သဓီု၊ ဂျူလာၚ် ၁၀
အပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ်ကဵု သဓီု ဒှ်မံၚ်ဒၞာဲဒေသပရေၚ်အုပ်ဓုပ်ခရိုၚ်သဓီု မဟာဒပ် ၁ ဗော်သွးကောန်ဂကူကရေၚ် KNU တံဂှ် တုဲကၠုၚ်အပ္ဍဲမွဲဂိတုဏံ ဟိုတ်နူဒပ်ပၞာန်ဗမာကြဳဖျေံဗုမ်တုဲ ညးဍုၚ်ကွာန် ၅ တၠတံ ချိုတ်အာတုဲ ၁၁ တၠ ဒးလဝ်ဝပ်ဂှ် ဂွံတီကေတ်နူခရိုၚ်သဓီု KNU ရ။
စနူဂိတုဂျောန် ၁ စဵုကဵု ၃၀ အပ္ဍဲပွိုၚ်မွဲဂိတုဂှ် ကြဳဖျေံဗုမ်ဗတိုက်လဝ် နူကဵုဗလးကျာ ၇ ဝါ၊ အပ္ဍဲကဵုပိပွိုၚ်ဍုၚ်ဏံ ကွာန် ၁၀ ကွာန်ဂှ် ပန်ဏာလွဟ်ဇၞော် ၅ ဝါ ဒပ်ပၞာန်သီအဝဵု ကၠောန်လဝ်နွံရောၚ်။
ဟိုတ်နူဒပ်ပၞာန်သီအဝဵု ပန်လွဟ်ဇၞော်ကဵု ကြဳဗုမ်ၜၚ်ကျာတုဲ ကောန်ၚာ်အာယုက် ၈ သၞာံ ၁ တၠ၊ ညးဗြဴ ၂ တၠ၊ မၞိဟ်တြုံ ၂ တၠ၊ အပံၚ်သီုဖအိုတ်ညးဍုၚ်ကွာန် ၅ တၠ ချိုတ်အာလဝ်ရ။
တုဲပၠန် ကောန်ၚာ်အဝဲဟွံစိုပ် ၁ တၠ၊ မၞိဟ်တြုံ ၁ တၠ၊ ညးဗြဴ ၁၀ တၠ၊ အပံၚ်သီုဖအိုတ် ၁၂ တၠ ဒးဝပ်ဘဲဒဏ်တုဲ သ္ၚိဌာန်ကဵု ဆေၚ်ဖျာ ၇ မပြၚ် ဒးဘဲလီုလာ်အာလဝ်နွံရ။
လက်ကြဴဏံဂှ်တှ်ေ ဒပ်ပၞာန်သီအဝဵုတံ စွံပွန်ဒၞာဲညးဍုၚ်ကွာန်တံတုဲ ဆက်ဗတိုက်မံၚ်ရောၚ်ဂှ် ညးအုပ်ကာခရိုၚ်သဓီု KNU ပဒိုသဝ်အေနိုၚ် ဟီုကဵုဌာန်ပရိုၚ်သြၚ်လောန်တိုၚ်မ်ရ ။
ဟိုတ်နူပရေၚ် ဒပ်ပၞာန်ဗမာပန်ဗတိုက်မံၚ်ဂှ်ရ ညးဒေသခရိုၚ်သဓီု KNU တံ ဒးမံၚ်စံၚ်တန်တဴအာ စိုတ်ဒဝိၚ်ဖေက်လကိုတ်အိုတ်ဂှ်တုဲ ပရေၚ်ဂီုကၠီုလမျီုတံလေဝ် ဟၟဲမံၚ်ပုဟ်ဂှ် ဒးဒုၚ်စသိုၚ်မံၚ် သ္ဂးရ။
မွဲလပါ်ပၠန် ဟိုတ်နူဒပ်ပၞာန် ထပက်မံၚ်ကရောၚ်ပၞာန်ဂှ် ညးဒေသခရိုၚ်သဓီု KNU တံလေဝ် ဒးထောံလဝ်ဌာန်ဒၞာဲဝါဲတုဲ ဒးဂြိပ်ပါဲဒဴမံၚ် မွဲဏှမွဲဏှကီုရ။
ပရိုၚ် – သြၚ်လောန်တိုၚ်မ်
Photo – KHRG