ပံၚ်၊ ဂျောန် ၂၉
အပ္ဍဲတွဵုရးမန် ပွိုၚ်ဍုၚ်ပံၚ် ကွာန်တေဝ်ဖျူကုၚ် ဒၞာဲရုၚ်စက် ဗံၚ်ကလောအ် ပဒုမ္မာ ကာန်ပဏဳဥူပိုင်လိမိတက် ဒပ်ပၞာန်ပိုၚ်လဝ်ဂှ် ဂွံဒုၚ်ဇိုန်ဏှၚ်အာပ်ပြာပ် လာပ်ကေတ်သ္ကာ MSME ရ သာ်ဝွံ အပ္ဍဲလိက်ပရိုၚ်တြးဝါဒ ဂကောံအလဵုအသဳဒပ်ပၞာန်တံ ချူထမံက်လဝ်ရ။
အပ္ဍဲဂိတုဂျောန် ၂၇ နဒဒှ်စၟတ်သမ္တီ တ္ၚဲ MSME ဂၠးကဝ် ကမၠောန် ပရေၚ်ပိုန်ဒြပ် အဇာဍောတ်၊ အဇာလဒေါဝ်တံဂှ် ဂကောံအလဵုအသဳ ဒပ်ပၞာန်တံ ဇိုန်ဏှၚ်အာပ်ပြာပ်လဝ် လာပ်ကေတ်သ္ကာ MSME ဂွံလဝ် ၁၁၉ လာပ်တုဲ အပ္ဍဲဏံဂှ် ရုၚ်စက်ဗံၚ်ကလောအ် ပဒုမ္မာလေဝ် ဂွံဒုၚ်ဇိုန်ဏှၚ်အာပ်ပြာပ်ကဵုလဝ် လာပ်ကေတ်သ္ကာကီုရောၚ်။
အပ္ဍဲကဵုလာပ်ကေတ်သ္ကာ MSME ဂကောံအလဵုအသဳဒပ်ပၞာန် ကဵုလဝ်တံမ္ဂး နူတွဵုရးမန်ဂှ် ကမၠောန်ကွတ်စက် ကွတ်တဲထူ၊ ရုၚ်စက်ဗံၚ်ကလောအ် ပဒုမ္မာ၊ ကမၠောန်ဗုတ်ထၜိုတ် ခတှ်ေ “နု” ကေုာံ ကမၠောန်ဝါဲဓါတ် ယှိုဲဇဳဝတံ ဂွံဒုၚ်ဇိုန်ဏှၚ်အာပ်ပြာပ်လဝ် လာပ်ကေတ်သ္ကာတံရ။
ရုၚ်စက်ဗံၚ်ကလောအ် ပဒုမ္မာ ဒပ်ပၞာန်ပိုၚ်လဝ်ဂှ် ဒှ်ပရေၚ်ကမၠောန် အဇာလဒေါဝ်မွဲတုဲ ဟိုတ်နူပတိတ်ကၠုၚ်လဝ် ဗံၚ်ကလောအ်၊ ဗံၚ်ခၟိက်၊ ဗံၚ်မမတံတုဲ ဒးဇိုန်ဏှၚ်အာပ်ပြာပ်ကဵု လာပ်ကေတ်သ္ကာ MSME ရောၚ် သာ်ဝွံ ချူထမံက်လဝ်ရ။
စပ်ကဵုပေါဲပြိုၚ်ပကာန် MSME ဂကောံအလဵုအသဳဒပ်ပၞာန်တံဂှ် ကၠောန်ဗဒှ်ကဵုလဝ် အဆံၚ်ဒေသ၊ အဆံၚ်ကၟိန်ဍုၚ် ကေုာံ အဆံၚ်အာသဳယာန်တံနွံတုဲ ရုၚ်စက်ဗံၚ်ကလောအ် ပဒုမ္မာ ဒပ်ပၞာန်ပိုၚ်လဝ်ဂှ် နူကဵုပေါဲထ္ၜးပျး ပေါဲပြိုၚ်ပကာန် MSME အဆံၚ်ကၟိန်ဍုၚ် သွက်သၞာံ ၂၀၂၅ ဂှ် ဂွံလဝ်လာပ်ကေတ်သ္ကာ မဒှ်ရ။
စပ်ကဵုပရေၚ်ရုဲစှ်လဝ် လာပ်ကေတ်သ္ကာ MSME ဂှ် ရုဲစှ်လဝ် သာ်လဵုရောဂှ် ဟွံဂွံတီလဝ်ကီုတုဲ ပရေၚ်ကမၠောန် MSME ဗွဲမဂၠိုၚ် နွံမံၚ် အပ္ဍဲဒေသကီုလေဝ် ပရေၚ်ရုဲစှ်ဏာ ရုၚ်စက်ဒပ်ပၞာန်ပိုၚ် သာ်ဏံဂှ် အခိုက်ပရေၚ်ကမၠောန် ဗီုပြၚ်အလဵုအသဳပၞာန်တံ ကၠောန်ကၠုၚ်မံၚ်လၟိုန်ရောၚ် တၠကမၠောန်ပိုန်ဒြပ်မွဲတၠ ပါ်ပါဲလဝ်ရ။
ရုၚ်စက်ဗံၚ်ကလောအ်ပဒုမ္မာ ဒပ်ပၞာန်ပိုၚ်လဝ်ဂှ် နူကဵုဂိတုဂျောန် ၁၊ သၞာံ ၂၀၂၁ တေံဂှ်ရ က္ဍိုပ်သ္ကိုပ်ပၞာန်သီအဝဵု အလဵုကုဇကု ခါန်ကၞက်လဝ် သမ္မတ ဥူမေန်အံၚ်လှိုၚ် ကၠုၚ်ရံၚ်ဗဵု ကေၚ်စၟဳစၟတ်လဝ် နွံရ။
ရုၚ်စက်ဗံၚ်ကလောအ်ပဒုမ္မာ ပတိတ်မံၚ် ဗံၚ်သ္အးဂၠိက်ယာတ်၊ ဗံၚ်ကြာတ်ကြဴဇကု ကေုာံ ဗံၚ်ခၟိက်တံ နကဵုတဆိပ် Padonmar တုဲ သွံမံၚ်ကပေါတ်တံဏံ ပ္ဍဲကဵု City Mall ကေုာံ Shopping Center တံရောၚ်။
ပရိုၚ် – သြၚ်လောန်တိုၚ်မ်
Photo – MOI