မတ်မလီု၊ ဂျောန် ၂၉
အပ္ဍဲကဵုစၠတ်ထဝ်တွဵုရးမန် စပ်ကဵုတင်သ္ဂုတ်သွာတ် ဂလာန်ပတိုန်ထ္ၜးအံၚ်ဇၞးအာလဝ် သွက်ဂွံကၟာတ်ဗဒေါအ် ဝိုၚ်ဝေၚ်အခိၚ်ဇမၠိၚ် ညံၚ်ရဴ ဂွံလဝ်အခေါၚ်လုပ်သၞောဝ်တံဂှ် အလဵုအသဳဒပ်ပၞာန်စးအသံတုဲ ဆက်ကဵုလဝ်အခေါၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဂလာန်ပၠုပ်လဝ် သွက်ဂွံကၟာတ်ဗဒေါအ်အာပရေၚ်ဝိုၚ်ဝေၚ်တံဂှ် ပ္ဍဲကဵုကောံဓရီု စၠတ်ထဝ်တွဵုရးမန် တုဲကၠုၚ်ဂိတုဂျောန် ၁၆ တေံဂှ် နူကဵုညးစၞးစၠတ်ထဝ်တွဵုရး ပွိုၚ်ဍုၚ်ကျာ်မြဟ် ဒေသဆန္ဒမာဲလၟိဟ် (၂) ဥူတဇြဝ် ပတိုန်ထ္ၜး ပၠုပ်ကၠုၚ်လဝ်ဂလာန်ရောၚ်။
စပ်ကဵုဂလာန်ဏံတုဲ ပ္ဍဲကောံဓရီုလၟေၚ်ဍာံဒုတိယဝါ စၠတ်ထဝ်တွဵုရးမန် အလန်တတိယ ဂိတုဂျောန် ၁၉ ဂှ် ညးစၞး ၅ တၠ ထံက်ဂလာန်သဳကၠဳလဝ်တုဲ နူကဵုစၠတ်ထဝ် ညးဒစဵုဒစးဟၟဲ သ္ပကဵုလဝ်ဒတန်နွံရ။
ၜိုန်ရ ဂလာန်ပၠုပ်လဝ်ဏံ အံၚ်ဇၞးအာကီုလေဝ် ဝိုၚ်ဝေၚ်ပံက်လဝ် အပ္ဍဲဒေသတံအခိၚ်လၟုဟ်ဂှ် ဟွံကေတ်ပေါဲဇာတ် ဗီုကၠာတေံတုဲ အပ္ဍဲၝောံခန်ဗြဲကျာလုၚ်ၚ်တံဂှ် ကၠောန်မံၚ်ဝိုၚ်ဝေၚ်ၜိုဟ်ဟ်သြိုဟ်ဟ်ဂှ် ဂွံဆဵုညာတ်တုဲ စပ်ကဵုဂလာန်စၠတ်ထဝ် သ္ပလဝ်ဒတန်ဂှ် အလဵုအသဳ တွဵုရးဒပ်ပၞာန် ညိလေဝ်ဟွံသ္ပဂရု ဆက်ကဵုလဝ်အခေါၚ် ပံက်လဝ်ဝိုၚ်ဝေၚ်တံဏံရောၚ် ဂွံတီကေတ်ရ။
ပြဟ်ဟ်ဏံ ဂလာန် သွက်ဂွံကၟာတ်ဗဒေါအ်ထောံ ဝိုၚ်ဝေၚ်တံ ၜိုန်ရအံၚ်ဇၞးလဝ်ကီုလေဝ် ဟိုတ်နူဝိုၚ်ဝေၚ်တံနွံမံၚ်တုဲ ပရေၚ်ဂီုကၠီုဟၟဲဂှ်ကီု ညးဆက်စပ်ကဵုဂကောံအလဵုအသဳတံရ ကၠောန်မံၚ်ဂှ်တုဲ ပ္ဍဲလက်ထက်အလဵုအသဳဏံမ္ဂး ပရေၚ်ဝိုၚ်ဝေၚ်တံဏံ ဆလံမှအိုတ်အာဒှ်ဟွံမာန်ပုဟ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ ။
