နေပျဳဒဝ်၊ ဂျူလာၚ် ၁၅
အပ္ဍဲကဵုပေါဲရုဲမာဲဂတတေံမ္ဂး သွက်ဂွံသၠုၚ်ပတိုန်အစောံစရာဲဍာ်ဒကေဝ်တုဲ အလံၚ်အမာတ်ညးဂွံလဝ် တဆိပ်ကြာတုဲတုဲမှ ညံၚ်ဂွံလုပ်ပြိုၚ် ပ္ဍဲစၠတ်ထဝ်ဆေၚ်စပ်တံမာန်ဂှ် နူစၠတ်ထဝ်ကၟိန်ဍုၚ်အလဵုအသဳပၞာန် ပတိတ်ကၠုၚ်ဥပဒေအပြောံရ။
ဆေၚ်စပ်ကဵုဥပဒေ စၠတ်ထဝ်ညးဍုၚ်ကွာန်၊ စၠတ်ထဝ်ကောန်ဂကူ ကေုာံ စၠတ်ထဝ်ရး/ တွဵုရးတံ ဥပဒေအပြောံပလေဝ်လဝ် အလန်သတ္တမ သွက်ညးဍုၚ်ကွာန်တံဂွံတီလ္ၚတ် ကဵုအာကသပ်မာန်ဂှ် ပ္ဍဲကဵုလိက်ပရိုၚ်တြးဝါဒကၟိန်ဍုၚ် ကဵုသမ္တီထမံက်ပတိတ်လဝ် ပ္ဍဲဂျူလာၚ် ၁၄ ဂှ်ရ။
အပ္ဍဲဥပဒေအပြောံဂှ်မ္ဂး ညးဂွံလဝ်တဆိပ်ကြာတုဲဒှ် နူကဵုတက္ကသိုလ်၊ ကဝ်လိက်ဒဳဂရဳ၊ ကဝ်လိက်မွဲမွဲ နကဵုကၟိန်ဍုၚ်စၟတ်သမ္တီလဝ်တံရောၚ် အပ္ဍဲကဵုအစောံစရာဲဍာ်ဒကေဝ် ညးနွံအခေါၚ်ဒုၚ်ရုဲစှ်မာဲ စၠတ်ထဝ်ဆေၚ်စပ်တံဂှ် ခုတ်စုတ်လဝ် မဒှ်ရ။
ပရေၚ်ဏံမ္ဂး ပ္ဍဲလက်ထက်ကံၚ်သဳပၞာန်တေံ ပ္ဍဲကဵုဥပဒေစၠတ်ထဝ်သီုပိတန် ချူခၞံလဝ် နူကဆံၚ်အံၚ်လဝ်ပညာသ္ဇိုၚ်တုဲ လၟုဟ်ဂှ် ထပက်လဝ်အဇာ နကဵုညးကလိဂွံလဝ်တဆိပ်ကြာတုဲတုဲဂှ်ရ ယဝ်ရသ္ပအာဒတန်ဥပဒေအပြောံဏံမ္ဂး ပ္ဍဲကဵုပေါဲရုဲမာဲ ဂတဂတတေံ ဂှ် ဆညးဂွံတဆိပ်ကြာတံဟေၚ် နဒဒှ်အလံၚ်အမာတ်ဂွံအခေါၚ်လုပ်ပြိုၚ်မာဲ ဒှ်သဘဴဗီုပြၚ်ဏံရောၚ်။
မွဲလပါ်ပၠန် ကြဴနူဒးဒုၚ်ရုဲစှ်ခါန်ကၞက်တုဲ အတိုၚ်စၟတ်ပိုၚ်ခြာလဝ်ဏံ ဟိုတ်နူပရေၚ်ဆုတ်ယောၚ် ပတိုန်စရၚ်သြန်အိုတ်၊ ပေါဲရုဲမာဲ နူရုၚ်ခုၚ်ပေါဲရုဲမာဲ ယဝ်ရကဵုသ္ဂုတ်သွာတ်ပရေၚ်ဍာ်ဒကေဝ်လီုလာ်မ္ဂး နကဵုညးစၞးစၠတ်ထဝ်အခေါၚ်ဒတူဒလိုၚ် ဟွံဂွံပုဟ်ဂှ် ထပ်ဗပေၚ်စုတ်လဝ်ကီုရ။
