ၜဳကလေၚ်၊ ဂျူလာၚ် ၁၀
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ဂိက်ကူသာန်ဗၞိက် KNU နွံမံၚ် ပ္ဍဲကွာန်တိတ်တူကုန်ဂှ် ဒပ်ပၞာန်ဗမာလုပ်ပန်သလိပ်သီကေတ်ဏာတုဲ ကွဳစက်ဖ္ဍိုက်ကပေါတ်ဟွံအောန်နူကဵု ၃၀ မ ရပ်ကေတ်ဏာလဝ် နွံရောၚ် ရိုဟ်ကၞက်ပရိုၚ်ဒေသတံ ဟီုလဴကဵုဌာန်ပရိုၚ် သြၚ်လောန်တိုၚ်မ်ရ။
စနူအခိၚ်ဂယး ဂိတုဂျူလာၚ် ၅ တေံဂှ် ဒပ်ပၞာန်သီအဝဵု ၜိုတ်ဇြဟတ် ၂၀၀ ပြၚ်တံ လုပ်ပန်သလိပ်သီဂွံလဝ် ဂိက်ကူသာန်ဗၞိက် မဟာဒပ် ၁ ခရိုၚ်သဓီု ဗော်သွးကောန်ဂကူကရေၚ် KNU ပ္ဍဲကဵုကွာန်တိတ်တူကုန်ဂှ် မဒှ်ရ။
ဟိုတ်နူပရေၚ်လုပ်ပန်သလိပ်ဏံဂှ် ပေါဲဗတိုက်ၜါလပါ်က္တဵုဒှ်လဝ် ပွိုၚ် ၂ တ္ၚဲပေၚ်ၚ်တုဲ ကြဴနူဂှ် နူလပါ်ဒပ်ပၞာန်သီအဝဵုသီကေတ်ဏာ ဂိက်ကူသာန်ဗၞိက် သီုအလုံမွဲဒၞာဲဂှ်ရောၚ်။
အပ္ဍဲပေါဲဗတိုက်ဏံ လပါ်ဒပ်ပၞာန်သီအဝဵု ဗိုလ်ဇၞော် ၁ တၠပါလုပ် ချိုတ်အာ ဟွံအောန်နူကဵု ၃ တၠနွံတုဲ၊ ကြဴနူဂှ် ဒပ်ပၞာန်တံစံၚ်ပလီုထောံသ္ၚိဌာန်အပ္ဍဲကွာန်တိတ်တူကုန် ၁၅ မပြၚ်နွံရောၚ် ညးဒေသတံဟီုလဴတုဲ ဂွံတီရ။
အပ္ဍဲပရေၚ်သီဂွံဏာ ဂိက်ကူသာန်ဗၞိက်ဏံဂှ် ကွဳစက်ဖ္ဍိုက်ကပေါတ် ဟွံအောန်နူ ၃၀ မကီု ကပေါတ်ဗၞိက် ဖ္ဍိုက်လဝ်ဗွဲမဂၠိုၚ်တံဂှ်ကီု ဒပ်ပၞာန်ဗမာသီဂွံဏာလဝ် သီုဖအိုတ်ရ။
ပရေၚ်လုပ်သလိပ် ဂိက်ကူသာန်ဗၞိက် တိတ်တူကုန်ဏံဂှ် နကဵုအမိၚ်သ္ကိုပ်ရး ဌာန်ဂအုပ်ပၞာန်ရးအဂၞဲ မတ်မလီု ဒုသ္ကိုပ်ပၞာန် သူရ ဇြဝ်လွေန်သိုဝ်တုဲ လုပ်ပန်သလိပ်လဝ်ရောၚ် ရဲတြးဝါဒဒပ်ပၞာန်တံ ချူထမံက်လဝ်ရ။
ပရေၚ်ကွဳစက်ကဵုကပေါတ်ဗၞိက် ရပ်ဂွံလဝ်နူကဵုဂိက် KNU ဏံတုဲ ဗက်ဂၠာဲရပ်ကေတ်အာအရေဝ် ညးဆက်စပ်မံၚ်တံဂှ်ရောၚ် နူလပါ်ဒပ်ပၞာန်သီအဝဵု ကဵုသမ္တီလလောၚ်တြးလဝ်နွံရ။
ပရိုၚ် – သြၚ်လောန်တိုၚ်မ်
Photo – Social Media