ဝါယှေန်တာန်၊ ဂျောန် ၂၇
သွက်ဂွံပတိတ်အာဗွဲတၟေၚ် ဍုၚ်အမေရိကာန် ဂွံလဝ်သၠးပွး စၟတ်သမ္တီပေၚ်အာ ၂၅၀ သၞာံဂှ် သမ္မတအမေရိကာန် ဒဝ်နေဝ်ထရ ထမံက်ထ္ၜးပျးလဝ် ဗီုပြၚ်ဒဳဇြာၚ် လိက်တၞးကၠောံဍုၚ် ပါတ်သပေါအ်အမေရိကာန်တၟိ ပ္ဍဲဂျောန် ၂၆ ဂှ်ရ။
ထရ ပတိုန်လဝ် ဗီုပြၚ်ရုပ် ပါတ်သပေါအ်အမေရိကာန်တၟိ ပ္ဍဲဇာဖိုၚ်မှာဇန် Truth Social ညးတုဲ “ဒုၚ်တၠုၚ် ပါတ်သပေါအ် အမေရိကာန်တၟိရ၊ ဆဂး မံၚ်ခိုဟ်ဟ်ညိ” သာ်ဝွံ ချူလဝ်ရောၚ်။
မုက်လိက်အပ္ဍဲ ပါတ်သပေါအ်ဂှ် ဗီုရုပ်ထရ ဗဒလဝ်ခုၚ် နကဵုမုက်မတ်ကြံၚ်ၚ် စုတ်လဝ်စၟတ်တဲညးတုဲ၊ ပ္ဍဲဒၞာဲလက္ကရဴဂှ် ချူထမံက်ထ္ၜးလဝ် လိက်လလောၚ်တြးပရေၚ်သၠးပွး အမေရိကာန်တံရ။
ရုပ်ဏံဝွံ ဒုၚ်သ္ဇိုၚ်ကဵု တက်လဝ်ရုပ်ထရ ပ္ဍဲသ္ၚိဗတာၚ်ဗု ဒန်နဳယေလ် တဝ်လောတ် တက်ကဵုလဝ်ဂှ်ရောၚ် ဂွံတီကေတ်ရ။
နူသ္ၚိဗတာၚ်ဗုလေဝ် ကလေၚ်ပါ်တြးပရအ်ကဵုဏာ ဗီုပါတ်သပေါအ်ဂှ်တုဲ ကဵုလဝ်ယၟု ” ပါတ်သပေါအ်ဆာန်ဂကူ” ရ။
ဌာနဝန်ဇၞော်ပရေၚ်ဍုၚ်သအာၚ်အမေရိကာန် နူကိုပ်ကၠာတေံ လလောၚ်တြးလဝ် သွက်ဂွံပတိတ်အာ ပါတ်သပေါအ်စၟတ်သမ္တီ ဗီုပြၚ်တၟေၚ် စနူဂျူလာၚ် ၆ ကီုလေဝ်၊ စပ်ကဵုဗီုရုပ်ထရပါမံၚ်ဏံဂှ် တၚ်စၟတ်သမ္တီဗွဲမလုပ်သၞောဝ် ဟွံဂွံလဝ်ဏီပုဟ်။
ပါတ်သပေါအ်ရုပ်ထရတံဂှ် သွက်ညးကၠုၚ်အာတ်မိက် နကဵုအလဵုကုဇကု ပ္ဍဲဝါယှေန်တာန်ဒဳသဳဟေၚ် အတိုၚ်ကပေါတ်သှ်ေဇးအာ နွံမံၚ်ပ္ဍဲတဲဂှ် ပတိတ်ကဵုအာရောၚ် အပ္ဍဲဂိတုအေဗရာဂှ် ညးတာလျိုၚ်ဌာနဝန်ဇၞော်မွဲတၠ ဟီုလဝ်ရ။
ပ္ဍဲကဵုလက်ထက်ထရ ဒှ်သမ္မတ အလန်ဒုတိယဝါဏံ အပ္ဍဲကဵုဂကောံအလဵုအသဳတံဂှ် ကပေါတ်တဆိပ်စၟတ်သမ္တီညး ညံၚ်ဂွံမံက်ဂတဝ်ဂၠိုၚ်တိုန်ဂှ် ဒှ်ညးမဂစာန်ကၠုၚ်မံၚ်မွဲတၠရ။
ပ္ဍဲဒၞာဲမုက်မ္ၚး စမြိုၚ်ဒၞာဲအလဵုအသဳလ္ၚဵုတံကီု ချိက်စွံလဝ်မုက်လိက် Trump ကီု ၊ ပ္ဍဲဌာနဝန်ဇၞော် ပရေၚ်ဘဏ္ဍာအမေရိကာန် လေဝ် လလောၚ်တြးလဝ် သွက်ဂွံစုတ်အာ စၟတ်တဲထရ ပ္ဍဲတၞးသြန် ၁ ဒဝ်လာကီုရ။
ယဝ်ရပပရေၚ်ပတိတ်ပါတ်သပေါအ်ဏံ လုပ်သၞောဝ်ဒှ်အာဍာံဍာံမ္ဂး သွက်ဂွံချူထမံက်ရုပ်သမ္မတအမေရိကာန် အဃောယိုက်ဂၠေၚ်မံၚ်တာလျိုၚ် ပ္ဍဲကဵုတၞးလိက်ကၠောံဍုၚ်အာတရဴ ကောန်ဍုၚ်အမေရိကာန်တံ ဒှ်အလန်ကိုပ်ကၠာအိုတ်တုဲ ဒှ်အာပရေၚ်စၟတ်သမ္တီဝၚ်မွဲကီုရောၚ်။
Ref:AFP