ၜဳကလေၚ်၊ ဂျူလာၚ် ၁၁
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ပေါဲဗတိုက်ၜါလပါ်က္တဵုဒှ်လဝ် ပ္ဍဲကွာန်တိတ်တူကုန်ဂှ် ဒပ်ပၞာန်သီအဝဵု စံၚ်ပလီုထောံလဝ် သ္ၚိဌာန်ညးဍုၚ်ကွာန်တံလၟိဟ်စှ်မပြၚ်နွံရောၚ် ညးအုပ်ကာခရိုၚ်သဓီု KNU ပဒိုသဝ်အေနိုၚ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲဂိတုဂျူလာၚ် ၅-၆ တုဲကၠုၚ်ဏံ ဒပ်ပၞာန်သီအဝဵု ကရောၚ်ပၞာန်ထပက်လုပ်ကၠုၚ် အပ္ဍဲကွာန်တိတ်တူကုန်ဂှ် ပေါဲဗတိုက်ဒှ်လဝ်ကဵု ဒပ်ပံၚ်တောဲဒပ်ပၞာန်ဗၠးၜးကောန်ဂကူကရေၚ် KNLA တံရ။
အပ္ဍဲပေါဲဗတိုက်ဏံ ဒပ်ပၞာန်သီအဝဵု ဒးလဝ်ဘဲဂိအာတံ လုပ်ဂၟာဲဂၠံက်ဏာသ္ၚိဌာန်ညးဒေသ ပ္ဍဲကွာန်တိတ်တူကုန်တုဲ ကြဴနူဂှ် စံၚ်ပလီုထောံ သ္ၚိ ၁၂ မနွံရောၚ်။
တုဲပၠန် အပ္ဍဲအကြာပေါဲဗတိုက်ဏံ ရပ်ၜုၚ်တက်ဏာ ညးဒဳကွဳစက် ဖ္ဍိုက်ကပေါတ် ၁ တၠကဵု ညးဒေသကွာန်တိတ်တူကုန် ၁ တၠတံတုဲ စဵုကဵုလၟုဟ်ဒပ်ပၞာန်သီအဝဵု ဟွံကလေၚ်ဗလးကဵုဏီပုဟ်။
အပ္ဍဲပေါဲဗတိုက်အကြာၜါလပါ်ဏံ နူလပါ်ဒပ်ပၞာန်သီအဝဵု သီုဗိုလ်ဇၞော် ၁ တၠ မပါလုပ်အပံၚ်သီုဖအိုတ် ၅ တၠ ချိုတ်အာတုဲ ၉ တၠ ဒးလဝ်ဝပ်ဂှ်ရ စံၚ်ပလီုထောံသ္ၚိဌာန်ညးဍုၚ်ကွာန်တံဏံရောၚ် သ္ဂးရ။
အပ္ဍဲကွာန်တိတ်တူကုန်ဂှ် ရုင်ခြိုင်စွံကပေါတ်ဗၞိက်ဟွံလုပ်သၞောဝ် ကေတ်လဝ်ပရေၚ်ဂီုကၠီု KNU/PDF တံနွံမံၚ်တုဲ သ္ကိုပ်ဌာန်ဂအုပ်ပၞာန်ရးအဂၞဲမတ်မလီု ဒုသ္ကိုပ်ပၞာန် သူရ ဇြဝ်လွေန်သိုဝ် အတိုၚ်ကဵုနၚ်လဝ်စၞောန်အမိၚ်ဂှ် လုပ်ပန်သီကေတ်လဝ်ရောၚ် ရဲတြးဝါဒလဝ်ဗဳဒပ်ပၞာန်တံ သ္ဂးရ။
အပ္ဍဲပရေၚ်လုပ်ပန် သီကေတ်လဝ်တံဂှ် လပါ်ဒပ်ပၞာန် ဒးဝပ်ချိုတ်အာလဝ်နွံကီုလေဝ် ရပ်ဂွံလဝ် ကွဳစက်ဖ္ဍိုက်ကပေါတ်ဟွံလုပ်သၞောဝ် ဟွံအောန်နူကဵု ၃၀ မနွံတုဲ ကေတ်အာအရေဝ် တၠကွဳစက်ကဵု ညးပလံၚ်ကပေါတ်တံဂှ်ရောၚ် ပတိတ်လိက်လလောၚ်တြးလဝ်ရ။
ပ္ဍဲကွာန်တိတ်တူကုန် ဂိက်သၞေဟ်ကင် ပရေၚ်ကူသာန်စွံလဝ်ဟၟဲတုဲ၊ အခိၚ်ပလံၚ်ကပေါတ် လပါ်ဍုၚ်မ္ဂး ဒၞာဲသွက်ဂွံမၚ်ရံၚ်လ္ၚတ်အာ အကာဲအရာဂၠံၚ်ဍာန်မွဲဒၞာဲမဒှ်တုဲ ရဲလပါ်ဒပ်ပၞာန်တံလုပ်သီကေတ်မံၚ် မွဲဏှမွဲဏှနွံရောၚ် နူကဵုခရိုၚ်သဓီု KNU ဟီုရ။
ပရိုၚ် – သြၚ်လောန်တိုၚ်မ်
Photo – KNU