ဍာ်ဗု၊ ဂျူလာၚ် ၁
အပ္ဍဲကွာန်ကာန်ဗံက် ပွိုၚ်ဍုၚ်ဍာ်ဗု ရးတနၚ်္သဳ သၟတ်ပိတၠ ဒးဒုၚ်ထဍေၚ်ပန်ရပ်ကၠေၚ်ဏာတုဲ သၟတ်မွဲတၠဂှ် ချိုတ်အာလဝ်နွံ ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
တုဲကၠုၚ်ဂိတုဂျောန် ၂၇ တေံ ပ္ဍဲကွာန်ကာန်ဗံက်ဂှ်တှ်ေ သွက်ဂွံယိုက်ဝန်ပၞာန် အဟိန်ဒပ်ပၞာန်သီအဝဵု ဗက်ထဍေၚ်ဂၠာဲရပ်မံၚ် သၟတ်ပိတၠတံဂှ် ဟိုတ်နူဟွံဒုၚ်ရပ် ဂြိပ်ပါဲအာတုဲ ဒးဒုၚ်ပန်ရပ်ဏာလဝ် မဒှ်ရ။
ဟိုတ်နူဒးဒုၚ်ပန်ရပ်ဏာတုဲ သၟတ်နူကဵုကွာန်ကာန်ဗံက် အာယုက် ၂၆ သၞာံ မွဲတၠ ဒးအာလဝ်မကမ်ဂှ် အဟိန်အာပလံၚ်မံၚ် ရုၚ်ဂဥုဲပွိုၚ်တိုက်ကာန်ဗံက် ဂိတုဂျောန် ၂၈ ဂှ် ချိုတ်အာရ။
သၟတ်သှ်ေမံၚ်ၜါတၠဂှ်တှ်ေ ဒပ်ပၞာန်သီအဝဵုတံရပ်ထိၚ်လဝ် အပ္ဍဲဌာန်ဂအုပ်ပၞာန်ဒပ်ဍာ် မောရဝတဳတုဲ စဵုကဵုစိုပ်ဂိတုဂျောန် ၃၀ ဂှ်လေဝ် ဟွံဗလးကဵုဏီ၊ မိမကၟိန်သ္ၚိဌာန်တံလေဝ် သွက်ဂွံအာဆဵုဂဗဂှ် ဟွံကဵုအခေါၚ်ပုဟ် သ္ဂးရ။
ဟိုတ်နူသၟတ်ပိတၠဏံ သုၚ်စောဲဂဥုဲၜူမာဲတုဲ အဟိန်ကၠုၚ်ရပ်ဍေံတံဂှ် ဟွံဒုၚ်ရပ်ဂြိပ်ပါဲအာဂှ် ဒးထဍေၚ်ပန်ဏာရောၚ် သာ်ဝွံ နူလပါ်ဒပ်ပၞာန် တြးလဝ်ပရိုၚ်ရ။
အပ္ဍဲပွိုၚ်ဍုၚ်ဍာ်ဗုမ္ဂး ဒပ်ပၞာန်သီအဝဵုတံ ဗက်ထဍေၚ်ရပ်ကေတ်မံၚ် သၟတ်အပ္ဍဲဒေသတံနွံတုဲ နဲကဲဗီုပြေၚ်နာနာ ရပ်ကေတ်ပကောံမံၚ်ကောန်ပၞာန်တၟိကီု လုပ်ထဍေၚ်ဗက်ရပ်မံၚ်သၟတ်လ္ၚဵုတံ စဵုကဵုစိုပ်သ္ၚိတုဲ ပကောံကေတ်မံၚ်ကောန်ပၞာန်တၟိတံရ။
ပရိုၚ် – သြၚ်လောန်တိုၚ်မ်
Photo – Social Media