ဗြဝတဳ၊ ဂျူလာၚ် ၉
အပ္ဍဲတွဵုရးကရေၚ် လပါ်သၠုၚ်ကျာ ဍုၚ်ဗြဝတဳ သွက်ဂွံကလေၚ်သီကေတ် ဒေသမေန်လက်ပါန်ကဵုဖလူတံဂှ် ဒပ်ပၞာန်သီအဝဵုပံၚ်တောဲလဝ်ကဵု ဒပ် BGF၊ DKBA ပါ်တိတ်တံတုဲ စထပက်ပၞာန် ပ္ဍဲဂျူလာၚ် ၈ ဂှ် ပေါဲဗတိုက်က္တဵုဒှ်မံၚ်ကုဇြဟတ်ပၠန်ဂတး မဟာဒပ် ၆ KNLA သ္ကိုပ်သ္ကလဝ်တံဇၞော်ကဵုဇြဟတ်ရောၚ် ရိုဟ်ကၞက်ပရိုၚ် အပ္ဍဲဒေသတံသ္ဂးရ။
နူကဵုတွဵုရးမန် ဒပ်ပၞာန်ဗၟာ ထပ်ဗပေၚ်လဝ်ဇြဟတ် ပ္ဍဲသတ္တဟတုဲကၠုၚ်တေံဂှ် ပလံၚ်ဗ္စိုပ်လဝ် ပွိုၚ်ဍုၚ်ဗြဝတဳ တွဵုရးကရေၚ်ဗွဲမဂၠိုၚ်နွံတုဲ ဂိတုဂျူလာၚ်သတ္တဟကၠာအိုတ်ဂှ် နူဍုၚ်ဗြဝတဳတမ်ဒပ်ဖျေံလဝ်သ္ဇိုၚ် တေန်ဂါန်ညဳနံၚ်တံဂှ်မွဲကဆံၚ် လပါ်ဍုၚ်တၟိလေဝ်ကေကဝ်တေံဂှ် ပလံၚ်ကဵုလဝ်ဇြဟတ် ၜိုတ် ၁၀၀၀ နွံမံၚ်မဒှ်ရ။
အပ္ဍဲဂိတုဂျူလာၚ် ၇ ပွိုၚ်မွဲဗ္တံပေၚ်ၚ်ဂှ် ဒပ်ပၞာန်ဗၟာပန်ဏာလဝ်လွဟ်ဇၞော် လပါ်ဒေသဖလူကဵုမေန်လက်ပါန်နွံတုဲ၊ ဂိတုဂျူလာၚ် ၈ အခိၚ်နူဂယးဂှ် ဒပ်ပၞာန်ဗမာထပက်ကၠုၚ်ကရောၚ်ပၞာန် နူမေဝ်ဝါခဳတုဲ ပေါဲဗတိုက်ဒှ်မံၚ်ကဵု ဂကောံဇြဟတ်ပၠန်ဂတးတံရောၚ်။
ပေါဲဗတိုက်ၜါလပါ် က္တဵုဒှ်မံၚ် ဇၞော်ကဵုဇြဟတ်ပွိုၚ်မွဲတ္ၚဲပေၚ်ၚ်တုဲ လပါ်ဒပ်ပၞာန်ဂှ်တှ်ေ ကောန်ပၞာန်တၟိ စှ်ေနူဘာတန်ဗတောန်ယိုက်ဝန်ပၞာန်တံကီု ဒပ်ဗၠာဲသၟိၚ်တံပါလုပ်ဗတိုက်မံၚ်ကီုလေဝ် ရဲလပါ်ဒပ်ပၞာန်တံဂှ် ပရေၚ်ဒးဝပ်ချိုတ်ဂၠိုၚ်မံၚ်ရောၚ် ရိုဟ်ကၞက်ပရိုၚ်ပၞာန်မွဲတၠ သ္ဂးရ။
ကောန်ပၞာန်ဒးလဝ်ဝပ်ဘဲဒဏ် ပ္ဍဲပေါဲဗတိုက်တံဂှ် နူကဵုဒပ်ပၞာန်ဗၟာ ကလေၚ်ယိုက်ပလံၚ်ဖျဴဏာ လပါ်ဍုၚ်ဗြဝတဳဂှ် နူကဵုရိုဟ်ကၞက်ပရိုၚ်ပၞာန် ထပ်ဟီုဗပေၚ်လဝ်ရ။
သွက်ဂွံကလေၚ်သီကေတ် ဒေသလပါ်သၠုၚ်ကျာဍုၚ်ဗြဝတဳ အပ္ဍဲကဵုဒပ်ပၞာန်ဗၟာထပက်မံၚ်ကရောၚ်ပၞာန်တံဂှ်တှ်ေ ဂကောံရပ်လွဟ်ဒပ်မၚ်ပယျဵုကရေၚ် BGF ဒေသဗွိုၚ်ဒပ် စၟတ် ၄ ဗိုလ်မုက်တုၚ်တံကဵု ဒပ်ဗိုလ်ဗိ DKBA ပါ်တိတ်တံလေဝ်ပါလုပ်မံၚ်ကီုရောၚ် ဂွံတီရ။
အပ္ဍဲကာလကိုန်အစဳဇန်ပွိုၚ် ၁၀၀ တ္ၚဲဏံမ္ဂး ကွာန်မေန်လက်ပါန်ကဵုကွာန်ဖလူ နွံဗ္ဒာဲပယျဵုသေံ-ဗၟာ ဗ္ဒာဲဍုၚ်တၟိလေဝ်ကေကဝ် လပါ်သၠုၚ်ကျာဍုၚ်ဗြဝတဳတံဂှ် ဒပ်ပၞာန်ဗၟာသွက်ဂွံသီကေတ်အာ သီုဖအိုတ်ရောၚ် ရိုဟ်ကၞက်ပရိုၚ်ပၞာန်အပ္ဍဲဒေသ သ္ဂးလဝ်ရ။
သွက်ဂွံကလေၚ်သီကေတ် ဒၞာဲဒပ် KNU သီဂွံလဝ် တိဍာ်မေန်လက်ပါန်ကဵု ဖလူတံဂှ် ဒပ်ပၞာန်ဗၟာ ထပက်ကရောၚ်ပၞာန်ဗတိုက်ကၠုၚ်ဒၟံၚ် လံကၠုၚ်ဂၠိုၚ်ကဵုဂိတုကီုလေဝ် ဟိုတ်နူပရေၚ်ဒးဝပ်ချိုတ်ဂၠိုၚ်အာတုဲ ရန်တၟအ်ပရေၚ်ပၞာန်ညးတံဂှ် ဟွံစိုပ်လဝ်ပေါဲအံၚ်ဇၞးပုဟ်။
ဟိုတ်နူဂှ်တုဲ အာတ်အရီုဗၚ်ဒပ် BGF ကဵု DKBA ပါ်တိတ်တံတုဲ သွက်ဂွံထပ်ဗတိုက်အာပၠန်ဂှ် ဖန်ဇန်ပလေဝ်စမံၚ် မဒှ်ရ။
ဟိုတ်နူအကာဲအရာပေါဲဗတိုက်က္တဵုဒှ်မံၚ် ဗ္ဒာဲကရပ်ပယျဵုတုဲ ဒပ်ပၞာန်သေံသၠုၚ်ပတိုန်လဝ်ဇြဟတ် ပရေၚ်ဂီုကၠီုပယျဵုတုဲ ဂေတ်မံၚ်ကၚ် နကဵုကွဳစက်ပၞာန်တံနွံ လိက်ပရိုၚ်သေံတံချူထမံက်လဝ်ဂှ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media