ၜဳကလေၚ်၊ ဂျူလာၚ် ၁၁
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ဗြဲဂူထတ်လောန်တုဲ ဍာ်ကြုၚ်ၜဳကလေၚ်သၠုၚ်တိုန်ဂှ်ရ လၟိဟ်မၞိဟ် ၁၀၀ ပြၚ်တံ ဒးပဆုဲပြံၚ်လဝ်ဗွဲမပြဟ်ရ ဂွံတီကေတ် နူကောန်ဂကောံရီုဗၚ်ပရေၚ်မၞိဟ်တံရ။
ပ္ဍဲဂိတုဂျူလာၚ် ၁၀ ဂှ် ဍာ်ကြုၚ်ၜဳကလေၚ်သၠုၚ်တိုန်ကၠုၚ် စဵုကဵုနူသၟဝ်ပၞောန်ၜတ် ဒဝိၚ်ဍာ် ၜိုတ် ၁ ပေတုဲ ဟိုတ်နူဍာ်လုပ်ကၠုၚ်ဂှ်ရ ဒၞာဲအရာပ်တိသဝ် နူအရာပ် ၇ ညးဍုၚ်ကွာန် မံၚ်စံၚ်တဴဟွံဂွံတံဂှ် နကဵုပရေၚ်ကာမံက်တိုန် ဒးပဆုဲပြံၚ်လဝ်ရောၚ် သ္ဂးရ။
ဟိုတ်နူဗြဲရိုပ်ဆက်ဂူမံၚ်တုဲ အကာဲအရာဍာ်ကြုၚ် ဆက်သၠုၚ်တိုန်မာန်နွံတုဲ ယဝ်ရဗြဲဆက်ဂၠိုၚ်မ္ဂး ပ္ဍဲဗ္တံဂျူလာၚ် ၁၀ ဂှ် ၜက်တိုန်အာနူပၞောန်ၜတ်ဒဝိၚ်ဍာ်မာန်ရောၚ် ညးရီုဗၚ်ဟံၚ်ပြာ်မံၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဍာ်ကြုၚ်တိုန်ကၠုၚ်ဂှ်ရ ညးဍုၚ်ကွာန်တၠဒဒိုက်ဘဲဍာ်တံ ပဆုဲပြံၚ်စွံလဝ် ပ္ဍဲရုၚ်ဝေၚ်ဒြဟတ်ပွိုၚ်ဍုၚ်ကေုာံ ဘာလကျာ် ဗြမဝိဟာရတံ မွဲခဏနွံရ။
ညးနွံမံၚ်ဒၞာဲတိသဝ်ဝ်တၞဟ်တံဂှ် ဆက်မၚ်လ္ၚတ်ရံၚ်အာအကာဲအရာဍာ်တုဲ ယဝ်ရဍာ်ဆက်သၠုၚ်တိုန်မ္ဂး ဒးထပ်ပဆုဲပြံၚ်အာရောၚ် သ္ဂးရ။
ပၞောန်ၜတ်ဒဝိၚ်ဍာ် ကြုၚ်ၜဳကလေၚ်ဂှ် နွံမံၚ် ၁၀၂၂ သေန်တဳမဳတာ တုဲ၊ အတိုၚ်နူဌာနစၞောန်ပ္ညုၚ်ပရေၚ်ဗြဲကျာ ဇလဗေဒအလဵုအသဳပၞာန်ၜတ်ကေတ်လဝ် ဂိတုဂျူလာၚ် ၁၀ အခိၚ် ၁၂ နာဍဳကဝက် လဒေါဝ်တ္ၚဲဂှ်မ္ဂး ဍာ်ကြုၚ်ၜဳကလေၚ် စိုပ်မံၚ် ၉၆၅ သေန်တဳမဳတာရ။
ဍာ်ကြုၚ်ၜဳကလေၚ်ဂှ် အပ္ဍဲပွိုၚ် ၂၄ နာဍဳဂတဏံ စိုပ်ကၠုၚ် ၁၀၀၀ သေန်တဳမဳတာမာန်တုဲ အပ္ဍဲၜါတ္ၚဲဂတဏံမ္ဂး စိုပ်အာပၞောန်ၜတ်ဒဝိၚ်ဍာ်မာန်ရောၚ် ဌာနပရေၚ်ဗြဲကျာ တော်လဝ်နွံရ။
ကြုၚ်ၜဳကလေၚ်ဝွံ နူကမၠောန်ထဝ်ဟဳတံ ဟိုတ်နူတိဂဗေၚ်ကြုၚ် ဒိုဟ်အာတုဲ သ္ၚိဌာန်တံကီု ဒၞာဲပရေၚ်တဵုလွဳသၞေဝ်ကေဝ်တံကီု ဍာ်ဗၠိုက်လီုလာ်လဝ်တုဲ ပ္ဍဲသၞာံလ္ၚဵုတံမ္ဂး မၞိဟ်ကေၚ်ချိုတ်လေဝ် နွံကၠုၚ်လဝ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – CJ