မတ်မလီု၊ ဂျောန် ၂၇
ဍုၚ်ကွာန်ညိၚ်ဝပ်ၜိုဟ်သြိုဟ်အာမှ ကမၠောန်ပရေၚ်ဖောအ်ဗြဳတောတက်တံ ကၠောန်အာမာန်တုဲ ပရေၚ်ညိၚ်ဝပ် အပ္ဍဲဒေသတံဂှ် ဒပ်ပၞာန်ဗၟာ ဒးကေတ်မံၚ်တာလျိုၚ်ရ သာ်ဝွံ ဒုဂဥုပ်ပၞာန်၊ ဂဥုပ်သ္ကိုပ်က္ဍိုက်ပ်ဒပ်ပၞာန် (တိုက်) သ္ကိုပ်ပၞာန်ဇၞော် ကျဝ်သွာလေန် ဟီုရ။
ပ္ဍဲကဵုဂိတုဂျောန် ၂၅ တုဲကၠုၚ်ဏံ အပ္ဍဲဗွိုၚ်ဒပ်မတ်မလီု ဌာန်ဂအုပ်ပၞာန်ရးအဂၞဲ နွံမံၚ်တွဵုရးမန်ဂှ် အဟိန်ဆဵုဂဗလဝ်ကဵု ညးတာလျိုၚ်၊ ကောန်ပၞာန် ကေုာံ ရဲသ္ၚိဌာန်ကၟိန်အိန်ထံၚ် ကောန်သ္ဂံၚ်တံဂှ် ဒပ်ပၞာန်ဟီုဏာဂှ်တှ်ေ သၟဝ်စၞောန်ပ္ညုၚ်အလဵုအသဳဂှ် ဒးယိုက်ဂၠေၚ်မံၚ်တာလျိုၚ် ပရေၚ်စဵုဒၞာဍုၚ်ရောၚ် သာ်ဝွံ ဟီုလဝ်ရ။
သွက်ကၟိန်ဍုၚ် ညံၚ်ဂွံညိၚ်ဝပ်ၜိုဟ်သြိုဟ်ဖောအ်ဗြဳတောတက်အာဂှ် တိုၚ်ခဳဒက်ပတန်ပရေၚ်သၞောဝ်ဓဝ်၊ ပရေၚ်အုပ်ဓုပ်၊ ပရေၚ်စဳရေၚ်သၞောဝ်ဓဝ်တံဂှ် ထမံက်အာမံၚ်ရုပ်ရဴ ပရေၚ်ကမၠောန်ရ သာ်ဝွံ ဒုဂဥုပ်ပၞာန် သ္ကိုပ်ပၞာန်ဇၞော် ကျဝ်သွာလေန် ဟီုလဝ်ရ။
နတဲမ္ဂး နူကဵုဒပ်ပၞာန်သီအဝဵု ၜိုန်ရဖန်ဗဒှ်လဝ် ဗီုပြၚ်အလဵုအသဳ ပရေၚ်အုပ်ဓုပ်ညးဍုၚ်ကွာန်ကီုလေဝ် အဝဵုသီုဖအိုတ်တံဂှ် က္ဍိုပ်သ္ကိုပ်ပၞာန်သီအဝဵုကဵု သ္ကိုပ်ပၞာန် သၠောတ်လဝ်ကယျိုၚ်ယူနဳဖံၚ် တံရ ထိၚ်ဒဝ်အုပ်ဓလီုလဝ်ရောၚ်။
မွဲလပါ်ပၠန် ညံၚ်ဇြဟတ်ဒပ်ပၞာန် ဂွံအောန်စှ်ေအာဂှ် လ္တူရဲဂကောံဒစဵုဒစး ပၠန်ဂတးမံၚ်သၞောတ်တၠအဝဵုပၞာန် ဂကောံရပ်လွဟ်ကောန်ဍုၚ်အရၚ်လ္ၚဵုတံကဵု PDF တံဂှ် နူဍုၚ်ဇြဟတ်ဇၞော်လ္ၚဵုတံ ကဵုလဝ်ရီုဗၚ်ထံက်ပၚ်မံၚ်ရောၚ် ဒုဂဥုပ်ပၞာန် ဟီုရ။