တုဲပၠန် ညးစၞးစၠတ်ထဝ်မွဲမွဲတၠ ဒးဒုၚ်ရုဲစှ်လဝ်တုဲ ဗော်ဇကုသ္ပလဝ်စၞးဂှ် ယဝ်ရဒးဒုၚ်ပလီုထောံမ္ဂး ဒဒှ်ရ နူကဵုညးစၞးဒုၚ်ရုဲစှ်လဝ်စၠတ်ထဝ်ဂှ် အလဵုအလဵုလီုအာ ဒးစၟတ်သမ္တီလဝ်ရောၚ် သ္ဂးရ။
ယဝ်ရ ဗော်သ္ပစၞးဇကုလီုအာဒှ်ဒှ် လုပ်စရၚ်ဒးဒုၚ်ပလီုထောံဒှ်ဒှ် နကဵုညးစၞးစၠတ်ထဝ်ဗော်တၞဟ်မွဲမွဲ သွက်ဂွံဂွံအခေါၚ်ဒတူဒလိုၚ်မ္ဂး နကဵုသက်သဳ ဒဒှ်ရ ဒှ်ကောန်ဗော်ဆေၚ်စပ်တေံတုဲ စနူတ္ၚဲဗော်လီုအာ အပ္ဍဲပွိုၚ် ၆၀ တ္ၚဲ ဒးပတိုန်လိက်ဂမြၚ်ပတီ ကုကဝ်မယှေန်ရောၚ်။
ယဝ်ရဟွံပတိုန်လိက်ဂမြၚ်ပ္တီ အာတ်မိက်သာ်ဂှ်မ္ဂး နူကဵုညးစၞးစၠတ်ထဝ် ဒးဒုၚ်ရုဲစှ်လဝ်ဂှ် လီုအာအလဵုအလဵုရောၚ် ဒးစၟတ်သမ္တီတုဲ နဒဒှ်တၚ်တၟေၚ်မွဲ ယဝ်ရဆန္ဒမိက်ဂွံဒတူဒလိုၚ် နဒဒှ်ညးစၞးစၠတ်ထဝ် တၠပူဂိုလ်မွဲမ္ဂး ပတိုန်ထ္ၜးကု ကဝ်မယှေန်မာန်ရောၚ် ပ္ဍဲလက္ကရဴၝောံပိုဒ် ၁၁ ဥပဒေစၠတ်ထဝ်ညးဍုၚ်ကွာန်ဂှ် ထပ်တောဲဗပေၚ်ထမံက်လဝ် နဒဒှ်ၝောံပိုဒ် ၁၁-က ရ။
စပ်ကဵုၝောံပိုဒ်တံဏံတုဲ ပ္ဍဲဥပဒေအပြောံ စၠတ်ထဝ်ကောန်ဂကူကေုာံ စၠတ်ထဝ်ရး၊ စၠတ်ထဝ်တွဵုရး ပံၚ်ပစပ်လဝ်သၞောတ်သ္ပစၞးကဵု သၞောတ်ညးဂွံမာဲဂၠိုၚ်အိုတ်ဇၞးတံဂှ်မ္ဂး တၚ်ဟွံတုပ်တၞဟ်ခြာလ္ၚဵုတံ နွံမံၚ်ကီုရ။
ဗော်ဇကုသ္ပလဝ်စၞး ယဝ်ရလီုအာဒှ်ဒှ် ဒးဒုၚ်ပလီုထောံဒှ်ဒှ် ယဝ်ရ ဒှ်ညးစၞးစၠတ်ထဝ် သၞောတ်သ္ပစၞးနူဗွိုၚ်ဆန္ဒမာဲမ္ဂး နူကဵုဒးဒုၚ်ရုဲစှ်လဝ်ဂှ် အလဵုလဵုလီုအာရောၚ် သာ်ဝွံ ချူခၞံသ္ပလဝ်ဒတန်ရ။
စပ်ကဵုလိက်တၞးပတိုန်စရၚ်ယၟုတုဲ အတိုၚ်စၟတ်ပိုၚ်ခြာလဝ် အခေါၚ်ရုပ်ကၠေံမာန် နွံတုဲ၊ ကြဴနူလလောၚ်တြးစရၚ်ယၟု အလံၚ်အမာတ်တုဲလေဝ် အခေါၚ်နုက်တိတ်မာန်နွံရောၚ် သာ်ဝွံ အပ္ဍဲဥပဒေအပြောံ စၠတ်ထဝ်သီုကဵုပိတန်တံဂှ် ထ္ၜုတ်စုတ်လဝ်ရောၚ် ဂွံဆဵုကေတ်ရ။
