မတ်မလီု၊ ဂျောန် ၂၉
အကြာဂကောံဇြဟတ်ပၠန်ဂတးတံကဵု ဂကောံပရေၚ်ဍုၚ်ကွာန် ဇကုကဵုဇကုတံမွဲစွံ နဲကဲသောၚ်ကေတ်ကဵုလွဟ်ဂှ် ညံၚ်ဟွံဂွံသုင်စောဲစကာအာ ဘိုၚ်စဵုဒၞာဗဒေါအ်ကဵုညိဂှ် ဂကောံဇြဟတ်ဒဳမဝ်ကရေဇြဳတံကီု ဂကောံပၠန်ဂတးတံကဵု ဂကောံမှာဇန် ညးဍုၚ်ကွာန် ၉၀ ပြၚ်တံ ပ္ဍဲဂိတုဂျောန် ၂၈ ဂှ် ပတိတ်လိက်ပံၚ်တောဲတုဲ ဗတိုက်ဖအောဝ်ဏာလဝ်ရ။
အဟိန်ပၠန်ဂတးတမ်ကညၚ် ဇက်တိုန်အာမံၚ်တ္ၚဲဏံဂှ် သွက်ဂွံထပိုတ်ရိုဟ်ကၞက် သၞောတ်တၠအဝဵုပၞာန်ပရေအ်ပရေအ်တံတုဲ သွက်အလုံညးဍုၚ်ကွာန်တံသီုဖအိုတ် ညံၚ်ဂွံဗၠးၜးတိတ်အာ နူဘဲဒဒိုက်တံမာန်ဂှ် ဒှ်မံၚ်အခေါၚ်အရာစၟတ်သမ္တီဝၚ်ဇၞော်ဇၞော်မွဲရောၚ် အပ္ဍဲလိက်ဗတိုက်ဖအောဝ် ချူထမံက်လဝ်ရ။
ပၠန်ဂတးလံကၠုၚ်ဟဍၚ် အကာဲအရာလစွံစိုတ်တံတၞဟ်ခြာအာတုဲ ပရေၚ်ဇီုကပိုက်လ္ၚဵုတံနွံကၠုၚ်ဂှ် ဒှ်လၟေၚ်ဓမ္မတာကီုလေဝ်၊ သ္ပပဓါန် ကေတ်ဇၞးကဵုဇြဟတ်လွဟ်တုဲ ဂစာန်ပသောၚ်ပြသၞာတံမ္ဂး အသိၚ်ပၠန်ဂတး ဒေါအ်ဒေၚ်အာမာန်တုဲ သွက်သၞဘုံ ဂကောံပၞာန်တံဂွံဆက်ဂျိုၚ်အာလမျီု ဒှ်အာမာန်ရောၚ် ကဵုလဝ်သတိနွံရ။
ပရေၚ်ဖံက်ပကဝ် အကြာဂကောံဇြဟတ်တံဂှ်သောၚ်ကလးအာကဵု ပရေၚ်ဓဝ်ဍာံကီု ညံၚ်ဂွံပ္ညဳပ္ညပ်သဳကၠဳသောၚ်ကလး နကဵုနဲကဲပရေၚ်ဍုၚ်ကွာန်တံမာန်ပတိတ်ဇြဟတ်တုဲ ဘိုၚ်ပူဗိုၚ်ရီုဗၚ်ကဵုညိဂှ် ကော်ဘိက်လဝ် သွက်ဂွံစပရေၚ်ချဳဒရာၚ် “ရန်တၟအ်ဗတိုက်သၞဘုံတုဲ ပတဝ်အာက္ဍိုပ် ဇရေၚ်ပရေၚ်ညဳသၟဟ်တေံ” မဒှ်ရ။
အကြာဂကောံတံမ္ဂး ပရေၚ်ဆက်ဆောံ နကဵုပရေၚ်ဍုၚ်ကွာန်တုပ်သၟဟ်ကီု မွဲလပါ်ကဵုမွဲလပါ် ညံၚ်ဂွံသ္ပစၟတ်သမ္တီ စွံအာပရေၚ်ရှ်ေသှ်ေညးသ္ကံ ဒးဒဂေတ်ကၠောန်ဗက်အာ အပ္ဍဲအကြာကာလပၠန်ဂတးဏံဂှ် ပတေဟ်ကေတ်လဝ်ရောၚ် ပ္ဍဲလိက်လလောၚ်တြး ချူထမံက်လဝ်ရ။
