မတ်မလီု၊ ဂျောန် ၂၇
ညးဍုၚ်ကွာန် တွဵုရးမန်တံ ယဝ်ရဒှ်ကၠုၚ်အခက်အခုဲမွဲမွဲမ္ဂး ဇရေၚ်ကမ္မတဳ ပလံၚ်လိက်တေၚ်စိုပ်၊ လိက်အာတ်ဓရ်ဆာန်ဍူ၊ လိက်ပတိုန်ထ္ၜး စၠတ်ထဝ်တွဵုရးမန် ပရေၚ်ကေၚ်ကာနာနာတံဂှ် ကၠုၚ်တေၚ်စိုပ်မာန်ရောၚ် ညးအုပ်ကာကမ္မတဳ ဥူတဇြဝ် ဟီုလဝ်ရ။
ညးဒးဆောံလေၚ်လဝ်ပရေၚ်ဥပဒေ၊ ညးနွံအခေါၚ်ဂွံ နကဵုဥပဒေ၊ ညးဒးဒုၚ်ပဍဵုပဍိုက်လဝ် ဟၟဲကဵုပရေၚ်ဓဝ်ဍာံတံ စနူကဵု ညးတာလျိုၚ်တံ ကၠောန်လဝ်ဗၠေတ်ဗၠေတ်တံဂှ် တေၚ်စိုပ်စၠတ်ထဝ်မာန်ရောၚ် သ္ဂးရ။
ပရေၚ်တေၚ်စိုပ်တံဂှ် နူကဵုကမ္မတဳဏံ စၟဳစၟတ်အာတုဲ တၚ်နၚ်စၟဳစၟတ်ဆဵုညာတ်တံဂှ် ပတိုန်ထ္ၜးကဵုအာ ဇရေၚ်ကု လပါ်ပရေၚ်အုပ်ဓုပ်ကီုဒှ်၊ လပါ်ပရေၚ်စဳရေၚ်သၞောဝ်ဓဝ်ကီုဒှ် ဆက်ပ္ညဳပ္ညပ်ရေၚ်တၠုၚ်ကဵုအာရောၚ် ဂွံတီကေတ်ရ။
စပ်ကဵုလိက်တေၚ်စိုပ်တံမ္ဂး တန်တဴကဵုလ္တူညးဍုၚ်ကွာန်တံ ပတိုန်ထ္ၜးလဝ်ဂှ်တုဲ ကုဂကောံဆေၚ်စပ်ကဵု ပရေၚ်တံဏံဂှ် သွက်ဂွံကဵုအာကသပ်ကီု တင်အာတ်မိက်တံကီု ဖန်ဖက်ရေၚ်တၠုၚ်ကဵုအာရောၚ် ညးအုပ်ကာကမ္မတဳ ဥူတဇြဝ် ဟီုရ။
“အဓိကဂှ် တန်တဴကဵုလတူညးဍုၚ်ကွာန်တံ ပတိုန်ထ္ၜးကၠုၚ်တုဲ သွာၚ်ပရေၚ်သၞောဝ်ကဵု သွာၚ်ပရေၚ်အုပ်ဓုပ်တံ သီုကဵုပရေၚ်စဳရေၚ်ဓဝ်တံ ပိုဲတံဂတးဂတန် ထိၚ်ဒဝ်မံၚ် နွံရ။ နွံသာ်ဂှ်တုဲ အပ္ဍဲလိက်တေၚ်စိုပ်ကၠုၚ်လဝ်တံဂှ် စပ်ကဵုပရေၚ်စဳရေၚ်သၞောဝ်ဓဝ်လေဝ် ပါကၠုၚ်မာန်။ စပ်ကဵုလပါ်ပရေၚ်အုပ်ဓုပ်လေဝ်ပါတှ်ေ ပါကၠုၚ်မာန်ရောၚ်။ ပိုဲတံ မၚ်ရံၚ်အာတုဲ ယဝ်ရယောၚ်ယာမံၚ်မ္ဂး ကုဂကောံဆေၚ်စပ်တံဂှ် ပိုဲတံ ကဵုအာကသပ်ဒှ်ဒှ်၊ အာတ်မိက်ဒှ်ဒှ် ကၠောန်အာဏောၚ်”သာ်ဝွံ သ္ဂးရ။
တုဲပၠန် စပ်ကဵုလိက်ညးဍုၚ်ကွာန်တံတေၚ်စိုပ်လဝ်ဂှ် နူကမ္မတဳဏံ စၟဳစၟတ်လ္ၚတ်အာတုဲ နူကဵုဥက္ကဌစၠတ်ထဝ် မွဲအဆံၚ်ပလံၚ်ဗ္စိုပ်အာ လပါ်သွာၚ်ပရေၚ်အုပ်ဓုပ်ကေုာံ လပါ်သွာၚ်ပရေၚ်စဳရေၚ်သၞေဝ်ဓဝ်တံတုဲ နူကဵုညး ကလေၚ်ပလေဝ်ပလေဝ်ကဵုကီု၊ ပရေၚ်ဒးကေတ်အရေဝ်တံကီု ဖန်ဖက်ရေၚ်တၠုၚ်ကဵုအာရောၚ် ညးဆက်ဟီုရ။
ကမ္မတဳလိက်တေၚ်စိုပ်၊ လိက်အာတ်ဓရ်ဆာန်ဍူ၊ လိက်ပတိုန်ထ္ၜး စၠတ်ထဝ်တွဵုရးမန် ပရေၚ်ကေၚ်ကာနာနာ ဂကောံဒပ်ပၞာန်ပြံၚ်လဝ် ဗီုပြၚ်အလဵုအသဳဂှ် နူကဵုစၠတ်ထဝ်တွဵုရး ကၠောန်ဗဒှ်လဝ် ကောံဓရီုတုဲ ဂိတုဂျောန် ၁၂ တုဲကၠုၚ်တေံဂှ် ဒက်ပ္တန်လဝ်ရ။
အပ္ဍဲကမ္မတဳဏံဂှ် ညးစၞးစၠတ်ထဝ် ဗော်ညဳသၟဟ်မန် နာဲသာန်တေန် ကေတ်လဝ်တာလျိုၚ် ဥက္ကဌတုဲ နူကဵုညးစၞးစၠတ်ထဝ်တွဵုရး ၈ တၠ၊ ပုဂ္ဂိုလ်နူမ္ၚး ၁ တၠ အပံၚ်သီုဖအိုတ် နကဵု ၉ တၠတံ ဒက်ပ္တန်လဝ်ရောၚ်။
စပ်ကဵုပရေၚ်ကိစ္စၜက်ၜေတ် သိုၚ်လဝ်စမြိုၚ်ဒၞာဲလုပ်မံၚ် လတူဗရံၚ်ဍာ် ညးဍုၚ်ကွာန်တံတေၚ်စိုပ်လဝ်တုဲ ဂိတုဂျောန် ၂၅ တုဲကၠုၚ်တေံဂှ် ကမ္မတဳလိက်တေၚ်စိုပ် စၠတ်ထဝ်တွဵုရးမန် ဆဵုဂဗသဳကၠဳလဝ် နွံရ။
ပရိုၚ် – သြၚ်လောန်တိုၚ်မ်
Photo – MOI