မတ်မလီု၊ ဂျူလာၚ် ၈
အပ္ဍဲတွဵုရးမန် ဍုၚ်မတ်မလီု သွက်ဂွံပၠုပ်စရၚ်ယၟုယိုက်ဝန်ပၞာန် ဟိုတ်နူကော်ကေတ်မံၚ်တုဲ သၟတ်ဗွဲမဂၠိုၚ် ဂြိပ်ပါဲဒဴအာနွံမံၚ် ညးဍုၚ်ကွာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
တုဲကၠုၚ် ဂိတုဂျောန် စနူသတ္တဟလက္ကရဴအိုတ်တေံတုဲ သၟတ်အဝဲလုပ်အဝေါင်ယိုက်ဝန်ပၞာန် နွံပ္ဍဲအရာပ်တံဂှ် ဒပ်ပၞာန်ပြံၚ်လဝ်ဗီုပြၚ်ဂကောံအလဵုအသဳတွဵုရးမန် ဗက်ပလံၚ်ဗ္စိုပ်မံၚ်လိက်ရုၚ်ကော်တံ စဵုကဵုစိုပ်သ္ၚိဌာန်ညးတံရောၚ်။
သၟတ်လ္ၚဵု ရဲဒးဒုၚ်ပလံၚ်လဝ်လိက်ရုၚ်ကော် သွက်ယိုက်ဝန်ပၞာန်တံဂှ် ဂြိပ်ပါဲတိတ်အာလပါ်ဍုၚ်သေံကဵု ဍုၚ်မလေယှာ နကဵုဂၠံၚ်ဟွံလုပ်သၞောဝ်နွံမံၚ်တုဲ သၟတ်လ္ၚဵုတံပၠန် ဆုဲပြံၚ်စဴအာဌာန်ဒၞာဲဝါဲတြေံတံလေဝ် နွံမံၚ်ကီုရောၚ် သ္ဂးရ။
သၟတ်ဒးဒုၚ်ကော်လဝ် သွက်ဂွံပၠုပ်စရၚ်ယၟုယိုက်ဝန်ပၞာန်တံဂှ် ညိဟွံဂွံယောၚ်ယာ ညံၚ်ဂွံကၠုၚ်ပလံၚ်ပရိုၚ်ဗိုန်န်ညိဂှ် စၞောန်ပ္ညုၚ်လဝ်တုဲ၊ ယဝ်ရဆောတ်ယောၚ်အာမ္ဂး ကေတ်အရေဝ်နကဵုဥပဒေ ယိုက်ဝန်ပၞာန်ညးဍုၚ်ကွာန်ရောၚ် ဂကောံကော်ပရေၚ်ယိုက်ဝန်ပၞာန် ပွိုၚ်ဍုၚ်မတ်မလီု ဘပဠလဝ်ရ။
အတိုၚ်ၝောံပိုဒ် ၂၄ ဥပဒေ ယိုက်ဝန်ပၞာန်ညးဍုၚ်ကွာန်မ္ဂး ယဝ်ရဂြိပ်ပါဲနူကဵု ပရေၚ်ကော်ယိုက်ဝန်ပၞာန်မ္ဂး ဒးဒုၚ်ဒုဟ်ထံၚ်ဟွံအောန်နူ ၅ သၞာံဒှ်ဒှ်၊ တပ်ဒဏ်သြန်ဒှ်ဒှ်၊ ဒုဟ်ဒဏ်သီုၜါသာ်ဒှ်ဒှ် ခၞံလဝ်သၞောဝ်နွံရောၚ်။
သၟတ်ဒးဒုၚ်ကော်လဝ် သွက်ယိုက်ဝန်ပၞာန်တံဂှ် ဟိုတ်နူဟွံဂွံအခိၚ်ပတိုန်လိက်အာတ်မိက် ပရေၚ်ဗၠးၜးနူတာလျိုၚ်တုဲ ဒှ်မံၚ်ဒဝိၚ်ဖေက်ဒးဒုၚ်စုတ်ပကောံဏာ ကောန်ပၞာန်ပြဟ်ဟ်တုဲ ဂြိပ်ပါဲဒဴမံၚ်အိုတ်ရောၚ် ရဲမံၚ်လ္တူဍုၚ်တံ သ္ဂးရ။
ဟိုတ်နူပရေၚ်ကော်ယိုက်ဝန်ပၞာန်တုဲ ဘဲအန္တရာဲရိုဟ်ကၞက်မၞိဟ် အပ္ဍဲဒေသတံ ပဵုတုဲဒးဆောံလေၚ်အာ ဒှ်ကၠုၚ်မာန်ရောၚ် ညးသ္ၚဳဂၠိပ် ပရေၚ်ဍုၚ်ကွာန်တံထံက်ထ္ၜးလဝ်ရ။
နူကဵုဌာနပရေၚ်စဵုဒၞာ ဂကောံအလဵုအသဳဒပ်ပၞာန် သ္ကိုပ်ပၞာန်ဇၞော် ထောန်အံၚ် ပ္ဍဲဂိတုမေတုဲကၠုၚ်တေံ စၞောန်ပ္ညုၚ်လဝ်သွက်ဂွံကော်အာ ပရေၚ်ယိုက်ဝန်ပၞာန်ဏံတုဲ ညးလုပ်အဝေါင်တံ ဒးပတိုန်စရၚ်ယၟု ကော်အာနကဵုသၞောတ် အလန်ညးကဵုညးရောၚ် သ္ဂးရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ်ပကောံဂွံလဝ်တံမ္ဂး ပ္ဍဲတွဵုရးမန် ဒပ်ပၞာန်သီအဝဵု ပံက်မံၚ်တန်ဗတောန်ယိုက်ဝန်ပၞာန်ညးဍုၚ်ကွာန် လၟေၚ်ဂိတု စနူလၟေၚ် ၁ စဵုကဵုလၟေၚ် ၂၆ တံဂှ် သၟတ်နွံမံၚ်အပ္ဍဲဒေသ ဟွံအောန်နူကဵု ၅၄၀၀ တၠ ဒးဒုၚ်ပကောံဏာလဝ် နဒဒှ်ကောန်ပၞာန်တၟိ မဒှ်ရ။
ပရိုၚ် – သြၚ်လောန်တိုၚ်မ်
Photo – MOI