မတ်မလီု၊ ဂျူလာၚ် ၁၅
အပ္ဍဲတွဵုရးမန် သွက်ဂွံသွံကဵုကၠေၚ်သတ်ဗြဴ အကြာပွိုၚ်ဍုၚ်တံဂှ် ဗက်အာတ်ကေတ်မံၚ်စရင်ကၟိန်အိန်ထံၚ်ဂှ်ရ ညးဍုၚ်ကွာန်တံဒှ်မံၚ်ဒဝိၚ်ရောၚ် ဂွံတီကေတ် နူကဵုရဲလ္တူဍုၚ်မတ်မလီုတံရ။
သွက်ညးဍုၚ်ကွာန်သ္ဇိုၚ်တံ ဂွံရာန်စသုၚ်ကၠေၚ်သတ်ဗြဴ နကဵုက္ဍိုပ်လိက် ပရေၚ်ၚုဟ်မးသက်သာ နူကဵုဆေၚ်ဖျာမ္ၚးတံဂှ် အလဵုအသဳပြံၚ်လဝ်ဗီုပြၚ်ဒပ်ပၞာန်သီအဝဵုသွံကဵုလဝ်တုဲ၊ စနူဂိတုဂျူလာၚ်ဏံမ္ဂး ဗက်အာတ်ကေတ်မံၚ်စရင်ကၟိန်အိန်ထံၚ် နူကဵုညးရာန်ကၠေၚ်တံရောၚ် သ္ဂးရ။
ကၠာတေံ ဗက်သွံကဵုလဝ်ကၠေၚ်သတ်ဗြဴ အကြာအရာပ်တံမွဲကၟိန်အိန်ထံၚ်မ္ဂး ဂွံလျိုၚ်မွဲပသာကီုလေဝ် ဟွံဒးကဵုလဝ်စရင် ကၟိန်အိန်ထံၚ်ပုဟ်၊ ဆဂး လၟုဟ်ယဝ်ရမိက်ဂွံရာန်ကၠေၚ်မ္ဂး ဒးကဵုတၞးဆာဲစရင်ကၟိန်အိန်ထံၚ် ၃ တၞးရောၚ် ညးလ္တူဍုၚ်သဓီုမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
တၞးဆာဲ စရင်ကၟိန်အိန်ထံၚ်တံဂှ် နူကဵုသ္ကိုပ်အုပ်ဓုပ်အရာပ်တံကီု မၞိဟ်ကၠုၚ်သွံကၠေၚ်တံကီု ဗက်အာတ်ပကောံကတ်မံၚ် သ္ဂးရ။
ဟိုတ်နူဗက်အာတ်ကေတ်မံၚ် တၞးဆာဲစရင်ကၟိန်အိန်ထံၚ်တံတုဲ သွက်ကောန်ဇာတ်သ္ၚိဌာန် ရဲလုပ်မံၚ်အဝေါင် အာယုက် ယိုက်ဝန်ပၞာန်တံဂှ် ဒှ်မံၚ်ဒဝိၚ်ရောၚ် ဂွံတီကေတ်ရ။
ဟိုတ်နူ ပရေၚ်ဗက်အာတ်ကေတ်မံၚ် စရၚ်ကၟိန်အိန်ထံၚ်သာ်ဏံဂှ်ရ ဒှ်ဒဝိၚ်တုဲ ၜေတ်မၞိဟ်တုဲဒရာန်ကေတ်ဂှ် ဟွံကၠောန်၊ ရာန်ကေတ်အာပ္ဍဲဆေၚ်ဖျာမ္ၚးတံရောၚ် ရဲဍုၚ်ပံၚ်မွဲတၠလေဝ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကၠေၚ်သတ်ဗြဴ အလဵုအသဳပြံၚ်လဝ်ဗီုပြၚ် ပါ်ပရအ်သွံကဵုမံၚ်တံဂှ် ညးသြန်နွံတံ ဗက်အာၜေတ်ရာန်ကေတ်မံၚ်ဟၟဲတုဲ ရဲကၟိန်အိန်ထံၚ်ကၠောန်အာစအာတံဟေၚ် ရာန်ကေတ်မံၚ်အိုတ်ရ။
ပရေၚ်ပါ်ပရအ်သွံကဵုမံၚ် ကၠေၚ်သတ်ဗြဴသာ်ဏံဂှ်လေဝ် အပ္ဍဲအကြာအရာပ်တံမ္ဂး မွဲဂိတု ကၠုၚ်သွံကဵုဆၜိုတ်မွဲဝါနွံတုဲ ယဝ်ရကၠုၚ်သွံကဵုမွဲအလန်မ္ဂး မွဲကၟိန်အိန်ထံၚ်ဂှ် ရာန်ဂွံဆၜိုတ်မွဲပသာဓဝ်ရောၚ် ဂွံတီရ။
အလဵုအသဳဒပ်ပၞာန်ဂှ် ဖျေံၚုဟ်မးတုဲ သွံကဵုမံၚ်ကၠေၚ်သတ်ဗြဴကဵု တၠကမၠောန်တံကီုလေဝ် ပ္ဍဲကဵုဆေၚ်ဖျာံတံမ္ဂး မွဲပသာတှ်ေ အောန်အိုတ် ၁၅၀၀၀ ဒကေဝ် နွံမံၚ်တုဲ၊ ၚုဟ်မးဗက်သွံ ပ္ဍဲအကြာအရာပ်တံဂှ် မွဲပသာမ္ဂး ဒးကဵု ၈၀၀၀ ဒကေဝ်ပြၚ်ဓဝ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media