မတ်မလီု၊ ဂျောန် ၂၉
အပ္ဍဲတွဵုရးမန် ဒပ်ပၞာန်သီအဝဵု ပံက်လဝ်ဘာတန်ဗတောန်ယိုက်ဝန်ပၞာန် လၟေၚ်ၚ်ဂိတုတံ စနူကဵုလၟေၚ် ၁ စဵုကဵုစိုပ်လၟေၚ် ၂၆ ဏံမ္ဂး ညးဒးဒုၚ်ပကောံလဝ်ကောန်ပၞာန်တၟိ လၟိဟ်ပေၚ်အာ ၅၄၀၀ တၠပြၚ်အာယျဂှ် အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံလဝ်ဂှ် ဂွံတီကေတ်ရ။
အပ္ဍဲဂိတုဂျောန် ၂၇ တုဲကၠုၚ်ဏံ ပ္ဍဲကဵုဘာတန်ဗတောန်ကွတ်ပၞာန်သ္ဇိုၚ် ဍုၚ်မတ်မလီု ဒၞာဲဌာန်ဂအုပ်ပၞာန်ရးအဂၞဲဂှ် ဂကောံအလဵုအသဳပၞာန် တွဵုရးမန်တံ အာဆဵုဂဗကဵုလဝ်ဇြဟတ် ညးဒးဒုၚ်ပကောံလဝ်ကောန်ပၞာန်တၟိ သွက်ဂွံတိုန်ဘာကွတ်ဗတောန်ယိုက်ဝန်ပၞာန် လၟေၚ် ၂၆ တံ မဒှ်ရ။
အတိုၚ်တၞးရုပ်စၟတ်သမ္တီ ပ္ဍဲပေါဲအာဆဵုဂဗဂှ်မ္ဂး သွက်တန်ဗတောန် ယိုက်ဝန်ပၞာန်ညးဍုၚ်ကွာန် လၟေၚ် ၂၆ ပံက်အာ အပ္ဍဲဂိတုဏံဂှ် နူကဵုတွဵုရးမန် ဒးဒုၚ်ပကောံလဝ်ကောန်ပၞာန်တၟိ ဟွံအောန်နူကဵု ၂၀၀ တၠ နွံမံၚ်ရ။
ညးဒးဒုၚ် ပကောံကောန်ပၞာန်တၟိ ဗွဲမဂၠိုၚ်တံဂှ် ရဲဒးဒုၚ်ရပ်အတေၚ်အဓ္ဓမတံ၊ ရဲဒးဒုၚ်တံၚ်ရပ်လဝ် ပဝ်တာတံ၊ ဖံက်ပကဝ်အမိၚ်ဒေသန္တရ ဂးတုဲ ရဲဒးအာယိုက်ဝန်ပၞာန်တံကီု မၞိဟ်လိၚ်ကေတ်လဝ်တံကဵု ညးဒးဒုၚ်ကော်ပကောံလဝ်တံ ပါလုပ်မံၚ်ရ။
အတိုၚ်ညးဒေသတံ ဟီုလဴလဝ်မ္ဂး ရဲဒးအာယိုက်ဝန်ပၞာန် လၟေၚ် ၂၆ တံဏံဂှ် အဟိန်အာကၠုၚ်မံၚ်လတူဂၠံၚ်ဂှ် ဒးဒုၚ်ရပ်ကော်ဏာဗွဲအတေၚ်အဓ္ဓမတုဲ ကြဴနူဂှ် ဒးဒုၚ်ပကောံဏာ ဗီုပြၚ်ကောန်ပၞာန်တၟိတံ မဒှ်ရ။
မွဲလပါ်ပၠန် ဒပ်ပၞာန်ပြံၚ်လဝ်ဗီုပြၚ် ဂကောံအလဵုအသဳတံဂှ် သွက်ဂွံကံက်ကေတ်စရၚ်ပၠုပ်ယၟုမၞိဟ် သၟတ်စိုပ်အဝဲလုပ်အဝေါၚ်ယိုက်ဝန်ပၞာန် အပ္ဍဲဒေသတံဂှ်တှ်ေ ဗက်ပလံၚ်ဗစိုပ်မံၚ် လိက်ရုၚ်ကော်တံ မဒှ်ရ။
သွက်ဂွံပၠုပ်အာစရၚ်ယၟုယိုက်ဝန်ပၞာန် ညးဒးဒုၚ်ကော်လဝ်တံမ္ဂး ညံၚ်ဂွံကၠုၚ်ပလံၚ်ဗစိုပ်ပရိုၚ်ဗိုန်န်ညိဂှ် ကဵုလဝ်စၞောန်ပ္ညုၚ်နွံတုဲ ယဝ်ရဆောတ်ယောၚ်အာမ္ဂး သွက်ဂွံကေတ်အာအရေဝ် နကဵုဥပဒေယိုက်ဝန်ပၞာန် ညးဍုၚ်ကွာန်ရောၚ် ကဵုသမ္တီ ဘပဠလဝ်ရ။
ဟိုတ်နူဒးဒုၚ်ကော်လဝ် ပရေၚ်ယိုက်ဝန်ပၞာန်တုဲ သၟတ်လ္ၚဵုတံ သွက်ဂွံပတိုန်လိက်အခေါၚ်ပရေၚ်အာတ်မိက် ဂွံဗၠးတိတ်နူယိုက်ဝန်ပၞာန်ဂှ် ဟွံဂွံအခိၚ်တုဲ မွဲအလန်ဓဝ် ဖေက်ဒးဒုၚ်ကော်ဏာပၞာန်ဂှ် ဒှ်မံၚ်ဒဝိၚ် ဂွိၚ်မံၚ်အိုတ်စောန်ရ။
ညးဒးဒုၚ်ကော်ပကောံ ပရေၚ်ယိုက်ဝန်ပၞာန်ဗွဲမဂၠိုၚ်တံဂှ် ကြဴနူစှ်ေအာ ဘာတန်ဗတောန်တုဲမ္ဂး ဒးဒုၚ်ပလံၚ်ဏာ မုက်ပၞာန်တေံ ဗွဲမပြဟ်ကီု အပ္ဍဲပေါဲဗတိုက်တံမ္ဂး ပရေၚ်ဒးဝပ်ချိုတ်အာလဝ် နွံမံၚ်ဗွဲမဂၠိုၚ်တုဲ ညးကလေၚ်စိုပ်ကၠုၚ် ဌာန်သ္ၚိဂှ် နွံမံၚ်ညိညိဓဝ်ရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – MOI