ရေဝ်၊ ဂျူလာၚ် ၁၆
အပ္ဍဲတွဵုရးမန် ပွိုၚ်ဍုၚ်ရေဝ် ကွာန်အစေန် ဒပ်ပၞာန်သီအဝဵုရပ်ဏာလဝ်ညးဗြဴၜါတၠဂှ် ညးဗြဴမွဲတၠဓဝ်ရ ကလေၚ်ဗၠးကၠုၚ်လဝ်တုဲ သှ်ေမံၚ်မွဲတၠဂှ်ဆက်ရပ်ထိၚ်လဝ်ဖိုဟ်ရောၚ် ညးဍုၚ်ကွာန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နကဵုတၚ်စောဲစပ် ထံက်ပၚ်လဝ်ဒပ် PDF ဂးတုဲ ဒပ်ပၞာန်သီအဝဵုတံလုပ်ရပ်ဏာညးဗြဴၜါတၠ မံၚ်ဒၟံၚ်ကွာန်အစေန် နူကဵုသ္ၚိဌာန်ညးတံ တုဲကၠုၚ်ဂိတုဂျူလာၚ် ၁၀ အခိၚ်ဗ္တံၜိုတ် ၈ နာဍဳဂှ် ရောၚ်။
ညးဗြဴတံဂှ်တှ်ေ ညးကၠောန်သွံစကွာၚ် ပ္ဍဲကွာန်အစေန် အာယုက် ၅၀ ပြၚ် ဒဝ်မိထိုဲ ကေုာံ ညးဗြဴသွံဆေၚ်ဂၠိက်ယာတ် (ယၟုဟွံတီ) နွံလဒေါဝ်ကွာန် အာယုက် ၄၀ ပြၚ် မွဲတၠတံ မဒှ်ရ။
ဒပ်ပၞာန်သီအဝဵုတံ စၟဳစၟတ်သၟာန်သၟုက်လဝ်ပွိုၚ် ၄ တ္ၚဲဂွံတုဲ ဂိတုဂျူလာၚ် ၁၄ ဂှ် ကလေၚ်ဗလးကဵု ဒဝ်မိထိုဲ ကီုလေဝ် ညးဗြဴသှ်ေမံၚ်မွဲတၠဂှ် ဆက်ရပ်ထိၚ်လဝ်ဖိုဟ်ရ။
လ္တူညးဗြဴ ဆက်ရပ်ထိၚ်လဝ်ဏံဂှ် သွက်ဂွံပံက်အမှုကေတ်အာအရေဝ် နကဵုဥပဒေဗတိုက်ပလီုပကီုပရာတ်ဂှ် ဖန်ဇန်မံၚ်ရောၚ် ဂွံတီကေတ် နူညးကြပ်ကဵုဗွိုၚ်ဒပ်ပၞာန်တံရ။
အပ္ဍဲကာလသီအဝဵုဏံ ပ္ဍဲပွိုၚ်ဍုၚ်ရေဝ် ဒပ်ပၞာန်ဗၟာတံ နကဵုတၚ်စောဲစပ်ဆေၚ်စပ်မံၚ်ကဵု PDF တံဂးတုဲ ရပ်မံၚ် ညးဍုၚ်ကွာန်တံ ဖျေံဒုဟ်ထံၚ်သၞာံဇမၠိၚ်နွံမံၚ်တုဲ ညးလ္ၚဵုတံဂှ်တှ်ေ ဒးထပက်သြန်ဗွဲမဂၠိုၚ် ကလေၚ်ဗလးကဵုလေဝ် နွံမံၚ်ရ။
ပရိုၚ် – သြၚ်လောန်တိုၚ်မ်
Photo – Social Media