မတ်မလီု၊ ဂျူလာၚ် ၁၄
အပ္ဍဲတွဵုရးမန် လက်ထက်အလဵုအသဳမန်တၟိ ပြံၚ်သၠာဲလဝ်နူဒပ်ပၞာန် သၞာံဘဏ္ဍာ ၂၀၂၆-၂၀၂၇ ဏံ သွက်သြန်ဂအုံ ပရေၚ်ဘဏ္ဍာတွဵုရး ဂွံလဝ်လၟုဟ်ဏံဂှ် ယအ်စှ်ေအာမံၚ်နူကဵုလက်ထက်အလဵုအသဳ NLD တုဲကၠုၚ်တေံ ပန်ဂအုံ မွဲဂအုံပြၚ်ရောၚ် ဂွံတီကေတ် နူကဵုတၚ်နၚ် ဌာန်ပရိုၚ်သြၚ်လောန်တိုၚ်မ် ပကောံဂွံလဝ်တံဂှ်ရ။
နူဒပ်ပၞာန်ပြံၚ်လဝ်ဗီုပြၚ် အလဵုအသဳတွဵုရးမန်ဂှ် သွက်သၞာံ ပရေၚ်ဘဏ္ဍာဏံ သြန်ဂအုံဘဏ္ဍာဂွံလဝ်တံကီု သြန်ဂအုံဘဏ္ဍာ ဂကောံအလဵုအသဳကေုာံ ဌာနနာနာတံကီု သွက်ဂွံသုၚ်စောဲအာဂှ် ဂွံလဝ်သြန် ၇၆ ဗဳလဳယာန်ပြၚ် နွံမံၚ်ရ။
အပ္ဍဲလက်ထက်အလဵုအသဳ NLD သၞာံပရေၚ်ဘဏ္ဍာ ၂၀၂၀-၂၀၂၁ တေံ သြန်ဂအုံပရေၚ်ဘဏ္ဍာတွဵုရး ဂွံလဝ် ၁၁၁ ဗဳလဳယာန်ပြၚ်နွံတုဲ ယဝ်ရၜတ်ကၞက်အာကဵု လက်ထက်အလဵုအသဳတွဵုရးမန်တၟိလၟုဟ်ဏံမ္ဂး ယအ်စှ်ေကၠုၚ်မံၚ် ပန်ဂအုံ မွဲဂအုံပြၚ် နွံရောၚ်။
သြန်ဂအုံပရေၚ်ဘဏ္ဍာဂွံလဝ်တံဂှ် အလဵုအသဳတၟိဏံသုၚ်စောဲလဝ် ဂၠိုၚ်အိုတ်ဂှ်တှ်ေ အပ္ဍဲကဵုပရေၚ်ကမၠောန်သိုၚ်ခၞံ ကၠောန်ဂၠံၚ် ဒေသကွာန်ရး၊ ပရေၚ်ကမၠောန်သ္ဂောံဂွံဓာတ်လလဳ၊ ကမၠောန်ကၠောန်ဖံက်ဂၠံၚ်ကေုာံ ကမၠောန် ပရေၚ်ဗဂဵုလဟဵုသာယာတံဂှ် ဂွံဆဵုကေတ်ရ။
ဟိုတ်နူဂွံသြန်ဂအုံ ပရေၚ်ဘဏ္ဍာယအ်စှ်ေသာ်ဏံတုဲ ပ္ဍဲအရာပရေၚ်ဖန်ဇန်ရေၚ်တၠုၚ် ကၠောန်အာကမၠောန် ပရေၚ်ဇၞော်မောဝ်ဒေသတံဂှ် ဗီုကဵုအခိၚ်ကၠာတေံ ကၠောန်ကဵုဂၠိုၚ်ၚ်ဂှ် ဒှ်ဟွံမာန်တုဲ ဆၜိုတ်အယာံမာတ် ဗီုပြၚ်လတူကျာတံသၟး ကၠောန်ထ္ၜးကဵုမာန်ရောၚ် ညးလ္ၚတ်ပရေၚ်ဍုၚ်ကွာန်တံ ဟီုရ။
တုဲပၠန် သြန်ဂအုံပရေၚ်ဘဏ္ဍာတံဂှ် ပရေၚ်ဒးလးထ္ၜး လဴကလးကဵု ညးဍုၚ်ကွာန်တံဟၟဲတုဲ သြန်ဘဏ္ဍာတံဏံ လေၚ်အာဂၠိုၚ်မာန်တုဲ ပါဲနူဂှ် ပ္ဍဲဌာနတံလေဝ်ပရေၚ်ဗက်စအဂတိတံ ပဵုပရေံတိုန်မာန်ရောၚ် ညးလ္ၚတ်တံ သ္ၚဳဂၠိပ်လဝ်ရ။
အပ္ဍဲဒေသတံဏံ လက်ထက်အလဵုအသဳ NLD တေံဂှ် ဂွံလဝ်သြန်ဘဏ္ဍာတုဲတုဲမ္ဂး သုၚ်စောဲအာဗီုသာ်လဵုဟီုဂှ် ညံၚ်ညးဍုၚ်ကွာန်တံ ဂွံတီသောင်သောင်ကၠးကၠးမာန်ဂှ် ပတိတ်ကဵုလိက်စံၚ် Citizen Budget တုဲ လးထ္ၜးကဵုလဝ် ညးဍုၚ်ကွာန်တံရောၚ်။
ကြဴနူဒပ်ပၞာန်သီအဝဵုတုဲ ပရေၚ်သြန်ဘဏ္ဍာမှာဇန်တံဂှ် သုၚ်စောဲစုတ်လဝ် အပ္ဍဲပရေၚ်ပၞာန်ဂၠိုၚ်အိုတ်ဒှ်မံၚ်ဂှ်ရ ပရေၚ်ပါ်ပါဲတံ ပဵုဂၠိုၚ်တိုန်မံၚ်တုဲ ကြဴနူဂှ် သုၚ်စောဲလဝ်သြန်ဘဏ္ဍာတံ ဗီုလဵုနွံရောဂှ်လေဝ် လးထ္ၜးကဵုလဝ်ဟၟဲပုဟ်။
အပ္ဍဲတွဵုရးမန် ကြဴနူသီအဝဵုတုဲ ပရေၚ်ဂွံသြန်ဘဏ္ဍာတွဵုရး အောန်စှ်ေအာတုဲ စပ်ကဵုကမၠောန် ပရေၚ်ဇၞော်မောဝ်ဒေသတံလေဝ် ညံၚ်ကဵုကြပ်ဟၟဲဒှ်အာတုဲ၊ သြန်ဘဏ္ဍာတံ သုၚ်စောဲလဝ် ဗီုလဵုနွံဂှ်လေဝ် သောင်သောၚ်ကၠးကၠး လဴကလး လးထ္ၜးဖျေံကဵုလဝ် ဟၟဲကၠုၚ်ရ။
ပရိုၚ် – သြၚ်လောန်တိုၚ်မ်
Photo – MOI