မွဲလပါ်ပၠန် ညးစၞးစၠတ်ထဝ် လီုအာနူကဵုညးစၞး၊ ညးစၞးစၠတ်ထဝ်၊ အလံၚ်အမာတ်၊ ညးစၞးပေါဲရုဲမာဲ၊ ညးဒးဒုၚ်လလောၚ်တြးလဝ် ပရေၚ်ဍာ်ဒကေဝ်လီုလာ်ကေုာံ ညးစၞးစၠတ်ထဝ်ဗၠးတိတ်နူထံၚ်တံဂှ် အပ္ဍဲအာယုက်စၠတ်ထဝ် အတိုၚ်သွဟ်ပေါဲရုဲမာဲကၠောန်လဝ်တုဲတုဲတေံဂှ် အခေါၚ်ပြိုၚ်ပကာန်အလံၚ်အမာတ် ပ္ဍဲကဵုစၠတ်ထဝ်ဆေၚ်စပ်တံ ဟွံဂွံရောၚ် ချူထမံက်လဝ်ရ။
တုဲပၠန် အပ္ဍဲပရေၚ် ပေါဲတံၚ်ဂြဲဆဝ်မ္ၚုဟ်မာဲလေဝ်စၞးဒၞာဲ ဗော်ပရေၚ်ဍုၚ်ကွာန်လုပ်ပြိုၚ်မာဲတံဂှ် ထပက်ထောံအဇာ နကဵု ညးပါလုပ်ဂကောံ ကမ္မတဳရေၚ်တၠုၚ်ကေၚ်ကာဗဟဵု နူကဵုဗော်ပရေၚ်ဍုၚ်ကွာန်တံကီု၊ အပ္ဍဲတ္ၚဲကၠောန်ပေါဲရုဲမာဲမ္ဂး ရုၚ်မာဲဂှ် ဒးစပံက် နူစအခိၚ်ဂယး ၇ နာဍဳ စဵုကဵုသဝ်တ္ၚဲ ၅ နာဍဳရောၚ် သာ်ဝွံ ပြံၚ်လှာဲလဝ်အခိၚ်ရ။
အပ္ဍဲဥပဒေအပြောံ ထပ်ဗပေၚ်စုတ်လဝ် အပ္ဍဲကဵုစၠတ်ထဝ်ကောန်ဂကူ ကေုာံ စၠတ်ထဝ်ရး၊ တွဵုရးတံဂှ် ဗော်ပရေၚ်ဍုၚ်ကွာန်မွဲမွဲ လီုအာနကဵုဆန္ဒဇကုဒှ်ဒှ် ဒးဒုၚ်ပလီုထောံဒှ်ဒှ် သွဟ်မာဲဗော်ဂွံလဝ်တုဲတံဂှ် ဒးပလီုထောံရောၚ် သ္ဂးရ။
ဟိုတ်နူဂှ်တုဲ သွဟ်လၟိဟ်မမာဲပလီုလဝ်တံဂှ် နုက်ပတိတ်ထောံတုဲ မာဲခိုၚ်ကၠိုက်သှ်ေမံၚ်တံဂှ် ညံၚ်ဂွံကလေၚ်တော်ကေတ် အတိုၚ်စၟတ်ပိုၚ်ခြာလဝ်တုဲ စရၚ်ယၟုညးစၞးစၠတ်ထဝ် ဒးဒုၚ်ရုဲစှ်ခါန်ကၞက်တံဂှ် ဒးလလောၚ်တြးအာရောၚ် သာ်ဝွံ စုတ်လဝ်မဒှ်ရ။
အပ္ဍဲသတ္တဟ တုဲကၠုၚ်တေံလေဝ် သွက်ညးမိက်ဂွံဒက်ပ္တန်ဗော်တံဂှ် ဒးနွံကဵုညးဍိုက်ပေၚ်ကဵုဍာ်ဒကေဝ် နွံအခေါၚ်ဒုၚ်ရုဲစှ် ညးစၞးစၠတ်ထဝ်ရောၚ်ဂှ် ထပ်ဗပေၚ်တုဲ ပ္ဍဲကဵုဥပဒေအပြောံ စၟတ်သမ္တီစရၚ် ဗော်ပရေၚ်ဍုၚ်ကွာန်ဂှ် ကဵုလဝ်သမ္တီတုဲ နူကဵုစၠတ်ထဝ် ချူခၞံသ္ပအာဒတန်ရောၚ်။
ပရိုၚ် – သြၚ်လောန်တိုၚ်မ်
Photo – MOI