ၜဳကလေၚ်၊ ဂျူလာၚ် ၁၄
အပ္ဍဲတွဵုရးမန် ပွိုၚ်ဍုၚ်ၜဳကလေၚ် ဟိုတ်နူ ဗြဲဂူရိုပ်မံၚ်ဟွံပိုတ်အဆက်က် ဍာ်ကြုၚ်ၜဳကလေၚ် ဆက်သၠုၚ်တိုန်ကၠုၚ်ဂှ်တုဲ ညးဒဒိုက်ဘဲဍာ်တံနွံကၠုၚ်လဝ် ကြပ် ၁၀၀၀၀ ရဂှ် ဂကောံဟံၚ်ပြာ်ပရေၚ်ရီုဗၚ်မှာဇန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အတိုၚ်စရၚ် စိုပ်ကၠုၚ်အခိၚ်နူဂယး ဂိတုဂျူလာၚ် ၁၃ မ္ဂး ပ္ဍဲကဵုလတူဍုၚ် ၜဳကလေၚ်ဂှ် ဒးပံက်စွံလဝ် ဗဒိုပ်ဟံၚ်ပြာ်ရဲဒဒိုက် ဘဲဍာ်ဇၞော် ၉ ဒၞာဲနွံတုဲ ညးကၠုၚ်ဗ္ဒဗ္ဒာဲမံၚ်စံၚ် နွံကၠုၚ် ၁၆၀၀ တၠ ပြၚ်အာယျ။
ဟိုတ်နူဗြဲဂူရိုဟ် ဍာ်ကြုၚ်ၜဳကလေၚ်သၠုၚ်တိုန်ကၠုၚ်တုဲ ကွာန်နွံမွဲဒမြိပ်ဇိုၚ်ကြုၚ် ၂၇ ကွာန်ဍာ်ဗၠိုက်မံၚ်ဂှ် လၟိဟ်မၞိဟ်ကြပ် ၉၀၀၀ တၠတံ ဒှ်လဝ်ဒဒိုက်ဘဲဍာ်ဇၞော်ရောၚ် ဂွံလဝ်ပရိုၚ်ရ။
အပ္ဍဲပရေၚ်ဘဲဍာ်ဇၞော် ၜဳကလေၚ်ဏံမ္ဂး ညးဆုဲပြံၚ်စိုပ်ကၠုၚ် ပ္ဍဲဗဒိုပ်ဟံၚ်ပြာ်ရဲဒဒိုက်ဘဲဍာ်ဇၞော် လတူဍုၚ်တံသၟးရ ဂွံမံၚ်အရီုဗၚ်စၞစဍာ်သုၚ်တံညိညနွံတုဲ ရဲနွံမံၚ်လပါ်ကွာန် ဒးမံၚ်ဘဲဍာ်ဇၞော်တံဂှ် မုပရေၚ်အရီုဗၚ်လေဝ် ဟွံဂွံဏီပုဟ် သ္ဂးရ။
အပ္ဍဲပရေၚ်ဘဲဍာ်ဇၞော် ၜဳကလေၚ်ဏံမ္ဂး ကွာန်နွံမံၚ်ဇိုၚ်ကြုၚ် မပ္တံကဵု ကွာန်ယှိုဲလှေ၊ ခေဝ်မံက်၊ နာတ်ကျဳ၊ ယှိုဲလံၚ်အေန်၊ မေဝ်လာန် ကဵု ကွာန်ဒၞာဲတိသဝ်ဝ် ၂၇ ကွာန်တံ ဍာ်ဗၠိုက်မံၚ်ရောၚ်။
ဂိတုဂျူလာၚ် ၁၃ အခိၚ်နူဂယးပြဟ် အတိုၚ်နူဌာနဇလဗေဒပရေၚ်ဗြဲကျာ စၟဳစၟတ်စမ်ၜတ်ဂွံလဝ်မ္ဂး ဍာ်ကြုၚ်ၜဳကလေၚ်ဂှ် ကလေၚ်ယအ်စှ်ေအာ နူသၟဝ်ပၞောန်ဒဝိၚ်ဍာ် ၁၀၂၂ သေန်တဳမဳတာယျ။
ဆဂး အတိုၚ်ဌာနပရေၚ်ဗြဲကျာဟီုမ္ဂး စိုပ်ဂျူလာၚ် ၂၀ ဂတဏံဂှ် ဟိုတ်နူအသိၚ်ကျာမုတ်သုံ ထတ်မံၚ်တုဲ ဗြဲဇၞော်ဇၞော်ဆက်ဂူရိုပ်မာန် ဂှ်ကီု ညးမံၚ်တန်တဴဒၟံၚ်ဇိုၚ်ၜဳသၞေဟ်ကြုၚ်တံ ညးညးအဲအဲ ညံၚ်ဂွံစွံလဝ်သတိ ပရေၚ်အန္တရာဲဘဲဍာ်ဇၞော်ညိဂှ် ထပ်ကဵုလဝ်သတိ နွံရ။
အပ္ဍဲတွဵုရးမန် စနူဂိတုဂျူလာၚ် ၅ တေံ ဟိုတ်နူဗြဲဇၞော်ဂူရိုပ် လဗိုတ်ကျာထတ်တုဲ ပ္ဍဲပွိုၚ်ဍုၚ်ပံၚ်၊ မတ်မလီုကေုာံ ဇြပ်ဗုဂှ် သ္ၚိဌာန်၊ စမြိုၚ်ဌာန်ဒၞာဲ ကၠံမပြၚ်ၚ်လီုလာ်အာနွံတုဲ ညးဒးဒဒိုက်ဘဲကျာ နွံကၠုၚ်ကြပ် ၁၀၀၀ တၠရ။
ပရိုၚ် – သြၚ်လောန်တိုၚ်မ်
Photo – CJ