သဓီု၊ ဂျောန် ၂၉
နူကဵုတွဵုရးမန် ပွိုၚ်ဍုၚ်သဓီုမွဲကဆံၚ် ပတဝ်လဝ်လပါ် တွဵုရးကရေၚ် ပွိုၚ်ဍုၚ်ကအ်ကြိက်ကဵု ပွိုၚ်ဍုၚ်ဗြဝတဳတေံတုဲ ဆက်ပလံၚ်ဏာ ကောန်ပၞာန်တံ နကဵုယာန်ကွဳစက်ပၞာန်ဗွဲမဂၠိုၚ် နွံမံၚ်ရောၚ် ရိုဟ်ကၞက်ပရိုၚ် အပ္ဍဲဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ကွဳစက်ပၞာန် အုပ်လဝ်ယာတ်တာလပါတ်တံဂှ် ကၠောန်လဝ်ဗီုပြင် ကွဳစက်ကောန်ကွာန်တံ ဖ္ဍိုက်လဝ်ကပေါတ်တုဲ ပ္ဍဲဂိတုဂျောန် ၂၆ ဂှ် နူကဵုပွိုၚ်ဍုၚ်သဓီုမွဲကဆံၚ် ပတဝ်လဝ်က္ဍိုပ် လပါ်တွဵုရးကရေၚ် ပွိုၚ်ဍုၚ်ကအ်ကြိက်ကဵု ပွိုၚ်ဍုၚ်ဗြဝတဳတေံ တိတ်အာလဝ်ရဂှ် ရိုဟ်ကၞက်ပရိုၚ်ညးဒေသတံ ဟီုရ။
သွက်ဂွံထပက်ကရောၚ်ပၞာန် လပါ်သၠုၚ်ကျာဍုၚ်မြဝတဳ ဒၞာဲတိဍာ် ဖလူကဵု မေန်လက်ပါန်ဂှ် ယာန်ကွဳစက်ပၞာန်တံဏံ ဖ္ဍိုက်ပလံၚ်ဗ္စိုပ် ဏာဇြဟတ်ပၞာန်တံတုဲ သွက်ဂွံသီကေတ်တိဍာ်ဖလူကဵု မေန်လက်ပါန်တံဂှ် ဒပ်ပၞာန်ဗမာပြေင်ဇန်လဝ် ပရေၚ်လဝေၚ်ပၞာန် ပံၚ်တောဲကုဂကောံရပ်လွဟ်ကရေၚ် ဒပ် DKBA ပါ်တိတ်တံတုဲ အစဳဇန် သွက်ဂွံဆက်ဗတိုက်အာ နွံမံၚ်ရောၚ်။
ဒပ်ပၞာန်ဗမာ ထပ်ပလံၚ်လဝ်ဇြဟတ်ကောန်ပၞာန် တွဵုရးကရေၚ် အလန်ဏံဂှ် ဒပ်နွံမံၚ်သၟဝ်တဲ တမ်ဒပ်လဵု၊ ၝောံဒပ်လဵုရောဟီုဂှ် ဟွံဂွံတီလဝ်ဏီပုဟ် သ္ဂးလဝ်ရ။
ဒပ် DKBA ပါ်တိတ်တံဂှ် ဖျေံလဝ်သ္ဇိုၚ် ပ္ဍဲဒေသတၟေၚ်ကျာ အေၚ်ပဝ်တဝ်မူ ပွိုၚ်ဍုၚ်ဘာအၚ် တွဵုရးကရေၚ်တုဲ ဒုၚ်လဝ်ယၟု ဒပ်ပၞာန်ကောန်ဂကူကရေၚ် ဗုဒ္ဓဘာသာတောတက်တုဲ ဗိုလ်ဗိ (ကော်) သဝ်တိုၚ်ယှိုဲ က္ဍိုက်လဝ်က္ဍိုပ်ရောၚ် ဂွံတီရ။
ဂကောံကရေၚ်ပံၚ်တောဲလဝ်ကဵု ဒပ်ပၞာန်ဗမာ ဒပ် DKBA ပါ်တိတ် ဏံဂှ် အပ္ဍဲကဵုပရေၚ်လဝေၚ်ပၞာန် ကြုၚ်ဒဵု-ကအ်ကြိက် ကေုာံ ပရေၚ်လဝေၚ်ပၞာန်ဖာပန်တံဂှ် ကဵုလဝ်အရီုဗၚ် ဘိုၚ်ဗတိုက်ကဵုမံၚ် ဒပ်ပၞာန်ဗမာတံရ။
DKBA က္ဍိုပ်ပါ်တိတ် ဗိုလ်ဗိတံကဵု ဒပ်မၚ်ပယျဵုကရေၚ် BGF ဗွိုၚ်ဒပ် စၟတ် ၄ တမ်ဒပ်သၟဝ်တဲ သ္ကိုပ်ပၞာန်ဇၞော် သဝ်မုက်တုၚ် ကောပ်ကာဲ လဝ်တံဂှ် ရီုဗၚ်ကဵုမံၚ်ဒပ်ပၞာန်ဗမာတုဲ ဆက်ပံၚ်တောဲဗတိုက်အာ ရောၚ် ဂွံတီလဝ် နူကဵု ရိုဟ်ကၞက်ပရိုၚ်ဒေသမွဲတၠ ရ။
ပ္ဍဲတိဍာ်ဖလူကဵု မေန်လက်ပါန် လပါ်သၠုၚ်ကျာဗြဝတဳ ပေါဲဗတိုက် ၜါလပါ်က္တဵုဒှ်လဝ် အကြာတ္ၚဲတံဏံဂှ်တှ်ေ မကမ်လွဟ်လ္ၚဵုတံ ဒတုံစှ်ေဒးအာ ပ္ဍဲဘာဗတောန်လိက် ကွာန်မေအ်ကိုကေန် လပါ်ဍုၚ်သေံတုဲ ဘာဗတောန်လိက်တံ ဒးကၟာတ်လဝ်ယာယဳ မွဲခဏကီု ပရေၚ်ဂီုကၠီုဒေသပယျဵုဂှ် ဒပ်ပၞာန်သေံတံ မၚ်ရံၚ်အာမံၚ် ချိုတ်တ်ပၠိုတ်တ်ရ။
ဒပ်ပၞာန်သီအဝဵု ဖျေံလဝ်ကိုန်အစဳဇန်ပွိုၚ် ၁၀၀ တ္ၚဲဏံ သွက်ဂွံ ကလေၚ်သီကေတ် ဗ္ဒိုပ်ပၞာန်အပ္ဍဲတွဵုရးကရေၚ် ဒးဒုၚ်သီလဝ်တံဂှ် ဍိုက်ကဵုဇြဟတ်ပၞာန်ပေၚ်ၚ်တုဲ ကလေၚ်ထပက်မံၚ်ကရောၚ်ပၞာန်ကီု၊ နူကဵုပၞာန်ကျာတံလေဝ် ပြေၚ်ဇန်လဝ်ဇၞော်ကဵုဇြဟတ်ရ။
ပရိုၚ် – သြၚ်လောန်တိုၚ်မ်
Photo – CJ