ဗြဝတဳ၊ ဂျူလာၚ် ၁၀
အပ္ဍဲဍုၚ်ဗြဝတဳ တွဵုရးကရေၚ်ဂှ် လ္တူသၟတ်ရဲသၟာကမၠောန်ဆုဲပြံၚ်ကၠုၚ်ကၠောန်စမံၚ် နူဌာန်သ္ၚောဲသ္ၚောဲတံဂှ် စွံပွန်တုဲ သွက်ဂွံယိုက်ဝန်ပၞာန် ဗက်ရပ်ကေတ်မံၚ်ပဝ်တာရောၚ် ရဲလ္တူဍုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ ။
ပ္ဍဲအရာပ်လ္တူဍုၚ်ဗြဝတဳမ္ဂး ဒပ်ပၞာန်၊ ဗၠာဲသၟိၚ်၊ ဒပ်မၚ်ကွာန်ကဵု ဂကောံအုပ်ဓုပ်အရာပ်တံဂေတ်မံၚ်ကၚ် ဇၟာပ်ပ်ဗ္တံနွံတုဲ ရဲဒေသဗြဝတဳဟွံသေၚ်တံကီု မၞိဟ်ဟွံသၚ်ကာတံကီု သၟာကမၠောန်သၟတ်ဆုဲပြံၚ်တံကီုဂှ် စွံပွန်တုဲ ဗက်သၟာန်သၟုက် စၟဳစၟတ်ဂၠိုက်ဂၠာဲမံၚ်အိုတ်ရ။
ဗွဲတၟေၚ် စွံပွန်ကဵု သၟတ် ရဲသၟာကမၠောန်ဆုဲပြံၚ်ကၠုၚ်ကၠောန်စ နူကဵုဌာန်ဒၞာဲတၞဟ်ဟ်တံတုဲ နူကဵုဒပ်ပၞာန်ဗက်ရပ် ကော်ဏာလဝ် သွက်ဂွံယိုက်ဝန်ပၞာန်ရောၚ် ရဲဍုၚ်ဗြဝတဳတံ သ္ဂးရ။
ပ္ဍဲပွိုၚ်အကြာတ္ၚဲတံဏံပၠန် လ္တူဍုၚ်ဗြဝတဳဂှ် ဒပ်ပၞာန်သီအဝဵုတံဗက်ရပ်မံၚ် သၟတ်ရဲသၟာကမၠောန်ဆုဲပြံၚ်လ္ၚဵုတံနွံတုဲ ပၠုပ်စုတ်မံၚ်စရၚ် သွက်ယိုက်ဝန်ပၞာန်တံဂှ်ကၠောန်မံၚ်ဆက်ဆက်ရောၚ် ရဲဍုၚ်ဗြဝတီ ညးတီလဝ်ပရူပရာမွဲတၠဂှ် ဟီုရ။
ပ္ဍဲကဵုတမ်သၞာံဏံလေဝ် ပ္ဍဲဍုၚ်ပယျဵုဗြဝတဳဂှ် မွဲမွဲဂိတုမ္ဂး သၟတ်ဟွံအောန်နူ ၁၀ တၠတံဒးဒုၚ်ရပ်တုဲ ဒးဒုၚ်ကော်စုတ်ဏာလဝ် သွက်ဂွံယိုက်ဝန်ပၞာန်တံ နွံရ။
ကြဴနူသ္ပဒတန် ဥပဒေယိုက်ဝန်ပၞာန်တုဲ ပ္ဍဲအလုံမွဲဍုၚ် ဒပ်ပၞာန်သီအဝဵုဗက်ရပ်ကေတ်လဝ် သၟတ်တံဂၠိုၚ်တိုန်တုဲ ပလံၚ်ဗ္စိုပ်ကဵုဏာလဝ် ဇရေၚ်ဘာတန်ဗတောန်ကွတ်ပၞာန်တံရ။
သွက်လၟေၚ်ဘာတန်ဗတောန်ကွတ်ပၞာန်မွဲမွဲဝါမ္ဂး နူကဵုတွဵုရးကရေၚ် သၟတ် ၁၀၀ ပြၚ် ပါလုပ်မံၚ်ရောၚ် ဂွံတီကေတ် နူကဵုညးနွံကရပ်ဗွိုၚ် ဒပ်ပၞာန်ဗမာတံရ။
မွဲလပါ်ပၠန် ဒပ်ပၞာန်သီအဝဵုတံ ပ္ဍဲဍုၚ်ဗြဝတဳသၟးဟွံက လ္တူဂၠံၚ် ကူသာန်ဗၞိက်ပယျဵု မွဲဒမြိပ်ဂၠံၚ်အာယှဂှ်လေဝ် ဗက်စၟဳစၟတ်မံၚ်ကွဳစက်အာတရဴတံတုဲ သၟတ်အဝဲညးလုပ်မံၚ်အဝေါင်တံဂှ်လေဝ် ဗက်ရပ်ကေတ်မံၚ်နွံရောၚ်။
ပရိုၚ် – သြၚ်လောန်တိုၚ်မ်
Photo – Social Media