သဓီု၊ ဂျူလာၚ် ၉
အပ္ဍဲတွဵုရးမန် မ္ၚးဍုၚ်သဓီု ညးဒေသရဲကွာန်ဝင်စိၚ် ၈ တၠ ဒပ်ပၞာန်ဗမာရပ်ဏာလဝ်တံဂှ် ၄ တၠ ကလေၚ်ဗၠးကၠုၚ်ကီုလေဝ် ၄ တၠ သှ်ေမံၚ်တံဂှ်ပရိုၚ်ကၠေံမံၚ်ဖိုဟ်ရောၚ် ရဲကွာန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲဂျောန် ၂၃ တုဲကၠုၚ်တေံဂှ် ဒပ်ပၞာန်သီအဝဵုတံ ဍိုက်လဝ်ကဵုဇြဟတ်လုပ်သလိပ်လဝ် ကွာန်ဝင်စိၚ်ဂှ် စောဲစပ်လဝ် ဆက်ဆောံကဵု PDF တံတုဲ ရပ်ကော်ဏာလဝ်ညးဒေသ ၈ တၠ မဒှ်ရ။
ကြဴနူကဵု ဒပ်ပၞာန်ဗမာ ရပ်ဏာလဝ်ဂှ် စၟဳစၟတ်သၟာန်သၟုက်လဝ် ညးဒေသမၞိဟ်တြုံၜါတၠကဵု ညးဗြဴၜါတၠတံ ၜိုတ်အခိၚ် ၂ သတ္တဟတုဲ ဂိတုဂျူလာၚ် ၆ ဂှ် ကလေၚ်ဗလးကဵု စဴသ္ၚိဌာန်ရ။
ဆဂး အဟိန်စၟဳစၟတ်သၟာန်သၟုက်လဝ်တေံ ဒပ်ပၞာန်ၜုၚ်တက်ပျဲပျာံတုဲ ညးကလေၚ်ဗၠးစဴကၠုၚ် ၄ တၠတံဂှ် ဒးလဝ်ဝပ် ဒဏ်ဗွဲမဂၠိုၚ်နွံရောၚ် သ္ဂးရ။
ညးဒေသသှ်ေမံၚ်မၞိဟ်တြုံ ၄ တၠ ဟွံဗၠးဏီတံဂှ် အခိၚ်ပြဟ်ဟ်ဏံပရိုၚ်ကၠေံမံၚ်တုဲ သွက်ဘဲအန္တရာဲလမျီုညးတံဂှ် ကောန်ဇာတ်သ္ၚိဌာန် ရဲကၟိန်အိန်ထံၚ်ညးတံ ဒှ်မံၚ်ဒွိၚ်နာနာသာ်ရောၚ်။
ကောန်ပၞာန် နူဘာတန်ဗတောန်သ္ဇိုၚ်ကွတ်ပၞာန် စၟတ် ၉ နူကဵုဍုၚ်သဓီုတံ အဟိန်လုပ်သလိပ်ဂၠိုက်ဂၠာဲလဝ် ကွာန်ဝင်စိၚ်ဂှ် ပၠံၚ်ကေတ်ဏာ ထဝ်၊ သြန်၊ ကွဳလိုန်ဓါတ်ကဵု ကပေါတ်လ္ၚဵု နွံကဵုၚုဟ်မး နူကဵုသ္ၚိဌာန်ညးဍုၚ်ကွာန်တံကီုရောၚ် ညးဒေသတံ ဟီုလဴတုဲဂွံတီရ။
ပ္ဍဲဂိတုဂျူလာၚ် ၂ တုဲကၠုၚ်တေံလေဝ် ပ္ဍဲတွဵုရးမန် ပွိုၚ်ဍုၚ်ကျာ်ထဝ် နူကွာန်စပ္ပနူ ညးဒေသမၞိဟ်တြုံ ၁ တၠ ဒပ်ပၞာန်သီအဝဵုရပ်ဏာလဝ်ဂှ် ပွိုၚ်မွဲတ္ၚဲဟွံပေၚ် ဒးဒုၚ်ၜုၚ်တက်ပျဲပျာံတုဲ ချိုတ်အာလဝ်ရောၚ် ဂွံတီကေတ် နူညးကွာန်တံရ။
ပရိုၚ် – သြၚ်လောန်တိုၚ်မ်
Photo – Social Media