ၜဳကလေၚ်၊ ဂျူလာၚ် ၈
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ပေါဲဗတိုက်ဒှ်လဝ်ဒၞာဲကွာန်တိတ်တူကုန်ဂှ် လပါ်ဒပ်ပၞာန်သီအဝဵု သီုညးတာလျိုၚ် ပါလုပ် ဟွံအောန်နူ ၃ တၠချိုတ်အာနွံတုဲ သ္ၚိဌာန်ညးဍုၚ်ကွာန်တံဒးဒုၚ်စံၚ်ပလီုလဝ်ရောၚ် ဂွံတီကေတ် နူရိုဟ်ကၞက်ပရိုၚ်ပၞာန် အပ္ဍဲဒေသတံရ။
စနူဂိတုဂျူလာၚ် ၅ အခိၚ်ဂယးၜိုတ် ၄ နာဍဳ နူကဵုဒပ်ပၞာန် ဇြဟတ် ၂၀၀ ပြၚ်ထပက်ကရောၚ်ပၞာန်တုဲ လုပ်ကၠုၚ်ကွာန်တိတ်တူကုန် အခိၚ်စိုပ်ကၠုၚ်လပါ်ကုန်ကျာ်ဂှ် ပေါဲဗတိုက်ဒှ်လဝ်ကဵုဒပ်ပံၚ်တောဲ KNLA တံ သ္ဂးရ။
အပ္ဍဲပေါဲဗတိုက်ဒှ်လဝ် ပွိုၚ်ၜါတ္ၚဲဆက်ဆက်ဂှ် သ္ၚိဌာန်ညးဍုၚ်ကွာန်အပ္ဍဲကွာန်တံ ဒပ်ပၞာန်စံၚ်ပလီုထောံလဝ်နွံမံၚ် တမ်ရိုဟ်ကၞက်ပရိုၚ်ပၞာန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အပ္ဍဲပေါဲဗတိုက်ဂှ် လပါ်ဒပ်ပၞာန် ဗိုလ်ဇၞော် ၁ တၠကီု ဟွံအောန်နူ ၃ တၠချိုတ်အာတုဲ ကွဳစက်ဒပ်ပၞာန်ဍိုက်ကၠုၚ်လဝ် ၃ မဂှ်ကီု သီုကဵုကပေါတ်ပၞာန်လ္ၚဵုတံသှ်ေၜက်ဒၟံၚ်ရ။
ဒပ်ပၞာန်ဗမာဒးဒုၚ်ဗတိုက်ဂိလောန်အာဂှ်ရ စံၚ်ပလီုထောံသ္ၚိဌာန် ညးဍုၚ်ကွာန် ၜိုတ် ၁၅ မ ပၟတ်တူလီုလာ်အာနွံတုဲ ညးဒေသတံလေဝ် ဒးဂြိပ်ပါဲဒဴမံၚ်သီုအလုံမွဲကွာန်ရောၚ် ဂွံတီကေတ်ရ။
အပ္ဍဲဂိတုဂျူလာၚ် ၃ တေံလေဝ် လတူဂၠံၚ်ကွဳစက် လ္ဂုၚ်-မတ်မလီု ဗ္ဒာဲကွာန်တံၚ်ကလေဝ် ပွိုၚ်ဍုၚ်ၜဳကလေၚ်ဂှ် ဒပ်ပၞာန်သီအဝဵုဒးဒုၚ်ဗတိုက်ကဵုဒရုၚ်တုဲ ညးဒးဘဲဝပ်နွံလဝ်ကီုရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