နေပျဳဒဝ်၊ ဂျောန် ၂၇
သွက်ပရေၚ်ၜိုဟ်လလမ် ညံၚ်ဂွံကၠုၚ်သဳကၠဳအိုတ်ညိဂှ် သမ္မတသီအဝဵု ဥူမေန်အံၚ်လှိုၚ် ထပ်ကော်ဘိက် ကုဂကောံရပ်လွဟ် ကောန်ဍုၚ်အရၚ်တံကီုလေဝ် အပ္ဍဲအခက်အခုဲပရေၚ်ဍုၚ်ဗၟာဂှ် ဟိုတ်နူ ဆက်တးပါဲစွံလဝ် ဂကောံဆေၚ်စပ်အဓိကတံတုဲ ဗၠေၚ်မံၚ်နူကဵု တၚ်တုပ်စိုတ်ဘုံ အာသဳယာန် ၅ တၚ် မဒှ်ရ။
ဟိုတ်နူနွံပၟိက် သွက်ဂွံပသောၚ်အာပရေၚ်ပဋိပက္ခ ပရေၚ်ဍုၚ်ကွာန် ကဵု ပဋိပက္ခရပ်လွဟ်တံတုဲ ကုဂကောံရပ်လွဟ်ကောန်ဍုၚ်အရၚ် EAO တံဂှ် မုလေဝ် လ္ပစွံလဝ်တၚ်စၟတ်ပိုၚ်ခြာမွဲသာ် ညံၚ်ဂွံသဳကၠဳအာဂှ် ညးဟီုလဝ် ပ္ဍဲကောံဓရီုကမ္မတဳဗဟဵု ထမံက်ရုပ်ရဴ ပရေၚ်ဇၞော်မောဝ် တောတက်ဒေသပယျဵု ကေုာံ ဂကူကောန်ဍုၚ်အရၚ် ကၠောန်ဗဒှ်လဝ် ပ္ဍဲကဵုဂျောန် ၂၆ ဂှ်ရ။
ဂကောံရပ်လွဟ်ကောန်ဍုၚ်အရၚ်တံ ယဝ်ရနွံမံၚ်ပၟိက်ကဵု ပရေၚ်ၜိုဟ်လလမ်ကွေံကွေံမ္ဂး ကၠုၚ်စိုပ်ရောၚ်ဒှ်တုဲ ယဝ်ရ ဟၟဲပၟိက် ပရေၚ်ၜိုဟ်လလမ်မ္ဂး ထ္ၜးဟိုတ်တုဲ တံၚ်လဝ်အခိၚ်ရောၚ် ဥူမေန်အံၚ်လှိုၚ် တင်စုတ်လဝ်ဒုဟ်ရ။
ညံၚ်ဂွံဂွံပရေၚ်ၜိုဟ်လလမ်ဂှ် နူကဵုဂၠံၚ်တရဴဂွံမာန်တံဂှ် သွက်ဂွံကၠောန်အာမဒှ်တုဲ မိက်ဂွံကဵုကၟိန်ဍုၚ်ခိုဟ်စရောၚ် ဟီုမံၚ်ကီုလေဝ် ဟိုတ်နူညးအာလဝ်က္ဍိုပ် ဒပ်ပၞာန်သီအဝဵုတုဲ ဂကောံပၠန်ဂတးတံ မံက်တိုန်ကၠုၚ်လဝ်ဂှ် သွက်ဂွံဆဵုဂဗသဳကၠဳအာ ပရေၚ်ကော်ဘိက်လဝ် ဟွံမွဲပုဟ်။
ပရေၚ်သွက်ဂွံပသောၚ်အခက်အခုဲဍုၚ်ဂှ် ပုဂ္ဂိုလ်ဂကောံ နွံပၟိက်ကဵု ဒးဟီုအရေဝ်တံဂှ် ညံၚ်ဂွံဆဵုဂဗသဳကၠဳမာန်ဂှ် ဒးဂစာန်အာရောၚ် နူကဵုဂကောံရပ်လွဟ် ကောန်ဍုၚ်အရၚ် ဒေါအ်ပန်ပှော် မဟာမိတ် ၇ ဂကောံ ညးအခေါၚ်ဟီုဂးနွံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပိုဲတံ ပ္ဍဲကဵုအရာဒးပသောၚ်အာ ပရေၚ်အခက်အခုဲဍုၚ်ဏံဂှ် ပုဂ္ဂိုလ်တံ ဂကောံတံ ဒးဟီုအရေဝ်ထေက်တံဂှ်ဟေၚ် ညံၚ်ဂွံပါလုပ်အာ ပေါဲသဳကၠဳပရေၚ်ဍုၚ်ကွာန် ညးဆေၚ်စပ်တံပါလုပ်သီုဖအိုတ်တုဲ အတိုၚ်ပိုဲတံဟီုမံၚ်လၟိုန်ဂှ် နွံမံၚ်ပၟိက်ကွေံကွေံရ။ ဆဂး စဟီုအရေဝ်ဗက်ဂှ် ညံၚ်ဂွံဂွံ အတိုၚ်ပိုဲမိက်ဂွံကဵုဒှ်ဂှ် ဝါတ်မံၚ်ဏီ။ နူအဆံၚ်ဏံ ပိုဲတံယဝ်ရဆဵုဂဗဆက်ဆောံအာတုဲ ဟီုကၠုၚ်အရေဝ်မာန်မ္ဂး ညးလဵုဂှ် ဒှ်ညးဆေၚ်စပ်၊ ညးလဵုဟွံဒှ် ညးဆေၚ်စပ်တံဂှ် တန်တဴလတူအကာဲအရာၜါလပါ်တံ ရန်တၟအ်ကဵု ဖဵုဂုဏ်ကၟိန်ဍုၚ်ပံၚ်ကောံဏံတုဲ ပ္ညဳပ္ညပ်အာ ပိုဲတံမွဲလဂါံတုဲမွဲလဂါံ ဂစာန်ဖန်ဖက်ရေၚ်တၠုၚ်အာမာန်ရောၚ် စၟဳစမံၚ်ရ” သာ်ဝွံ သ္ဂးရ။
စပ်ကဵုလၟေၚ်ကမၠောန် ပရေၚ်ၜိုဟ်လလမ် အပ္ဍဲကိုန်အစဳဇန်ပွိုၚ် ၁၀၀ တ္ၚဲဏံတုဲ ပ္ဍဲဂိတုအေဗရာ ၂၀ ဂှ် အလဵုအသဳပၞာန်ကော်ဘိက်လဝ် ဂကောံရပ်လွဟ်ကောန်ဍုၚ်အရၚ်တံ သွက်ဂွံသဳကၠဳအာ ပရေၚ်ၜိုဟ်လလမ်ရောၚ်။
ပြဟ်ဟ်ဏံမ္ဂး ဆၜိုတ်ကဵု ဂကောံရပ်လွဟ်ကောန်ဍုၚ်အရၚ် ဟွံကေၚ်ဒှ်လဝ်ပေါဲဗတိုက်ကဵု ဒပ်ပၞာန်တံကဵု ကမ္မတဳပ္ညဳပ္ညပ် ပရေၚ်ၜိုဟ်လလမ် ပရေၚ်ညဳသၟဟ်ကောန်ဂကူ NSPNC အလဵုအသဳပၞာန်တံဂှ် အကြာဏံ ဆဵုဂဗသဳကၠဳလဝ် ဗီုပလးတုဲရ။
ဆဂး မွဲဒမြိပ် ကုအလဵုအသဳညဳသၟဟ်ဂကူ NUG မံက်ဂတဝ်ကၠုၚ် ကြဴနူ ၂၀၂၁၊ PDF ကီု၊ ဂကောံပၠန်ဂတး ဒုင်သ္ဇိုၚ်ကဵု ပရေၚ်ကောန်ဂကူကေုာံ ဂကောံရပ်လွဟ်ကောန်ဍုၚ်အရၚ် ပါလုပ်မံၚ် ပ္ဍဲပရေၚ်ဗတိုက်သရိုဟ် သၞောတ်တၠအဝဵုပၞာန်တံဂှ် ကော်ဆဵုဂဗတုဲသဳကၠဳလဝ် ဟၟဲဏီပုဟ်။
ဟိုတ်ဂှ်မ္ဂး လတူဒပ်စဵုဒၞာညးဍုၚ်ကွာန် PDF တံကဵု ဂကောံပၠန်ဂတး တံဂှ်တှ်ေ ပရေၚ်ဂွံဆဵုဂဗသဳကၠဳလတူခုၚ် နကဵုနဲကဲပရေၚ်ဍုၚ်ကွာန် သွက်ဂွံဂၠာဲအာသွဟ်ဟွံသေၚ်တုဲ၊ ကဵုလုပ်ကၠုၚ်ဖျေံလွဟ် သွက်ဂွံလုပ်ကၠုၚ်ဂှ် အလဵုအသဳပၞာန် ဂစာန်ဖန်ဖက်ရေၚ်တၠုၚ် မံၚ်ရောၚ်။