တုဲပၠန် ဂကောံရပ်လွဟ်ကောန်ဍုၚ်အရၚ်လ္ၚဵုတံကဵု PDF တံဂှ် ဟိုတ်နူပရေၚ်ကိစ္စဂကူ၊ ပရေၚ်ဝါဒ သာ်ဝွံ နကဵုက္ဍိုပ်လိက်နာနာသာ် ထ္ၜးဟိုတ်တုဲ ရပ်မံၚ်လွဟ်ဟီုကီုလေဝ် ပ္ဍဲဗလးတိဇေတ်တ်မ္ဂး အဓိကဂှ် ကၠောန်မံၚ် သွက်ဂုဏ်ဖဵုပူဂိုလ်ညးတံရောၚ် သာ်ဝွံ စောဲစပ်လဝ်ရ။
ကြဴနူပၞာန်သီအဝဵုတုဲ က္ဍိုပ်သ္ကိုပ်ဒပ်ပၞာန်အဆံၚ်လတူတံဂှ် အုပ်လဝ်ဂတာတဲ သယံဇာတကၟိန်ဍုၚ်တံတုဲ ကၠောန်မံၚ်သွက်ဂုဏ်ဖဵု ပူဂိုလ်ညးတံရဏောၚ် ညးအခေါင်ဟီုဂးနွံ ကံၚ်သဳဖိတ်ဒရေဝ်ဍုၚ်မန် နာဲမန်သာၚ် ကလေၚ်ခၠေဝ် ဟီုဏာလဝ်ရ။
“အရာပရေၚ်ဂၠာဲဖဵုပူဂိုလ်တံဂှ်လေဝ် ဒှ်ဂကောံဒပ်ပၞာန်ညးတံရ။ ညးတံ ကြဴနူသီဂွံအဝဵုတုဲ အပ္ဍဲဒပ်ပၞာန် ကၠောန်မံၚ် ကမၠောန်ပိုန်ဒြပ်ဒပ်ပၞာန်တံရ။ သယံဇာတ နွံပ္ဍဲဍုၚ်တံဂှ် ညးတံအုပ်ဂတာတုဲ ပတိတ်သုၚ်စောဲမံၚ် သွက်ဒပ်ပၞာန်ကီု သွက်ဂုန်ဖဵုက္ဍိုပ်သ္ကိုပ်အဆံၚ်လတူတံကီု ပရေၚ်တံဏံဂှ် ညးတံရ ကၠောန်ကၠုၚ်လဝ်နွံ။ ဟိုတ်ဂှ်ရ ကိစ္စသယံဇာတဏံမ္ဂး ဆေၚ်စပ်ကဵု ပရေၚ်ကိစ္စဖိတ်ဒရေဝ်ဏောၚ်။ သယံဇာတ အပ္ဍဲတွဵုရးတံ ထေက်ကဵုဒးဂွံတံဂှ် နူကဵုဒပ်ပၞာန်အုပ်ဏာဂတာတဲဖအိုတ်တုဲ ဟိုတ်နူပရေၚ်ပၠန်ဂတးတံဏံဂွံဒှ်ဂှ် အပ္ဍဲဂှ် ဟိုတ်တံဏံဂှ်လေဝ် ပါလုပ်မွဲကီုရ။ ဟိုတ်ဂှ်ရ အရာကၠောန်မံၚ်သွက်ဂုန်ဖဵုပူဂိုလ်ဇေတ်တ်ဂှ် ဂကောံပၠန်ဂတးတံ ဟွံသေၚ်ပုဟ်။ က္ဍိုပ်သ္ကိုပ်ပၞာန် နူဒပ်ပၞာန်တံ ကၠောန်မံၚ်ရောၚ်”သာ်ဝွံ သ္ဂးရ။
ဂကောံပၠန်ဂတး ဗွဲမဂၠိုၚ်ပါလုပ်မံၚ် ပ္ဍဲပရေၚ်ဗတိုက်သရိုဟ် သၞောတ်တၠအဝဵုပၞာန်တံဂှ် ကၠောန်မံၚ်သွက်ဂုဏ်ဖဵုဂကောံကဵု သွက်ဂွံရီုဗၚ်ထံက်ပၚ်အာ ပရေၚ်ပၠန်ဂတးမာန်ရောၚ် သာ်ဝွံ နာဲမန်သာၚ် ထံက်ထ္ၜးလဝ်ရ။
