နေပျဳဒဝ်၊ ဂျူလာၚ် ၉
နူသမ္မတသီအဝဵု ပလံၚ်ဗ္စိုပ်လဝ် သွက်ဂွံချူခၞံပတိုန် ဆေၚ်စပ်ကဵု ပလေဝ်သ္ဇိုၚ်သၞောဝ်ဥပဒေ ၂၀၀၈ ဂှ် ဆက်ဖန်ဖက်ရေၚ်တၠုၚ် အာရောၚ် ပ္ဍဲကောံဓရီုစၠတ်ထဝ်ကၟိန်ဍုၚ် အလန်တတိယ ကၠောန်ဗဒှ်လဝ် ဂိတုဂျူလာၚ် ၇ ဂှ် နာယကစၠတ်ထဝ် လလောၚ်တြးလဝ်ရ။
နကဵုစၟတ်တ္ၚဲ ၁ ဂိတုဂျူလာၚ်ဏံ နူရုၚ်သမ္မတ အလဵုအသဳဒပ်ပၞာန် ပလံၚ်ဗ္စိုပ်ကဵုလဝ် လိက်သဝဏ် ကုဇရေၚ်နာယကစၠတ်ထဝ်ကၟိန်ဍုၚ် ဆေၚ်စပ်ကဵုပရေၚ်ထေက်ကဵုဒးပလေဝ်ထပ်ဗပေၚ်အာ တၚ်နၚ် ၄၃ တၚ် ပ္ဍဲကဵုသ္ဇိုၚ်သၞောဝ်ဥပဒေ ၂၀၀၈ ဂှ်ရောၚ်။
တင်နၚ်ပါလုပ်မံၚ် အပ္ဍဲတံဏံ ၁၆ တၚ်မ္ဂး ဆေၚ်စပ်ကဵု ၝောံပိုဒ် သ္ဇိုၚ်ဥပဒေ ၄၃၆ (က) ကေုာံ ၝောံပိုဒ် ၄၃၆ (ခ) တင်နၚ်၂၇ တၚ်ပါလုပ်တုဲ တၞးဆာဲလိက်သဝဏ်ဂှ်လေဝ် ပါ်ပရအ်တြးကဵုလဝ် ဇရေၚ်ညးစၞးစၠတ်ထဝ်တံတုဲတုဲ မဒှ်ရ။
ဆဂး အပ္ဍဲတၚ်နၚ်ထေက်ကဵု ဒးပလေဝ်ထပ်ဗပေၚ်စုတ်အာတံဂှ် ပရူပရာဗီုလဵုပါလုပ်မံၚ် အပ္ဍဲတၚ်နၚ်ဗွဲအပြောံဂှ် နူလပါ်အလဵုအသဳ ဒပ်ပၞာန် ဟွံကဵုသမ္တီ လလောၚ်တြးလဝ်ဏီပုဟ်။
ယဝ်ရလ္ၚတ်ရံၚ်အာ တၚ်နၚ်ဆေၚ်စပ်ကဵု ၝောံပိုဒ် ၄၃၆ (က) မ္ဂး နူကဵုသ္ဇိုၚ်သၞောဝ်ဥပဒေ ၂၀၀၈ သ္ဇိုၚ်မူရးနိဂီုဍုၚ်ပါလုပ်မံၚ် ပ္ဍဲအခန် ၁ ကေုာံ စုတ်လဝ်ပ္ဍဲအခန် ၂ ဗီုပြၚ်ဒက်ပ္တန်ဍုၚ် တင်ချူခၞံတံ သီုဖအိုတ် မဒှ်ရ။
အပ္ဍဲအခန် ၃ ဂှ်မ္ဂး ပရေၚ်စၟတ်ပိုၚ်ခြာအစောံစရာဲသမ္မတ၊ ဒုသမ္မတ ကေုာံ လၟေၚ်ပရေၚ်ကမၠောန်ရုဲစှ်ခါန်ကၞက် သမ္မတတုဲ၊ အပ္ဍဲအခန်သှ်ေမံၚ် ၄၊ ၅ ၊ ၆ တံဂှ်မ္ဂး ဒှ်ပရေၚ်ခၞံပတိုန်သၞောဝ်၊ ပရေၚ်အုပ်ဓုပ်ကေုာံ ပရေၚ်စဳရေၚ်သၞောဝ်ဓဝ်တံ မဒှ်ရ။
