ကျာ်မြဟ်၊ ဂျူလာၚ် ၁၁
တွဵုရးမန် ပ္ဍဲထံၚ်ဗဟဵုကျာ်မြဟ်ဂှ် ညးတာလျိုၚ်ထံၚ်တံ ပျဲပျာံၜုၚ်တက်ကောန်ထံၚ်ပရေၚ်ဍုၚ်ကွာန်တံတုဲ ဖံက်ပကဝ်မံၚ် အခေါၚ်အရာမၞိဟ်တံနွံမံၚ်ရောၚ် နူကဵုဇာဖိုၚ်ကောန်ထံၚ်ပရေၚ်ဍုၚ်ကွာန် အလုံမွဲဍုၚ်ဗၟာ PPNM ပတိတ်လလောၚ်တြးလဝ် အပ္ဍဲကဵုဂိတုဂျူလာၚ် ၉ ဂှ်ရ။
တုဲကၠုၚ် အပ္ဍဲဂိတုအေဗရာတေံ ပ္ဍဲထံၚ်ဗဟဵုကျာ်မြဟ် နူကဵုခဒမ်ဒၞာဲမၞိဟ်တြုံတိက် ၃ ဂှ် ညးတာလျိုၚ်ထံၚ်တံ ပျဲပျာံၜုၚ်တက်လဝ် ကောန်ထံၚ်ပရေၚ်ဍုၚ်ကွာန် ဟုၚ်ဇြဝ်အံၚ်၊ ဝေယာန်ဠေၚ်ကဵု ဝေန်မေန်ထောန်တံ ၃ တၠ နွံမံၚ် သ္ဂးလဝ်ရ။
ထ္ၜးဟိုတ်ကဵု စွံလဝ်ဇိုၚ်လပါ်သ္ၚိကျာ် ဂွံဆဵုညာတ်အာ နူကဵုကေန်မရာ ပရေၚ်ဂီုကၠီု CCTV ဂးတုဲ ကၟာတ်တိုက်စွံလဝ် ညးမွဲမွဲဒၞာဲ၊ အခိၚ်ကၟာတ်တိုက်ဂှ် ၜုၚ်တက်လဝ်ဂှ်ကီု၊ ပါဲနူဂှ်ပၠန် အကြာတ္ၚဲကာတ်တ် ကဵုမံၚ်ဒၟံၚ်ဗီုပြၚ်ဒဳကွဳစက်တံတုဲ ပျဲပျာံလဝ်ရောၚ် ဂွံတီကေတ် အတိုၚ်လိက်လလောၚ်တြးဂှ်ရ။
တုဲပၠန် ကောန်ထံၚ်ပရေၚ်ဍုၚ်ကွာန်ဒးဒုၚ်ကၟာတ်တိုက်တံဂှ် ဟွံကဵုစကာသုၚ်စောဲ ယာတ်လတက်၊ ယာတ်လးကဵု ကပေါတ်သုၚ်စောဲသ္ဇိုၚ်တံတုဲ ဟၟဲကဵုအပိုၚ်အခြာအခိၚ်အခါစွံလဝ်ဂှ် စဵုကဵုတ္ၚဲဏံဟွံကလေၚ်စဴ ပ္ဍဲကဵုဒၞာဲခဒမ်ညးတံဏီပုဟ် PPNM သ္ဂးရ။
ပြဟ်ဟ်ဏံမ္ဂး ညးတာလျိုၚ်ထံၚ်ကျာ်မြဟ်တံဂှ် ဒှ်မံၚ်ညးပြံၚ်ကၠုၚ်နူကဵုဒပ်ပၞာန်တံဂှ်ရ လတူကောန်ထံၚ်ပရေၚ်ဍုၚ်ကွာန်တံမ္ဂး စွံပွန်တုဲ ပျဲပျာံၜုၚ်တက်မံၚ်ရောၚ် ကောန်ထံၚ်ပရေၚ်ဍုၚ်ကွာန်တြေံမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ညးပိုၚ်ထံၚ်ဇၞော်လၟုဟ်ဂှ် နူကဵုပၞာန်ၜးကယျိုၚ်ပြံၚ်ကၠုၚ်လဝ်၊ နူအဆံၚ်သ္ကိုပ်ဗိုလ် ဒပ်ပၞာန်တုဲ ကၠုၚ်ဒှ်မံၚ် ညးပိုၚ်ထံၚ် ပ္ဍဲကျာ်မြဟ်ဏံ၊ ဒုညးပိုၚ်ထံၚ်လေဝ် နူဒပ်ပၞာန်၊ သ္ကိုပ်အုပ်ဓုပ်လေဝ် နူဒပ်ပၞာန်၊ ယဝ်ရဒးဟီုသောင်သောင်မ္ဂး ညးတံပြံၚ်ကၠုၚ်လဝ်နူဒပ်ပၞာန်တုဲ အုပ်ဓုပ်မံၚ်တှ်ေ၊ လတူကောန်ထံၚ်တၞဟ်တံမ္ဂး နူကၠာကၠာတေံဂှ် ပရေၚ်ပျဲပျာံၜုၚ်တက် ဂၠိုၚ်မံၚ်ရရ၊ ဆဂး လၟုဟ်မ္ဂး ဂတးပၠန်အာယျ၊ စွံလဝ်ပွန် လတူကောန်ထံၚ်ပရေၚ်ဍုၚ်ကွာန်တံဏောၚ်” သာ်ဝွံ သ္ဂးရ။
တုဲပၠန် နူကောန်ဇာတ်သ္ၚိကၟိန် ကောန်ထံၚ်ပရေၚ်ဍုၚ်ကွာန်တံ ပလံၚ်ကဵုလဝ်စၞစဂဥုဲဇဗတံဂှ်လေဝ် ကၠတ်ကေတ်ထောံအကြာတံနွံမံၚ်၊ လ္တူကောန်ထံၚ်ပရေၚ်ဍုၚ်ကွာန်လ္ၚဵုတံဂှ်ပၠန် ကၟာတ်ထောံ လိက်လုပ်ဆဵုကောန်ထံၚ်တံကီု ညးတာလျိုၚ်ထံၚ်တံ ကေတ်ဇၞးသ္ပမာန် ကၠောန်မံၚ်ပရေၚ်ဍဵုဍိုက် နာနာတံလေဝ်နွံရောၚ် ညးဆက်ဟီုရ။
အပ္ဍဲထံၚ်ဗဟဵုကျာ်မြဟ်ဂှ် ကောန်ထံၚ်ပရေၚ်ဍုၚ်ကွာန်တၟိတၟိတံ စိုပ်ကၠုၚ်ဒၞာဲတိုက်တိက် ၃ ဂှ်မ္ဂး ညးရပ်လဝ်ဘုက်ကမၠောန် သူရိန်ပျေအ်ဖျိုဝ် ဟီုဂှ် ကဵုကၠောန်ကမၠောန် ပရေၚ်သ္အးဇ္ၚးအိက်နမ် မိလ္လာ အတေၚ်အဓ္ဓမရောၚ် ဂွံတီကေတ် အတိုၚ်လိက်လလောၚ်တြး PPNM ရ။
ညးယိုက်ဝန်ထံၚ်တံဂှ် “ဗီုမိက်ဂွံတက်ဂှ် တက်၊ ယဝ်ရဒှ်အာမွဲမွဲတှ်ေ အဲကေတ်ကဵုလျိုၚ်ဖအိုတ်” ညးပိုၚ်ထံၚ် ဆာန်အေကျဝ် စၞောန်ပ္ညုၚ်ဟီုလဝ်နွံတုဲ၊ သ္ကိုပ်စၞောန်ပ္ညုၚ်ဌာန ပရေၚ်ကေၚ်ကာထံၚ် တွဵုရးမန်ဂှ်လေဝ် “ယဝ်ရကောန်ထံၚ်တံချိုတ်အာမ္ဂး အိုတ်ၜိုတ်ဆ တၞးလိက်မွဲတၞးဓဝ်ရဏောၚ်” သာ်ဝွံ ဟီုဂးဘပဠမံၚ်ရောၚ် ပ္ဍဲကဵုလိက်လလောၚ်တြး PPNM ဂှ် ချူထမံက်ထ္ၜးလဝ်ရ။
ပရေၚ်ပလီုလာ်အခေါၚ်အရာမၞိဟ်က္တဵုဒှ်မံၚ် အပ္ဍဲထံၚ်ကျာ်မြဟ်တံဂှ် ဆက်မၚ်လ္ၚတ်ရံၚ်စၟတ်သမ္တီအာတုဲ၊ ညးဖံက်ပကဝ်လဝ်တံညံၚ်ဂွံဒးဒုၚ်တာလျိုၚ်ဂှ်လေဝ် ဆက်ပတိုန်ထ္ၜးအာကဵု ပွဳဗွိုၚ်ဂၠးကဝ်တံရောၚ် နူကဵု PPNM ဟီုလဝ်ရ။
ပရိုၚ် – သြၚ်လောန်တိုၚ်မ်
Photo – Social Media