အပ္ဍဲကဵုပေါဲရုဲမာဲ သၞာံ ၂၀၂၀ တေံ ဗော်ဂွံအဝဵုကၠောန်လဝ်ပရေၚ်ရုဲမာဲ ဟွံဍာံပြတုဲ အတိုၚ်သ္ဇိုၚ်သၞောဝ်ဥပဒေ ၂၀၀၈ ဂှ် သွက်ကိစ္စပရေၚ်ဍုၚ် နူကဵုဒပ်ပၞာန်ဒးယိုက်ဂၠေၚ်ကၠုၚ် တာလျိုၚ်ကၟိန်ဍုၚ်နာနာရောၚ် ဒုဂဥုပ်ပၞာန် သ္ဂးရ။
ဣဏံဂှ် သွက်ဂွံထမံက်အာရုပ်ရဴ မှပ်လ္ပအ် သမ္မတ ဥူမေန်အံၚ်လှိုၚ်တုဲ ဒပ်ပၞာန်ကေတ်ဇၞးကဵုလွဟ် သီကေတ်လဝ်အဝဵုဍုၚ်ဂှ် လတူပရေၚ်ဍုၚ်ကွာန်ဂှ် စရိုတ်ဒပ်ပၞာန်ပရေအ်ပရေအ်တံ ဗီုမိက်ဂွံလုပ်ဖန်လုပ်ပါမံၚ် လၟိုန်ရဂှ် ဒုၚ်ဏာဝန်ရ။
ညးဍုၚ်ကွာန် အဆံၚ်ကွပ်နာနာ ဟွံဒုၚ်တဲပရေၚ်သီအဝဵုတံ ထ္ၜးဆန္ဒၜိုဟ်ဟ်သြိုဟ်ဟ်ကီုလေဝ် ဒပ်ပၞာန်ပန်ကဵုလွဟ် ရပ်ဂစိုတ်ထောံတုဲ ဟရိုဟ်ပလံၚ်ဗစိုပ်လဝ် ဂၠံၚ်တရဴပရေၚ်ပၠန်ဂတးရပ်လွဟ်ဂှ်ရောၚ်။
ဟိုတ်ဂှ်ရ အလုံမွဲဍုၚ် ဂကောံပၠန်ဂတးရပ်လွဟ်တံ မံက်ဂတဝ်ကၠုၚ် လၟိဟ်ကဵုကၠံပြၚ်တုဲ ဗတိုက်မံၚ်သၞောတ်တၠအဝဵုပၞာန်ဂှ် သွက်ပရေၚ်တိဍာ်ဂွံညိၚ်ဝပ်အာ နူကဵုဒပ်ပၞာန် ဒးပသောၚ်ကၠုၚ်မံၚ်ရောၚ် သာ်ဝွံ ဒုဂဥုပ်ပၞာန် သ္ဂးရ။
ညံၚ်ပရေၚ်ညိၚ်ဝပ်ကၟိန်ဍုၚ် ဂွံလီုလာ်အာဖန်ဗဒှ်ကၠုၚ်မ္ဂး ညးလဵုမွဲဟွံဟီု နူကဵုဒပ်ပၞာန်သ္အးဇ္ၚးအာရောၚ် အဟိန်စိုပ်မံၚ် ဗွိုၚ်ဒပ်မတ်မလီုဂှ် ညးဟီုကြီလလောၚ်လဝ်ကဵု ကုညးတာလျိုၚ်ကဵု ကောန်ပၞာန်တံကီုရ။
အပ္ဍဲပရေၚ်ဍုၚ်ကွာန် လုပ်ပါမံၚ်လၟိုန်တုဲ ကၠောန်မံၚ်ပရေၚ်ဍုၚ် ညံၚ်ဟွံဂွံညိၚ်ဝပ်ဂှ် ဒပ်ပၞာန်ကဵု သၞောတ်တၠအဝဵုပၞာန်တံရ ဖန်မံၚ်ရောၚ် နူဇြဟတ်ပၠန်ဂတးတံဂှ် ကလေၚ်ခၠေဝ်ဟီုလဴလဝ် နူအခိၚ်ကၠာတေံ တုဲတုဲမံၚ်ရ။
ပရိုၚ် – သြၚ်လောန်တိုၚ်မ်
Photo – MOI