တုဲပၠန် တင်ချူခၞံလဝ်အိုတ်သီု ဆေၚ်စပ်ကဵုတင်ချူခၞံ ပရေၚ်ကာလကာမံက်တိုန်တံဂှ် စုတ်လဝ်ပ္ဍဲအခန် ၁၁ တုဲ၊ ပ္ဍဲအခန် ၁၂ ဂှ်မ္ဂး နဲကဲဆေၚ်စပ်ကဵု တင်ချူခၞံပရေၚ်ပလေဝ်သ္ဇိုၚ်ဥပဒေတံပါလုပ်မံၚ်ဂှ် ဆဵုကေတ်ရ။
ယဝ်ရမိက်ဂွံပလေဝ်သ္ဇိုၚ်သၞောဝ်ဥပဒေ ၂၀၀၈ မ္ဂး ဒးပတိုန်ဥပဒေအပြောံ အပ္ဍဲစၠတ်ထဝ်ကၟိန်ဍုၚ်ကၠာတုဲ နူဂှ်မွဲကဆံၚ် ယဝ်ရညးစၞးစၠတ်ထဝ် သီုဖအိုတ် ၂၀ က္ဍိုပ်ကၠံတံ ပတိုန်ထ္ၜးကၠုၚ်ဥပဒေအပြောံဂှ်တှ်ေ နူကဵုစၠတ်ထဝ်ကၟိန်ဍုၚ် ဒးဒုၚ်တဲသဳကၠဳအာရောၚ်။
အတိုၚ်ၝောံပိုဒ် ၄၃၆ (က) မ္ဂး ယဝ်ရမိက်ဂွံပလေဝ် တင်ချူခၞံလဝ်တုဲမ္ဂး ညးစၞးစၠတ်ထဝ်ကၟိန်ဍုၚ် ဟွံအောန်နူ ၇၅ က္ဍိုပ်ကၠံ ဒးတုပ်စိုတ်ဒုၚ်တဲတုဲ ဒးကၠောန်ဗဒှ်ပေါဲဒုၚ်ဆန္ဒညးဍုၚ်ကွာန်တုဲ နကဵုဆန္ဒမာဲညးနွံအခေါၚ်ကဵုမာဲ ကဝက်ပြၚ်နွံမှ ဂွံအခေါၚ်ပလေဝ်ရောၚ်။
အပ္ဍဲၝောံပိုဒ် ၄၃၆ (ခ) ဂှ်မ္ဂး ပါဲနူတင်ချူခၞံ ထမံက်လဝ်ပ္ဍဲၝောံပိုဒ်ပါ် (က) တေံတုဲ သွက်တင်ချူခၞံတၞဟ်တံဂှ်မ္ဂး နကဵုမာဲထံက်ဂလာန် ညးစၞးစၠတ်ထဝ်ကၟိန်ဍုၚ် ဟွံအောန်နူကဵု ၇၅ က္ဍိုပ်ကၠံဂွံမှ ပလေဝ်အာဂွံရောၚ် ချူထမံက်လဝ်ရ။
စၠတ်ထဝ်မံက်ကၠုၚ်လဝ် နူကဵုပေါဲရုဲမာဲ ဂစာန်ဂၠာဲပါၚ်တြၚ်ပၞော်တိတ် ပရေၚ်ဍုၚ်ကွာန် ပရေၚ်ဒပ်ပၞာန်သီအဝဵုတံဂှ် ဥက္ကဌစၠတ်ထဝ်ဗွဲမဂၠိုၚ်ကီု ဥက္ကဌကမ္မတဳတံဂှ်ကီု ဒှ်မံၚ်သ္ကိုပ်ပၞာန်တြေံတံကဵု ရဲဗော်ပျဳခိုၚ်ဖျိုဝ်တံသၟးရ အုပ်ဂွံလဝ်ဂတာတဲရောၚ်။
တုဲပၠန် ညးစၞးဒပ်ပၞာန် ၂၅ က္ဍိုပ်ကၠံ ဟွံဒးဒုၚ်ရုဲစှ်တံကီု ပါဲနူဂှ် ညးစၞးစၠတ်ထဝ်နူဗော်ပျဳခိုၚ်ဖျိုဝ် ဒုၚ်ဓယံက်ဒပ်ပၞာန် ရဲဒေါအ်ဇူလဝ်နူဒပ်ပၞာန်တံလေဝ် ပါလုပ်မံၚ်အိုတ်ရ။