ဟိုတ်နူလစွံစိုတ် လညာတ်ပရေၚ်ဍုၚ်ကွာန် တၞဟ်ခြာညးသ္ကံတုဲ ဒပ် PDF ဂကောံမံက်ကၠုၚ် ကြဴနူ ၂၀၂၁ တံဂှ် နကဵုသ္ကုတ် ပရေၚ်ၜိုဟ်လလမ်ကီု သီုလပါ်ပရေၚ်ဂီုကၠီုကဵုဖျုန်ကၠာတုဲ ဒးပသောၚ်အာရောၚ် ဥူမေန်အံၚ်လှိုၚ် ဟီုပတိတ်လဝ် ပ္ဍဲကဵု မဳဒဳယာပရိုၚ် ဍုၚ်အိန္ဒိယ ရ။
မွဲလပါ်ပၠန် ဟိုတ်နူပရေၚ်ထပက်ပၞာန်ကီု ဒပ်ပၞာန်ဗမာတံ ဆက်ဗတိုက်မံၚ်ပၞာန်ကျာနွံမံၚ်တုဲ ပွမကော်ဘိက်လဝ် ပရေၚ်ၜိုဟ်လလမ် ကုဂကောံရပ်လွဟ်ကောန်ဍုၚ်အရၚ် ပါလုပ်မံၚ် အပ္ဍဲကဵုပၠန်ဂတးတံဂှ် အရေဝ်ကဵုကမၠောန်ဟွံကိတ်ညဳတုဲ ဂလာန်ပတှ်ေဟၟဲပုဟ် ဟီုဂးမံၚ်အိုတ်ရ။
အလန်ဏံ ညံၚ်ဂွံဆဵုဂဗသဳကၠဳအာကဵု ဂကောံရပ်လွဟ် ကောန်ဍုၚ်အရၚ်တံဂှ် ဥူမေန်အံၚ်လှိုၚ် ထပ်ကော်ဘိက်ကၠုၚ်လဝ် ၜိုန်ရဟီုလဝ် ဟၟဲကဵုပရေၚ်ဒစးဒုၚ် စၟတ်ပိုၚ်ခြာတံကီုလေဝ် ပရေၚ်ဒှ်မာန်ဂှ် ဟီုအိုတ်ညိ၊ ယဝ်ရဟီုမံၚ် ပရေၚ်ဒှ်ဟွံမာန်တံမ္ဂး မုလဝ် ဂွံမာန်ဟွံသေၚ်ပုဟ် ညးဒစးဒုၚ်ကဵုလဝ်သတိ နွံမံၚ်ကီုရောၚ်။
အပ္ဍဲတၚ်တုပ်စိုတ်ဘုံ အာသဳယာန် ၅ တၚ်ဂှ်တုဲ ပေါဲသဳကၠဳ သီုညးဖအိုတ်ပါလုပ်မာန်တံဂှ် နူလပါ်ဒပ်ပၞာန် ၜိုတ်လဵုဒုၚ်တဲမာန် ရောဂှ် ကိစ္စဇၞော်ကွေံကွေံရောၚ် ညးအခေါၚ်ဟီုဂးနွံ ဗော်ပၠတရဴ ကောန်ဂကူချေၚ် CNF၊ ကောန်ဂကောံ ကံၚ်သဳပၠတရဴဖိတ်ဒရေဝ် SCEF သလာၚ် ထက်နဳ ဟီုသှ်ကဵုလဝ် ဌာန်ပရိုၚ်သြၚ်လောန်တိုၚ်မ်ရ။
အပ္ဍဲကဵုတၚ်တုပ်စိုတ်ဘုံအာသဳယာန် ၅ တၚ်တံဂှ်မ္ဂး ကောန်ထံၚ်ပရေၚ်ဍုၚ်ကွာန် ဒးဒုၚ်ရပ်လဝ်တံဂှ် သွက်ဂွံဗလးကဵု ၊ ပရေၚ်ပကီုပရာတ်တံဂှ် ညံၚ်ဂွံဒေါအ်ထောံ ၊ ကုဂကောံဆေၚ်စပ် သီုဖအိုတ်တံဂှ် သွက်ဂွံဆဵုဂဗသဳကၠဳကေုာံ သွက်ဂွံကဵုအာအထံက်ပၚ် ပရေၚ်ဓရ်ဗ္စာရဏာမၞိဟ်တံ စနူတၚ်တံဏံ ပါလုပ်မံၚ်ရ။
