ၜဳကလေၚ်၊ ဂျောန် ၂၉
အပ္ဍဲကဵုတွဵုရးမန် ပွိုၚ်ဍုၚ်ၜဳကလေၚ် ဒၞာဲမွဲဒမြိပ်ကြုၚ်ၜဳကလေၚ် ကၠောန်မံၚ်ကမၠောန်ထဝ်ဟဳတံဂှ် ဒးဒုၚ်ကြဳဗုမ်ၜၚ်ကျာ ပွိုၚ်ပိတ္ၚဲ အဆက်ဆက်ဒှ်လဝ်တုဲ ပရေၚ်ဒးဝပ်ချိုတ်လဝ်ကဵု ပရေၚ်လီုလာ်တံ ဂၠိုၚ်တိုန်မံၚ်ကၠုၚ်ဂှ် ရိုဟ်ကၞက်ပရိုၚ်တိဍာ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အတိုၚ်မွဲဒမြိပ်ကြုၚ်ၜဳကလေၚ် ဒၞာဲကမၠောန်ထဝ်ဟဳနွံမံၚ်တံဂှ် စနူကဵုဂိတုဂျောန် ၂၂ စဵုကဵု ၂၄ တုဲကၠုၚ်တေံ ပွိုၚ်ပိတ္ၚဲဆက်ဆက် နကဵုၜၚ်ကျာ ၉ ဝါ ဒပ်ပၞာန်သီအဝဵုတံ ကြဳဖျေံလဝ်ဗုမ် ဟွံအောန်နူကဵု ၃၀ မ နွံရောၚ်။
ဟိုတ်နူပရေၚ်ကြဳဗုမ်ဏံတုဲ ရဲသၟာကမၠောန်ထဝ်ဟဳ အာယုက် ၄၂ သၞာံ ဥူဝေန်တာန် ချိုတ်အာလဝ်တုဲ ရဲသၟာကမၠောန်ထဝ်ဟဳ မၞိဟ်တြုံ၊ မၞိဟ်ဗြဴ ဟွံအောန်နူကဵု ၅ တၠ ဒးအာလဝ်ဝပ် နွံရ။
တုဲပၠန် ဒၞာဲကမၠောန်ထဝ်ဟဳ ၁၂ ဒၞာဲ ဗ္ဒာဲကွာန် ယှိုဲလံၚ်အေန်၊ ပျေၚ်၊ ညာသူထာ၊ ဝေၚ်ကတိုက် ကေုာံ ကွာန်ဇြဳကုန်တံဂှ် ဖံၚ်ထဝ်ဟဳ ကြပ် ၂၀ ဖံၚ် လီုလာ်အာတုဲ စမြိုၚ်သ္ၚိဌာန် ဟွံအောန်နူကဵု ၅ မ လီုလာ် အာလဝ်နွံရ။
ပရေၚ်ကြဳဗုမ် ကမၠောန်ထဝ်ဟဳတံဏံဂှ် ဟိုတ်နူကဵု သမ္မတ ဥူမေန်အံၚ်လှိုၚ် အပ္ဍဲကောံဓရီုဂကောံအလဵုအသဳ ကၠောန်လဝ် ပ္ဍဲဂိတုဂျောန် ၉ တုဲကၠုၚ်တေံဂှ် ကဵုလဝ်စၞောန်ပ္ညုၚ် သွက်ဂွံဗတိုက် သၠေက်အာ ပရေၚ်ၜံက်ခါဲထဝ် ဟွံလုပ်သၞောဝ်တံ မဒှ်ရ။
ဟိုတ်နူကမၠောန်ထဝ်ဟဳ အပ္ဍဲဒေသၜဳကလေၚ်တံဏံ ဒးဒုၚ်ကြဳဗုမ် နူၜၚ်ကျာ ပွိုၚ်ပိတ္ၚဲဆက်ဆက်တုဲ ကမၠောန်ထဝ်ဟဳဗွဲမဂၠိုၚ်တံ ဒးကၟာတ်အာလဝ်မွဲခဏကီု ညးဒေသ မွဲလ္ၚီပြၚ်တံလေဝ် ဒးဂြိပ်ပါဲဒဴမံၚ်ကီုရောၚ် နူရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
တုဲကၠုၚ်ဂိတုမာတ် ၁၆ တေံလေဝ် ကမၠောန်ထဝ်ဟဳကြုက် နွံမံၚ် ပွိုၚ်ဍုၚ်ၜဳကလေၚ် ဗ္ဒာဲကွာန်ဝေၚ်ကလေဝ်ဂှ်လေဝ် ဒးဒုၚ်ကြဳဗုမ် နူၜၚ်ကျာတုဲ သၟာကမၠောန်ထဝ်ဟဳ ၅ တၠ ချိုတ်အာလဝ်၊ ကောန်ဍုၚ်ကြုက်တံကဵု ရဲသၟာကမၠောန်ထဝ်ဟဳ လၟိဟ်စှ်ပြၚ်တံ ဒးအာလဝ်ဝပ်နွံရ။
အပ္ဍဲကွာန် အတိုၚ်မွဲဒမြိပ်ကြုၚ်ၜဳကလေၚ် ကမၠောန်ထဝ်ဟဳနွံမံၚ် ၁၀၀ ဒၞာဲပြၚ်တုဲ ကြဴနူဒပ်ပၞာန်သီအဝဵုဂှ် ကောန်ဍုၚ်ကြုက်ဗွဲမဂၠိုၚ်တံ ကၠုၚ်စိုပ်ကၠောန်မံၚ် ကမၠောန်ထဝ်ဟဳတံဏံရ။
ပရိုၚ် – သြၚ်လောန်တိုၚ်မ်
Photo – Social Media