လှာဒကှ်၊ ဂျောန် ၂၉
အပ္ဍဲတွဵုရးကရေၚ် ပွိုၚ်ဍုၚ်လှာဒကှ် သွက်ဂွံကလေၚ်သီကေတ်ဍုၚ်ကျာ်ပိမာန်ဂှ် ဒပ်ပၞာန်သီအဝဵု စကာဇြဟတ်ကောန်ပၞာန်ၜိုတ် ၁၀၀၀ တုဲ သွက်ဂွံဗိုင်ကၟာတ်ဆိုအ်စဳဇန်မံၚ်ရောၚ် ရိုဟ်ကၞက်ပရိုၚ်ပၞာန် အပ္ဍဲဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
စနူၜိုတ်သတ္တဟဒုတိယ ဂိတုဂျောန်ဏံတုဲ ဇြဟတ်ကောန်ပၞာန် ၃၀၀ ပြၚ်တံဂှ် နူကဵုဂၠံၚ် လှာဒကှ်-ကျာ်ပိမွဲကဆံၚ် စိုပ်မံၚ် အပ္ဍဲဒၞာဲ (ရဲဒေသကော်)”မူဂျာဒိက်” ဗ္ဒာဲဍုၚ်ကျာ်ပိရ။
တုဲပၠန် ပါ်လဝ်ကရောၚ်ပၞာန် ၃ ကရောၚ်တုဲ နူဂၠံၚ်လှာဒကှ်-ကျာ်ပိ၊ ရေဝ်၊ ဇြပ်ဗုတံဂှ် ဇက်တိုန်ကၠုၚ်မံၚ်ဂှ်ကီု ကရောၚ်ပၞာန် နူဂၠံၚ်ရေဝ်ကဵု ဇြပ်ဗုတံဂှ် တတ်ၜက်အာအပ္ဍဲတိဍာ်ဗော်ဍုၚ်မန်တၟိတုဲ အာမံၚ်လပါ်ကျာ်ပိတေံရောၚ် သ္ဂးရ။
ပရိုၚ်ဒပ်ပၞာန်သီအဝဵု ဂစာန်မံၚ် သွက်ဂွံကလေၚ်သီကေတ်ကျာ်ပိဂှ် ဒှ်ဍာံမံၚ်ရောၚ်တုဲ ပကောံလဝ်ဇြဟတ်ဒပ်ကီု ဗါန်ကာတၟိ ပလေဝ်ဒၞာလဝ်တံဂှ်လေဝ်ဂၠိုၚ်တိုန်မံၚ်ယျ သာ်ဝွံ ညးရိုဟ်ကၞက်ပရိုၚ်ပၞာန်မွဲတၠ ဟီုရ။
ကရောၚ်ပၞာန်ဒပ်ပၞာန်ဗၟာလ္ၚဵုတံလေဝ် စိုပ်မံၚ်ဗ္ဒာဲကွာန် ဒၞာဲတိဍာ်ဗော်ဍုၚ်မန်တၟိတုဲ ပ္ညဳပ္ညပ်သဳကၠဳမံၚ်ညးသ္ကံရောၚ် သ္ဂးရ။
ကရောၚ်ပၞာန် တိုန်ကၠုၚ်နူလပါ် ရေဝ်၊ ဇြပ်ဗုတံ စိုပ်မံၚ်ဗ္ဒာဲကွာန်ဝါဇြေန်၊ ကာန်နဳတံဂှ်ပရိုၚ်မံက်မံၚ်တုဲ ဟိုတ်နူလပါ် ဗော်ဍုၚ်မန်တၟိ ဟွံဒုၚ်တဲဏီတုဲ တတ်ၜက်အာနူဒေသညးတံ ဟွံဂွံဏီပုဟ် သ္ဂးရ။
ဟိုတ်နူကရောၚ်ပၞာန်ဒပ်ပၞာန်ဗမာ စိုပ်မံၚ်ဗ္ဒာဲတိဍာ် ဗော်ဍုၚ်မန်တၟိတုဲ ညးဒေသကွာန်ဝါဇြေန်၊ ဝါဗိုၚ်၊ ကွာန်ကြုၚ်လံၚ်တြေံ၊ ကွာန်အကျာံတံဖေက်လကိုတ်မံၚ်တုဲ ဂြိပ်ပါဲဒဴတိတ်အာနူဒေသအိုတ်ရ။
ကြဴနူဒပ်ပၞာန် ဗတိုက်သီကေတ်ဍုၚ်ကျာ်ပိဂှ် အကာဲအရာသွက်ဂွံပ္ညဳပ္ညပ်ကၠောန်အာ ပရေၚ်ကဵုကေတ်ညးသ္ကံ ကု ဂကောံထိၚ်ဒဝ်ဍုၚ်တံဂှ် ဒှ်မာန်ရ။
ဍုၚ်ကျာ်ပိဂှ် ဒပ်ပၞာန်ကရေၚ်ပတုဲဖဵု ဒဳမဝ်ကရေသဳ (DKBA) သ္ကိုပ်ကောပ်ကာဲဒေသပၞာန် စၟတ် (၂) ဒုသ္ကိုပ်ပၞာန် သဝ်အေဝါန် ထိၚ်ချုက်လဝ်တုဲ သွက်ဂွံကလေၚ်ပအပ်ကဵုဍုၚ်ကျာ်ပိဂှ် နူဒပ်ပၞာန်ဗၟာအာတ်မိက်လဝ် ဇရေၚ် DKBA ဟွံအောန်နူကဵု ၂ ဝါ နွံရောၚ်။
အပ္ဍဲဗွိုၚ်ဍုၚ်ကျာ်ပိကဵု ဒၞာဲပွဳပွူဗ္ဒာဲဗ္ဒာဲတံမ္ဂး ဂကောံ DKBA၊ BGF၊ ဗော်ဍုၚ်မန်တၟိ၊ KNU၊ PDF တံ အာကၠုၚ်ချဳဒရာၚ်မံၚ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media