ဆဂး နူကဵုလပါ်အလဵုအသဳပၞာန် ထမံက်ရုပ်ရဴဒ္ဂေတ်ဗက် ပရေၚ်တံဏံဟၟဲတုဲ ပ္ဍဲကောံဓရီုက္ဍိုပ်သ္ကိုပ်အဆံၚ်သၠုၚ် အာသဳယာန် တံဂှ် သ္ပစၞးဍုၚ်ဗၟာတုဲ ဥူမေန်အံၚ်လှိုၚ် စဵုကဵုတ္ၚဲဏံဒးဒုၚ်ကၟာတ်လဝ် အခေါၚ်တိုန်ကောံဓရီုဏီရောၚ်။
အပ္ဍဲအကာဲအရာဏံမ္ဂး စပ်ကဵုတၚ်တုပ်စိုတ်ဘုံတုဲ နူကဵုဂကောံ အလဵုအသဳကၟိန်ဍုၚ်တံ သွက်ဂွံကလေၚ်လ္ၚတ်သ္ၚဳဂၠိပ် ဗ္စာရဏာမာန်ဂှ် ညးစၞးစၠတ်ထဝ်ညးဍုၚ်ကွာန် ဒၞာဲဒေသဆန္ဒမာဲ ပွိုၚ်ဍုၚ်ကလဝ် ဒံက်တာနန္ဒာလှမျေအ် ပတိုန်လဝ်ဂလာန် ပ္ဍဲကောံဓရီု လၟေၚ်ဍာံ ဒုတိယ စၠတ်ထဝ်ကၟိန်ဍုၚ် အလန်တတိယ ကၠောန်ဗဒှ်လဝ် ဂိတုဂျောန် ၂၆ ဂှ်တုဲ သွက်ဂွံသဳကၠဳအာဂှ် သ္ပလဝ်ဒတန်တုဲယျ။
အတိုၚ်ညးပတိုန်ထ္ၜး ပၠုပ်လဝ်ဂလာန်မ္ဂး တၚ်တုပ်စိုတ်ဘုံ အာသဳယာန် ၅ တၚ်ဂှ် ပရေၚ်ကိတ်ညဳမံၚ်ကဵုအကာဲအရာဍုၚ်ဗၟာ လၟုဟ်ဏံဟၟဲတုဲ ဒှ်မံၚ်တၚ်ယုက်ဒေက် သွက်ဍုၚ်ဗၟာဂွံပါလုပ်အာ ဂကောံအာသဳယာန် ပရေၚ်အဆံၚ်တုပ်သၟဟ်တုဲ ပါဲနူဂှ်ပၠန် တၞဟ်ခြာ မံၚ်ကဵုသ္ဇိုၚ်မူအာသဳယာန် ပရေၚ်ဟွံလုပ်ပြံက် ကေၚ်ကာအပ္ဍဲဍုၚ် မွဲဍုၚ်ကဵုမွဲဍုၚ်ဂှ်ရောၚ် သ္ဂးရ။
ၜိုန်ရ နတဲဏံထမံက်ရုပ်ရဴ တၚ်တုပ်စိုတ်ဘုံအာသဳယာန် ၅ တၚ် ဟၟဲကီုလေဝ် နကဵုပရေၚ်ကလုတ်တမာန်မ္ဂး အလဵုအသဳပၞာန်တံ နွံမံၚ်ပၟိက်ကဵု အာသဳယာန်ကွေံကွေံရောၚ် ညးအုပ်ကာ ကံၚ်သဳမဳဒဳယာပရိုၚ်ဗၠးၜးဗၟာ ဥူတိုဝ်ဇြဝ်လာတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“နူလပါ်ဗော်ပျဳခိုၚ်ဖျိုဝ်ကဵု ဒပ်ပၞာန်တံ ကလေၚ်ဟီုကၠုၚ် သွက်ဂွံသ္ၚဳဂၠိပ်အာ ပရေၚ်ဏံရ။ ဇေတ်တ်မ္ဂး ကၠောန်မံၚ်လေဝ် ဟွံသေၚ်ပုဟ်။ တၚ်အဓိကဂှ် သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန်တံတုဲ ပေါဲသဳကၠဳ ပါလုပ်အာသီုညးဖအိုတ်တံဂှ် ဒှ်မံၚ်ဟွံသေၚ်ပုဟ်။ ညံၚ်ရဴသာ်ဂှ်ကီု သွက်ဂွံယှအ်ဖျေံအာ ပရေၚ်ပကီုပရာတ်တံဂှ် အလုံမွဲဍုၚ် ဗက်ဂေတ်ကြဳဗုၚ်မံၚ်ဂှ်လေဝ် (သွက်ဂွံဒေါအ်) ဂှ် ဒှ်ကၠုၚ်ဟွံမာန်ဏီပုဟ်။ တုဲပၠန် ကိစ္စဇၞော် သွက်ဂွံကဵုအာ အထံက်ပၚ် ပရေၚ်ဓရ်ဗ္စာရဏာမၞိဟ်တံဂှ် လၟုဟ်ကၠောန်မံၚ်နဲကဲကုတ်ပါ် ၄ သကုတ်ရ။ ရန်တၟအ်ကွေံကွေံမ္ဂး တၚ်တုပ်စိုတ်ဘုံ ၅ တၚ် နွံမံၚ်ကီုလေဝ် ဇေတ်တ်မ္ဂး မုလေဝ်ထမံက်မံၚ်ရုပ်ရဴဂှ် ညိလေဝ်ဟၟဲပုဟ်။ ဆဂး ဒှ်ဍာံရ နကဵုပရေၚ်ကလုတ်တမာန်မ္ဂး ဗၟာ (အလဵုအသဳပၞာန်) ဂှ် နွံမံၚ်ပၟိက်ကဵု အာသဳယာန်ဂၠိုၚ်ရောၚ်” သာ်ဝွံ သ္ဂးရ။
အလဵုအသဳပၞာန်ဂှ် သ္ပစၞးဍုၚ်ဗၟာတုဲ သွက်ဂွံကလေၚ်ပါလုပ်အပ္ဍဲဗွိုၚ် အာသဳယာန်ကီု ပရေၚ်သ္ပစၟတ်သမ္တီ ပရေၚ်ဍုၚ်ကွာန်လုပ်သၞောဝ်ဂှ် နွံမံၚ်ပၟိက်ကွေံကွေံရောၚ်။ ဟိုတ်ဂှ်မ္ဂး မူဝါဒအာသဳယာန် လတူဍုၚ်ဗၟာ ဂှ် သွက်လပါ်ဍုၚ်ပလိုတ်တံမ္ဂး ပါလုပ်မံၚ်ပ္ဍဲအရာကဏ္ဍ ကိစ္စဇၞော်ဇၞော်မွဲရောၚ် ဥူတိုဝ်ဇြဝ်လာတ် ထံက်ထ္ၜးလဝ်ရ။
အပ္ဍဲကောံဓရီုက္ဍိုပ်သ္ကိုပ်အဆံၚ်သၠုၚ် အာသဳယာန် ကၠောန်ဗဒှ်လဝ် ဍုၚ်အေန်ဒိုနဳယှာ ဂိတုအေဗရာ ၂၀၂၁ တေံဂှ် သွက်ပရေၚ်ကိစ္စ ဍုၚ်ဗၟာ သ္ဂုတ်သွာတ်ကဵုလဝ် တင်တုပ်စိုတ်ဘုံ ၅ တင် အခိၚ်တေံဂှ် အလဵုဇကု ဥူမေန်အံၚ်လှိုၚ် တုပ်လဝ်စိုတ်ကီုလေဝ် နတဲကွေံကွေံဂှ် မုလေဝ်ဒ္ဂေတ်ဗက်ကၠောန်ကဵုလဝ် ဟၟဲဏီပုဟ်။
နူကဵုကောံဓရီုက္ဍိုပ်သ္ကိုပ် အာသဳယာန်အဆံၚ်သၠုၚ် အလန် ၄၈ ကၠောန်ဗဒှ်လဝ် ပ္ဍဲဍုၚ်ဖိလေတ်ပိုၚ် ဂိတုမေတုဲကၠုၚ်ဏံဂှ် တၚ်တုပ်စိုတ်ဘုံ ၅ တၚ်ဏံဂှ်ရ သွက်ပရေၚ်ကိစ္စဗၟာမ္ဂး ဒှ်မူ ဒးသောၚ်ကလး အဓိကရောၚ် သာ်ဝွံ က္ဍိုပ်သ္ကိုပ်အာသဳယာန်တံ ဒုၚ်တဲထပ်သ္ပလဝ် ဒတန်အိုတ်ရ။
ပရိုၚ် – သြၚ်လောန်တိုၚ်မ်
Photo – HOS