် ဒးပြံၚ်ပဆုဲတိတ်လဝ်နူသ္ၚိတုဲ ပ္ဍဲဒေသလ္ၚဵုတံမ္ဂး ဘာ၊ ရုၚ်အလဵုအသဳတံ ဒးကၟာတ်လဝ်မွဲခဏရ။
ဗွဲတၟေၚ် ပ္ဍဲဒေသ ဟွာလဳအန်၊ ခိုယှဳအန် ကေုာံ ပေန်တန်တံ ဍာ်ဒဵုစှ်ေတုဲ ဘဲအန္တရာဲတိလိုက်တံ ဂၠိုၚ်မံၚ်ရောၚ် ညးတာလျိုၚ်တံ ကဵုလဝ်သတိတုဲ စနူဂျောန် ၂၅ ဂှ် ဗြဲဂူလဝ်စဵုကဵု ၈၈ သေန်တဳမဳတာရောၚ် ဌာနဗြဲကျာ လလောၚ်ပတိတ်လဝ်ရ။
Ref:AFP