ဍာ်ဗု၊ ဂျောန် ၂၇
အပ္ဍဲကဵုရးတနၚ်္သဳ ပွိုၚ်ဍုၚ်ဍာ်ဗု ဒၞာဲဧရိယာ ကိုန်အစဳဇန် ဗွိုၚ်ပရေၚ်ပိုန်ဒြပ်ထဝါဲတၟေၚ်ဂှ် ဒပ်ပၞာန်ဗမာ ထပက်မံၚ် ကရောၚ်ပၞာန်တုဲ ညးဒေသလၟိဟ်လ္ၚီပြၚ် ဒးဂြိပ်ပါဲဒဴမံၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂိတုဂျောန် ၂၅ တုဲကၠုၚ်တေံ စနူဂယးဂှ် ကရောၚ်ပၞာန်ဒပ်ပၞာန်ဗမာ ဇြဟတ်ၜိုတ် ၈၀ တံ ထပက်လုပ်ကၠုၚ် ပ္ဍဲဒၞာဲဧရိယာ ဗွိုၚ်ပရေၚ်ပိုန်ဒြပ်ထဝါဲတၟေၚ် ပ္ဍဲကဵုကွာန်မူဒူဂှ်ရောၚ်။
ဟိုတ်နူကရောၚ်ပၞာန် ဒပ်ပၞာန်ဗမာတံ ဖျေံလဝ်ဗ္ဒိုပ် ပ္ဍဲဘာလကျာ် နွံမံၚ်လဒေါဝ်ကွာန်မူဒူဂှ် ညးဒေသ ၁၀၀၀ ပြၚ်တံ ဂွိၚ်ဖေက် ဒးဒုၚ်ရပ်ပဝ်တာတုဲ ဂြိပ်ပါဲဒဴမံၚ်အိုတ် သ္ဂးရ။
ကွာန်မူဒူဝွံ ဒှ်ကွာန်အပ္ဍဲဒေသနဗုလေဝ် ဗွိုၚ်ပရေၚ်ပိုန်ဒြပ်တၟေၚ်ထဝါဲတုဲ သီုကွာန်မူဒူလပါ်ဗမံက်ကဵု ကွာန်မူဒူလပါ်ပလိုတ်တံဂှ် ကောန်ကွာန်ညးဒေသမံၚ်တဴမံၚ်နွံကြပ် ၂၀၀၀ တၠ မဒှ်ရ။
ပ္ဍဲဒၞာဲဧရိယာ ကိုန်အစဳဇန် ဗွိုၚ်ပရေၚ်ပိုန်ဒြပ်တၟေၚ်ထဝါဲ ပရေၚ်ထပက်မံၚ်ကရောၚ်ပၞာန်ဂှ် ဟိုတ်နူစၞောန်ပ္ညုၚ် ဒုဂဥုပ်ပၞာန် သ္ကိုပ်ပၞာန်ဇၞော် ကျဝ်သွာလေန် အာလဝ်တရဴဍုၚ်ဗိက် ပ္ဍဲဂိတုဂျောန် ၂၄ တုဲကၠုၚ်တေံ သွက်ဂွံစဳရေၚ်ပရေၚ်ဂီုကၠီုကိုန်အစဳဇန် ဗျူဟာနွံနွံတံဂှ် ဒှ်မာန်ရောၚ် ပရေၚ်သ္ၚဳဂၠိပ်တံ နွံမံၚ်ရ။
တုဲကၠုၚ် ဂိတုမေ ၂၉ တေံဂှ်လေဝ် ပ္ဍဲဒေသဗွိုၚ်ပရေၚ်ပိုန်ဒြပ်တၟေၚ်ထဝါဲ ပွိုၚ်ဍုၚ်ဍာ်ဗု ကွာန်လေဝ်ယှံၚ်ဂှ် ဒပ်ပၞာန်ဗမာ ထပက်လုပ်ကၠုၚ်ကရောၚ်ပၞာန်တုဲ ညးဒေသတံအလုံမွဲကွာန် ဒးဂြိပ်ပါဲဒဴအာအိုတ်ဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