ဗြဝတဳ၊ ဂျူလာၚ် ၈
အပ္ဍဲတွဵုရးကရေၚ် လပါ်သၠုၚ်ကျာဍုၚ်ဗြဝတဳ သွက်ဂွံသီကေတ် ဒေသမေန်လက်ပါန်ကဵုဖလူဂှ် ဒပ်ပၞာန်သီအဝဵု ပံၚ်တောဲကဵု ဒပ်မၚ်ပယျဵု ကရေၚ် BGF ကေုာံ ဒပ် DKBA ပါ်တိတ်တံတုဲ ပ္ဍဲဂိတုဂျူလာၚ် ၇ ဂှ် နူကဵုဍုၚ်ဗြဝတဳမွဲကဆံၚ် ထပေၚ်စုတ်ဇြဟတ်ဗွဲမဂၠိုၚ်တုဲ လုပ်အာလဝ်ပ္ဍဲလပါ်ဍုၚ်တၟိလေဝ်ကေကဝ်ရဂှ် ရိုဟ်ကၞက်ပရိုၚ်အပ္ဍဲဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲသတ္တဟတုဲကၠုၚ်တေံ နူကဵုတွဵုရးမန်မွဲကဆံၚ် ဒပ်ပၞာန်သီအဝဵုထပ်ပလံၚ်ဗ္စိုပ်လဝ်ဇြဟတ်ပၞာန် အပ္ဍဲပွိုၚ်ဍုၚ်ဗြဝတဳ တွဵုရးကရေၚ်တုဲ ဂိတုဂျူလာၚ် သတ္တဟကၠာအိုတ်ဂှ် နူတမ်ဒပ် ခလရ ၂၇၅ ဖျေံသ္ဇိုၚ် ဍုၚ်ဗြဝတဳဂှ်မွဲကဆံၚ် ဇြဟတ်ပၞာန် ၜိုတ်ပွဳပွူ ၁၀၀၀ ပလံၚ်ဗ္စိုပ်ကဵုမံၚ် လပါ်ဍုၚ်တၟိ လေဝ်ကေကဝ် နကဵုဂၠံၚ်ဍာန်နာနာတံ နွံရောၚ်။
မွဲကရောံကဵု တမ်ဒပ်သၟဝ်တဲဒပ်ပၞာန်ဗၟာ သွက်ဂွံထပက်အာကရောၚ်ပၞာန်တံဂှ် ဒပ်မၚ်ပယျဵုကရေၚ် BGF ပွိုၚ်ဒပ်စၟတ် ၄ ဒပ်ဗိုလ်မုက်တုၚ် က္ဍိုက်ပ်ကေုာံ ဒပ် DKBA ပါ်တိတ် ဗိုလ်ဗိတံလေဝ်ပါမံၚ်ကီုရောၚ် ရိုဟ်ကၞက်ပရိုၚ်ပၞာန်အပ္ဍဲဒေသတံ သ္ဂးရ။
ကွာန်မေန်လက်ပါန် ကွာန်ဖလူ ဗ္ဒာဲဍုၚ်တၟိလေဝ်ကေကဝ် လပါ်သၠုၚ်ကျာ ဍုၚ်ဗြဝတဳ နွံမံၚ်ဗ္ဒာဲပယျဵုသေံ-ဗၟာတံဂှ် နူကဵုဒပ်ပၞာန်ဗမာ၊ BGF၊ ဒပ် DKBA ပါ်တိတ်တံ ချိၚ်လဝ်အပ္ဍဲ ၃ ဂိတုဏံ ညံၚ်ဂွံသီကေတ်မာန်ရောၚ် တမ်ရိုဟ်ကၞက်ပရိုၚ်ပၞာန် အပ္ဍဲဒေသမွဲတၠ သ္ဂးလဝ်ရ။
ပရေၚ်သွက်ဂွံကလေၚ်သီကေတ် တိဍာ်ဒေသကွာန်မေန်လက်ပါန် ဖလူ နွံသၟဝ်တဲဒပ် KNU တံဂှ် နူဒပ်ပၞာန် ထပက်မံၚ်ကရောၚ်ပၞာန် ဗတိုက်မံၚ်လံကၠုၚ်ကဵုဂိတုတံရောၚ်။
ဆဂး ဟိုတ်နူပရေၚ်ဒးဝပ်ချိုတ်အာဂၠိုၚ်နွံတုဲ ရန်တၟအ်ပရေၚ်ပၞာန် ဟွံအံၚ်ဇၞးဟွံစိုပ်ဒတုဲဂှ်ရ အာတ်မိက်အရီုဗၚ် ဒပ် BGF ကဵု DKBA ပါ်တိတ်တံတုဲ သွက်ဂွံကလေၚ်ထပ်ဗတိုက်အာပၠန်ဂှ် ပလေဝ်ဖန်ဖက်မံၚ် မဒှ်ရ။
ပ္ဍဲအကြာပွိုၚ်တ္ၚဲတံဏံ ပ္ဍဲဒေသကွာန်မေန်လက်ပါန်ကဵု ဖလူ ဒၞာဲဒပ် KNU တံနွံမံၚ်ဂှ် နူဒပ်ကံၚ်သဳပၞာန် ပန်ဏာလွဟ်ဇၞော်တံကီု ပရေၚ်ထံက်ကၚ်ပရိုၚ်ဗလးကျာတံကီု ပါဲနူဂှ် ပေါဲဗတိုက်အကြာၜါလပါ်တံလေဝ် ဆက်ဒှ်မံၚ်ရောၚ် ညးဒေသဖလူမွဲတၠ သ္ဂးရ။
ဟိုတ်နူပေါဲဗတိုက်တံဒှ်ဂှ် မကမ်လွဟ်စှ်ေအာ ပ္ဍဲကွာန်မေအ်ကိုကေန် လပါ်တိဍုၚ်သေံတုဲ ညးတာလျိုၚ်ပရေၚ်အုပ်ဓုပ်ဒေသသေံတံ ကၟာတ်ထောံဂိက်သၞေဟ်ကၚ်ပယျဵုလ္ၚဵုတံ မွဲခဏယာယဳနွံတုဲ အလုံမွဲဒမြိပ်ပယျဵုဂှ်လေဝ် ဒပ်ပၞာန်သေံတံသၠုၚ်ပတိုန်လဝ် ဇြဟတ်ပရေၚ်ဂီုကၠီုနွံမံၚ် လိက်ပရိုၚ်သေံတံ ချူထမံက်လဝ်ရ။
ပရိုၚ် – သြၚ်လောန်တိုၚ်မ်
Photo – CJ