ကဗူလ်၊ ဂျောန် ၂၉
အပ္ဍဲဒေသပယျဵု အာဖဂါန်နိသတာန်ဂှ် အပ္ဍဲကဵုပရေၚ်လဝေၚ်ပၞာန် ပါကေတ်သတာန် ပေါဲဗတိုက်ဗလးကျာကဵု ဗလးတိဂှ် ဂွံဂစိုတ်လဝ် ရဲဆီက္တဵု ၂၉ တၠရောၚ် ဒပ်ပၞာန်ပါကေတ်သတာန် ဟီုလဝ် ပ္ဍဲဂျောန် ၂၉ ရ။
အပ္ဍဲပရေၚ်ပေါဲဗတိုက်ပၞာန်ကျာ ပါကေတ်သတာန်ဂှ် ညးဍုၚ်ကွာန်ဟွံအောန်နူကဵု ၃၈ တၠပြၚ်တံ ချိုတ်လဝ်ရောၚ် အလဵုအသဳတာလဳဗာန် အာဖဂါန်နိသတာန် ဟီုရ။
ပရေၚ်ပေါဲဗတိုက် ပါကေတ်သတာန် ဂျောန် ၂၈ ဂှ် အပ္ဍဲအာဖဂါန်နိသတာန် ဒၞာဲရဲဆီက္တဵုတံ အောပ်မံၚ်ဂှ် နူကဵုပါကေတ်သတာန် ကလေၚ်ဗတိုက်လဝ် အလန်ဒုတိယ မဒှ်ရ။
ကြဴနူပရေၚ်ပေါဲဗတိုက်က္တဵုဒှ်လဝ် အကြာၜါဍုၚ် ပ္ဍဲဂိတုဖေဖဝ်ဝါရဳတေံတုဲ ဟိုတ်နူပရေၚ်ပါကေတ်သတာန် ဗတိုက်လဝ်ဂှ် အသိၚ်ပေါဲဗတိုက်တံ ပဵုထတ်ကၠုၚ်မာန်ရောၚ် ပရေၚ်ဒှ်ဒဝိၚ်တံ သၠုၚ်တိုန်မံၚ်ရ။
အပ္ဍဲဒေသပက်တဳယာ၊ ပက်ကတဳကာ ကေုာံ ကူနာတံ ဂှ် နူကဵုပါကေတ်သတာန် ကၠောန်လဝ် ပေါဲဗတိုက်ပၞာန်ကျာတံရောၚ်။
အပ္ဍဲကဵုပေါဲဗတိုက်တံဂှ် ရဲဆီက္တဵု ၂၅ တၠ ချိုတ်အာနွံတုဲ လွဟ်မကမ် သီုကဵုကပေါတ်ပၞာန် ဗွဲမဂၠိုၚ်တံဂှ် ပလီုလဝ်ကီုရောၚ် သာ်ဝွံ ဝန်ဇၞော်ကေၚ်ကာအပ္ဍဲဍုၚ် ပါကေတ်သတာန် အတူလာ တာရာ ချူလဝ် ပ္ဍဲဇာဖိုၚ်မှာဇန်ရ။
ပ္ဍဲဒေသပါဂျွာ ရးပါတွန် ခါတွာခါ လပါ်သၟဝ်ကျာ ပယျဵုၜါဍုၚ်ဂှ်လေဝ် နူပါသတတာန် ထပက်လဝ် ပရေၚ်လဝေၚ်ပၞာန် ဗလးတိတုဲ ရဲဆီက္တဵု ၄ တၠ ဆက်စပ်မံၚ်ကဵု ဂကောံဂျာမာတ် အူအာရာ ချိုတ်အာလဝ်ရောၚ် နူကဵုဒပ်ပၞာန်ပါကေတ်သတာန် ဟီုလဝ်ရ။
ဆဂး အပ္ဍဲပရေၚ်ပေါဲဗတိုက် ပါကေတ်သတာန်တံဂှ် ညးဍုၚ်ကွာန် ၃၈ တၠ ချိုတ်အာလဝ်နွံတုဲ ညးဗြဴ၊ ကောန်ၚာ်တံပါလုပ်မံၚ် ၁၆၃ တၠတံ ဒးလဝ်ဝပ်နွံမံၚ် ညးအခေါၚ်ဟီုဂးနွံ အလဵုအသဳအာဖဂါန်နိသတာန် ဟမ်ဒူလာ ဖဳရက် သ္ဂးရ။
ကြဴနူပရေၚ်ဗတိုက်ပၞာန်ကျာ အလန်ဒုတိယ က္တဵုဒှ်လဝ်တုဲ ပရေၚ်ဒးရီုဗၚ်ဟံၚ်ပြာ်တံ ကဵုလဝ်ညးဍုၚ်ကွာန်တံကီုရောၚ် ဒုညးဇၞော်ဒေသ ဆမ်ခါနဳ ခါလေတ် အာမေတ် ဆာဂျက် ဟီုလဴရ။
အပ္ဍဲပါကေတ်သတာန်ဂှ် မွဲဒၞာဲဓဝ်ဟေၚ် ပရေၚ်ဗတိုက်ပၞာန်ကျာ ၜါဝါဆက်က် ကၠောန်လဝ်ရောၚ် ဂွံတီကေတ်ရ။
နူကဵုဒပ်ပရေၚ်ဂီုကၠီု ပါကေတ်သတာန်တံဂှ် အာဗတိုက်လဝ် ဒၞာဲရဲဆီက္တဵုတံ အောပ်ဗ္ဒးမံၚ် အပ္ဍဲအာဖဂါန်နိသတာန်တေံရောၚ် သာ်ဝွံ အတူလာ တာရာ ဟီုကဵုလဝ်ရောၚ်။
Ref:Reuters