အခိၚ်လၟုဟ်ဏံမ္ဂး ပရေၚ်ဟွံပြေပြံၚ် အကြာဇကုကဵုဇကု ဒးဆဵုဂဗမ္ဂး လ္ပသောၚ်ကလးနကဵုနဲကဲလွဟ် သ္ပပဓာန်လဝ်ကဵုဇြဟတ်တံတုဲ အဆံၚ်တုပ်သၟဟ်ပရေၚ်ဍုၚ်ကွာန်ဂှ် ညံၚ်ဂွံသဳကၠဳဒက်ပတန်အာ ပရေၚ်ညဳသၟဟ်ဟေၚ် စဳရေၚ်ဖန်ဖက်ထေက်ရောၚ် သ္ဂးရ။
ပရေၚ်ညဳသၟဟ်ဂှ် ဒှ်လွဟ်ဇြဟတ်ထတ်အိုတ်တုဲ အတိုၚ်ဂှ်ဟေၚ် ညံၚ်ဂွံပါလုပ်ပံၚ်တောဲအာပ္ဍဲအရာပရေၚ်ချဳဒရာၚ် “ရန်တၟအ်ဗတိုက် သၞဘုံတုဲ ပတဝ်အာက္ဍိုပ် ဇရေၚ်ပရေၚ်ညဳသၟဟ်တေံ” နကဵုစိုတ်ဓါတ်လပါ်ခိုဟ်တဴတံ ပါလုပ်ကၠောန်အာညိဂှ် ဗတိုက်ဖအောဝ်လဝ်ဂှ် ဂွံဆဵုကေတ်ရ။
တၠပညာတံကီု၊ ညးစီုသကီုကွတ်၊ တၠကွတ်အနုသုခုမတံလေဝ် နူကဵုပရေၚ်ကဏ္ဍသွာၚ်ညးတံနာနာ အတိုၚ်ညးတံလေပ်ကေက်သကာ စီုသကီုမံၚ်တံဂှ်မွဲကဆံၚ် ညံၚ်တၚ်ရန်တၟအ်လဝ်ဟွံဂွံကၠေံဗ္ဒန်အာဂှ် နကဵုပရေၚ်သတိပညာနွံနွံ ဗတိုက်ဖအောဝ်ကၠောန်အာတုဲ ညံၚ်ဂွံဗိုၚ်ရီုဗၚ် ပ္ဍဲဇာဖိုၚ်မှာဇန်တံကဵုဗလးတိတံ မဒှ်ရ။
တုဲပၠန် မိမညးဍုၚ်ကွာန်တံပၠန်လေဝ် ဂလာန်လလောၚ် ရမျှာၚ်ကမြေဲ ကၚ်ပိၚ်၊ ပဝ်သတာတံကဵု လိက်ပရေၚ်တံဂှ် ညံၚ်ဂွံပါ်ပရအ် လ္တူအန်လာၚ်တံကဵုဗလးတိတံလှဲလှဲလးလးတုဲ နဒဒှ်ဇြဟတ်ဟရိုဟ်ညးဍုၚ်ကွာန်တံမွဲ ညံၚ်ဂွံပါလုပ်ဘိုၚ်ပူဗိုၚ်ရေၚ်တၠုၚ်အာညိဂှ် နူဂကောံ ၉၀ ပြၚ်တံ ဗတိုက်ဖအောဝ်လဝ်ရ။
ပရေၚ်ချဳဒရာၚ်ဏံဂှ် သွက်ဂွံတင်စုတ်ဒုဟ် လတူညးလဵုမွဲဟွံသေၚ်တုဲ သွက်ညးဂမၠိုၚ် ပရေၚ်ညဳသာသၟဟ်န်နွံနွံ ဂွံဇက်တိုန်အာတိုၚ်ပကဴ မွဲစွံမာန်ဂှ် သ္ဂံၚ်ပၠန်ဂတးတံကဵုမိမညးဍုၚ်ကွာန်တံ ပ္ဍဲကဵုပရေၚ်ကဏ္ဍညးတံ ရေၚ်တၠုၚ်မာန် ဗီုပြၚ်ဗၠးၜးတံဂှ် ညံၚ်ဂွံပါလုပ်ပံၚ်တောဲအိုတ်ညိ ပ္ဍဲကၚ်ပိၚ် ဘိက်ပၟိၚ်လဝ်ရောၚ်။
ပရိုၚ် – သြၚ်လောန်တိုၚ်မ်
Photo – PDF