သဓီု၊ ဂျူလာၚ် ၁၅
အပ္ဍဲတွဵုရးမန် ပွိုၚ်ဍုၚ်ခရိုၚ်သဓီုတံဂှ် ဒပ်ပၞာန်သီအဝဵု ဟိုတ်နူပန်မံၚ်ကဵုလွဟ်ဇၞော်ကီု ပန်ဗတိုက်မံၚ်ကဵုပၞာန်ကျာတံတုဲ သွက်ပရေၚ်ဂီုကၠီု ညးဍုၚ်ကွာန်ကောန်အရာပ်တံ ပရေံမံၚ်ကွေံကွေံရောၚ် ဗော်သွးကောန်ဂကူကရေၚ် KNU ခရိုၚ်သဓီု ဟီုရ။
ပ္ဍဲကဵုပွိုၚ်ဍုၚ်ကျာ်ထဝ်၊ ၜဳကလေၚ် ကေုာံ သဓီုတံဂှ် ဒပ်ပၞာန်သီအဝဵု ပန်မံၚ်လွဟ်ဇၞော် ဗတိုက်မံၚ်ကဵုပၞာန်ကျာ ဇၟာပ်ပ်တ္ၚဲတံဂှ် ပဵုတုဲ ကၠောန်ကၠုၚ်မံၚ်ရောၚ်။
အတိုၚ်တၚ်နၚ် ဂွံလဝ်နူခရိုၚ်သဓီု KNU မ္ဂး အပ္ဍဲဂိတုဂျောန်ကဵု ဂိတုဂျူလာၚ်ဏံ ပ္ဍဲကဵုပွိုၚ်ဍုၚ်ခရိုၚ်သဓီုတံဏံ ဒပ်ပၞာန်သီအဝဵုပန်လွဟ်ဇၞော်ကီု ပန်ဗတိုက်လဝ်ကဵုပၞာန်ကျာကီု ဟွံအောန်နူကဵု ၄၀ ဝါ ကၠောန်လဝ်နွံရ။
ဟိုတ်နူဒပ်ပၞာန်ဗမာ စွံပွန်ဗတိုက်လဝ် လတူညးဍုၚ်ကွာန်ကောန်အရာပ်တံတုဲ ညးဒေသဟွံအောန်နူ ၈ တၠ ချိုတ်အာ၊ ကြပ် ၂၀ တၠ ဒးလဝ်ဝပ်နွံတုဲ သ္ၚိဌာန်စမြိုၚ်ဒၞာဲဝါဲ လၟိဟ်ကဵုစှော်တံ လီုလာ်အာလဝ်နွံရ။
ၜိုန်ရပေါဲဗတိုက်ဟၟဲကီုလေဝ် ပ္ဍဲကဵုကွာန်ညးဍုၚ်ကွာန် ကောန်အရာပ်တံမံၚ်စံၚ်တန်တဴမံၚ်ဂှ်ကီု ဒၞာဲကမၠောန်တံကီုဂှ် ဒပ်ပၞာန်သီအဝဵုစွံပွန်တုဲပန်ဗတိုက်မံၚ်ဂှ် ပဵုဂၠိုၚ်ကၠုၚ်မံၚ်ရောၚ် ညးအုပ်ကာခရိုၚ်သဓီု KNU ပဒိုသဝ်အေနိုၚ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပရေၚ်ဒပ်ပၞာန်ဗမာပန်ဗတိုက်လဝ်တုဲ လမျီု၊ သ္ၚိဌာန် ကေုာံ ပိုန်ဟာန်ညးဍုၚ်ကွာန်တံ ဒးဒုၚ်ဆောံလေၚ်အာလဝ်နွံတုဲ ဘဝညးတံဂွံမံၚ်စံၚ်တန်တဴအာ၊ ကမၠောန်ဂမျိုၚ်လမျီု ကေုာံ အကာဲအရာပရေၚ်ဂီုကၠီုတံဂှ်လေဝ် ပရေံကၠုၚ်မံၚ်ကွေံကွေံရောၚ် သ္ဂးရ။
မွဲလပါ်ပၠန် ဒပ်ပၞာန်သီအဝဵု ၜိုန်ရကော်ဘိက်မံၚ် ပရေၚ်ၜိုဟ်လလမ် ကု ဂကောံရပ်လွဟ်ကောန်ဍုၚ်အရၚ်တံကီုလေဝ် အပ္ဍဲဒၞာဲဒေသနာနာတံဂှ် ဆက်ထပက်မံၚ်ကရောၚ်ပၞာန်တံတုဲ ပ္ဍဲကဵုတိဍာ် KNU ကီု သီုဒေသဗွဲမဂၠိုၚ်တံဂှ် ပေါဲဗတိုက်တံ ဆက်က္တဵုဒှ်သကာတ်မြဟ်မံၚ်ဖိုဟ်ရ။
ပရိုၚ် – သြၚ်လောန်တိုၚ်မ်
Photo – Social Media