အပ္ဍဲအကာဲအရာဏံ ပရေၚ်အလဵုအသဳပၞာန်ကော်ဘိက်လဝ် ဆဵုဂဗသဳကၠဳပရေၚ်ၜိုဟ်လလမ် အပ္ဍဲကိုန်အစဳဇန်ပွိုၚ် ၁၀၀ တ္ၚဲဂှ် အခိၚ်ကိက်ညဳမံၚ်ကဵု နူရုၚ်သမ္မတပလံၚ်ဗ္စိုပ်ပတိုန်ထ္ၜးလဝ် သွက်ဂွံပလေဝ်အာသ္ဇိုၚ်သၞောဝ်ဥပဒေ ၄၃ တၚ် ပ္ဍဲစၠတ်ထဝ်ကၟိန်ဍုၚ် ရောၚ်။
အတိုၚ်လိက်သဝဏ်နူရုၚ်သမ္မတ ပလံၚ်ဗ္စိုပ်လဝ်ဂှ်မ္ဂး အပ္ဍဲကာလ ဒပ်ပၞာန်သီလဝ်အဝဵု လက်ထက်ကံၚ်သဳပၞာန်ဂှ် ဒက်ပ္တန်လဝ် ကမ္မတဳဗဟဵု၊ ကမ္မတဳပရေၚ်ကမၠောန် ကေုာံ ကမ္မတဳပ္ညဳပ္ညပ် ထမံက်ရုပ်ရဴ ညဳသၟဟ်ပရေၚ်ကောန်ဂကူကဵု ပရေၚ်ၜိုဟ်လလမ် ပိ ဂကောံတံ နွံရ။
အပ္ဍဲသၞာံ ၂၀၂၂ ဂိတုအေဗရာ ၂၂ ဂှ် ဥက္ကဌကံၚ်သဳပၞာန်က္ဍိုပ်သ္ကိုပ်ပၞာန်သီအဝဵု ဥူမေန်အံၚ်လှိုၚ် ကော်ဘိက်လဝ် ဂကောံရပ်လွဟ်ကောန်ဍုၚ်အရၚ်တံ သွက်ဂွံဆဵုဂဗသဳကၠဳ ပရေၚ်ၜိုဟ်လလမ်ရ။
ဟိုတ်ဂှ်ရ ဂကောံရပ်လွဟ်ကောန်ဍုၚ်အရၚ် ထ္ပက်လဝ်လိက်ကသုက်ပရေၚ်ဒေါအ်ပန်ပှော် ၇ ဂကောံတံကီု ဂကောံဟွံထ္ပက်လဝ်လိက်ကသုက် ၃ ဂကောံတံဂှ် နူကဵုကမ္မတဳ ပ္ညဳပ္ညပ်ထမံက်ရုပ်ရဴ ညဳသၟဟ်ပရေၚ်ကောန်ဂကူကဵု ပရေၚ်ၜိုဟ်လလမ် ကေၚ်ဆဵုဂဗသဳကၠဳလဝ် ၂၈ ဝါနွံကၠုၚ်လဝ်တုဲ၊ ပါဲနူဂှ် ဆဵုဂဗသဳကၠဳ ကဵု ဂကောံဂအုံဗော်ပရေၚ်ဍုၚ်ကွာန်တံ ၁၄ ဝါ နွံရောၚ်။
နူမွဲကဆံၚ် ပရေၚ်ဆဵုဂဗသဳကၠဳလဝ်တံဂှ် နူကဵုပရေၚ်ပ္ညဳပ္ညပ် ကုဂကောံရပ်လွဟ်ကောန်ဍုၚ်အရၚ်တံ ဂွံနၚ်လဝ် ၂၁ တၚ်နွံတုဲ ထေက်ကဵုတင်ဒးပလေဝ်ထပ်ဗပေၚ် ပ္ဍဲကဵုသ္ဇိုၚ်သၞောဝ်ဥပဒေ၂၀၀၈ ၄၃ တၚ်တံဂှ် ထ္ပက်စၟတ်တဲတုဲ တုပ်ကၠုၚ်လဝ်စိုတ် မဒှ်ရ။
ပရိုၚ် – သြၚ်လောန်တိုၚ်မ်
Photo – MOI