“အဓိကဂှ် ဟိုတ်နူပရေၚ်ဝိုင်ဝေၚ်တံဏံ နွံမံၚ်တုဲ အကြာပွဳဗွိုၚ်သ္ၚိကၟိန်အိန်ထံၚ်တံကီု၊ ပ္ဍဲပွဳဗွိုၚ်ပရေၚ်မၞိဟ်တံကီု၊ ပ္ဍဲအရာပ်ပိုဲတံကဵု ဍုၚ်ကွာန်ပိုဲတံဂှ် ဂီုကၠီုဟၟဲပုဟ်၊ ကမၠတ် ရဲပၠံၚ်ၜးစတံ ဂၠိုၚ်တိုန်ရောၚ်၊ ပြသၞာတၞဟ်ဒှ်ဟွံထေက်တံ ပဵုက္တဵုဒှ်ကၠုၚ်ရောၚ်၊ ပရေၚ်ရပ်ဝိုၚ်ဝေၚ်တံဂှ် ဒှ်မံၚ်မၞိဟ်ဆက်စပ်မံၚ်ကဵုညးတံသၟး ကၠောန်မံၚ်ပရေၚ်တံဏံရ၊ အပ္ဍဲမွဲလက်ထက်အာယုက်ဏံမ္ဂး ဗီုပိုဲတံစၟဳစလဝ် အရာပရေၚ်ဇၞော်ဇၞော်ဂှ် ဒှ်ကၠုၚ်ဟွံမာန်ပုဟ် အဲထေၚ်ရ”သာ်ဝွံ သ္ဂးရ။
တုဲပၠန် ၜိုန်ရဂလာန်ပၠုပ်လဝ် သွက်ဂွံကၟာတ်ဗဒေါအ် ဝိုၚ်ဝေၚ်တံ အံၚ်ဇၞးလဝ်ကီုလေဝ် ပရေၚ်ဝိုၚ်ဝေၚ်တံ ဆက်နွံအာမံၚ်အပ္ဍဲဒေသဂှ် ထမံက်ထ္ၜးကဵုမံၚ်လက်သန် ပရေၚ်အဂတိနွံမံၚ်တုဲ ပါဲနူဂှ်ပၠန် ဒှ်မံၚ်ပရေၚ်ဖံက်ပကဝ် တင်သ္ဂုတ်သွာတ်စၠတ်ထဝ်ကၠးကၠးမးမးရောၚ် သာ်ဝွံ ညးဆက်ဟီုရ။
သွက်ဂွံကၟာတ်ထောံဝိုၚ်ဝေၚ်တံဂှ် ပ္ဍဲစၠတ်ထဝ် ၜိုန်ရသ္ပလဝ်ဒတန်ကီုလေဝ် နူအလဵုအသဳမုလေဝ်ဟွံကၠောန်ကဵုတုဲ အပ္ဍဲစၠတ်ထဝ်ဂှ် ဆၜိုတ်ကၠောန်ထ္ၜးလဝ် ပရေၚ်ဇာတ်သၟး ပ္ဍဲဗလးတိဇေတ်တ်ဂှ်မ္ဂး ဝိုၚ်ဝေၚ်တံ ဆက်နွံမံၚ်ဖိုဟ်ရောၚ် ညးဒေသမွဲတၠပၠန် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အလဵုအသဳ မုလေဝ်ဟွံကၠောန်ကဵုပုဟ်၊ ဒှ်ဆၜိုတ် ပရေၚ်ထ္ၜးဇာတ်မွဲရ အခိၚ်စိုပ်မ္ဂး ဗီုဏံရ ကၠောန်ထ္ၜးအာ ဗီုပြၚ်ထ္ၜးဇာတ်တံရ၊ စပ်ကဵုပရေၚ်ဝိုၚ်ဝေၚ်တံဏံဂှ် အံၚ်ဇၞးအာ ပ္ဍဲစၠတ်ထဝ်တုဲ ကၠောန်ကဵုဖအိုတ်ဏောၚ်ဟီုဂှ် ဟီုမံၚ်ပ္ဍဲစၠတ်ထဝ်တေံရ၊ ပ္ဍဲသၟဝ်ဏံမ္ဂး မုလေဝ်ဟွံဒှ်ကၠုၚ်ပုဟ်၊ အတိုၚ်ဏံဂှ် ဒှ်မံၚ်အတိုၚ်ဏံပၠန်ရ၊ လတူတေံသၟးဂှ် ထ္ၜးကဵုမံၚ်ဗီုပြၚ်နွံမံၚ်၊ ကွေံကွေံဂှ် ပ္ဍဲဗလးတိ ဝိုၚ်ဝေၚ်တံ ဆက်နွံမံၚ်အတိုၚ်ဏံရ၊ ၜိုဟ်ဟ်သြိုဟ်ဟ်ရ၊ ဒးကဵုဂှ်ကဵုအာ၊ ဒးပအပ်ဂှ်ပအပ်၊ ဒးကၠောန်ဂှ်ကၠောန်၊ အာမံၚ်အတိုၚ်ဏံရ” သာ်ဝွံ သ္ဂးရ။
မွဲလပါ်ပၠန်မ္ဂး ညံၚ်ဝိုၚ်ဝေၚ်တံဏံ ဂွံအိုတ်အးအာ အပ္ဍဲအကြာဒေသမာန်ဂှ် သၠုၚ်ပတိုန်အာအသိၚ် ပရေၚ်ရပ်စပ်ကေတ်အာအရေဝ်တံရောၚ် ပ္ဍဲကောံဓရီုဂကောံအလဵုအသဳ ဖျေံလဝ်သ္ဂုတ်သွာတ်တုဲယျ ဝန်ဇၞော်ပရေၚ်မၞိဟ် ဂကောံအလဵုအသဳတွဵုရးမန် ဥူတေန်ဇဝ်ထောန် သ္ဂးလဝ်ရ။
တုဲပၠန် ပရေၚ်ဝိုၚ်ဝေၚ်တံဏံဂှ် ညးတာလျိုၚ်အဆံၚ်ၚ်တံသွက်ဂွံထိၚ်ကြာပ် ရပ်စပ်အာ၊ ဝိုၚ်ဝေၚ်တံဏံ ညံၚ်ဂွံယအ်စှ်ေအာအိုတ်တုဲ ရိုဟ်ကၞက်ညံၚ်ဂွံပိုတ် ညံၚ်ဟွံဂွံကလေၚ်ဒှ်ကၠုၚ်ပၠန်ဂှ် ဗက်ဂၠာဲနဲကဲနာနာတုဲ ဆက်ကၠောန်အာရောၚ် သာ်ဝွံ ပ္ဍဲကဵုစၠတ်ထဝ် ညးကဵုလဝ်ကတိပါၚ်ကီုရောၚ်။
နူလပါ်အလဵုအသဳပၞာန် သွက်ဂွံကၟာတ်ထောံဝိုၚ်ဝေၚ် ၜိုန်ရကဵုလဝ်ကတိပါၚ်ကီုလေဝ် ပ္ဍဲကဵုဗလးတိဇေတ်တ်ဂှ်တှ်ေ ပ္ဍဲတွဵုရးမန် သီုကဵုအလုံ ၁၀ ပွိုၚ်ဍုၚ်ဂှ် ဝိုၚ်ဝေၚ်တံဆက်နွံမံၚ်တုဲ အကံက်ဝိုၚ်ဝေၚ်တံဂှ်လေဝ် ပဵုကံက်ပတိုန်လဝ်ရောၚ် ဂွံတီရ။
အပ္ဍဲကဵုတွဵုရးမန် ပရေၚ်ဝိုၚ်ဝေၚ် နူကဵုအဆက်အလဵုအသဳကၠာကၠာတေံဂှ် ညံၚ်ရဴလုပ်သၞောဝ် ကဵုလဝ်အခေါၚ်ဟၟဲကီုလေဝ် ကြဴနူကဵု ဒပ်ပၞာန်သီအဝဵုတုဲ ဝိုၚ်ဝေၚ်တံဏံဂှ် ညံၚ်ရဴပရေၚ်လုပ်သၞောဝ်မွဲ ကဵုကၠုၚ်လဝ်အခေါၚ်ဇၞော်ကဵုဇြဟတ် နွံမံၚ်ရောၚ်။
ပရိုၚ် – သြၚ်လောန်တိုၚ်မ်
Photo – CJ