မတ်မလီု၊ ဂျူလာၚ် ၁၆
အပ္ဍဲအလုံမွဲကၟိန်ဍုၚ် အကြာပွိုၚ် ၃ ဂိတုတုဲကၠုၚ်ဏံ နူကဵုဒပ်ပၞာန်သီအဝဵုတံ ဟိုတ်နူပန်ဗတိုက်လဝ်ကဵုပၞာန်ကျာတုဲ ညးဍုၚ်ကွာန် ၃၁၄ တၠ ချိုတ်အာလဝ်နွံမံၚ်ရောၚ် ဂကောံပရဝ်ဂျက်အေန်တာနိတ်ဗၟာ MIP ပတိတ်လလောၚ်တြးလဝ်ရ။
စနူဂိတုအေဗရာ စဵုကဵုဂိတုဂျောန် သၞာံ ၂၀၂၆ ဏံ ပ္ဍဲအလုံမွဲကၟိန်ဍုၚ်မ္ဂး ပရေၚ်ပန်ဗတိုက်ပၞာန်ကျာက္တဵုဒှ်လဝ် ဟွံအောန်နူကဵု ၅၂၀ ဝါနွံတုဲ၊ ဗွဲမဂၠိုၚ်တံဂှ်တှ်ေက္တဵုဒှ်လဝ် ပ္ဍဲကဵုဒေသဒးဒုၚ်ကုတ်ထပိုတ်လဝ် အေန်တာနိတ်တံရောၚ်။
အပ္ဍဲကဵုညးချိုတ်အာတံဂှ်တှ်ေ ညးဗြဴ ၅၈ တၠ၊ ကောန်ၚာ် ၄၁ တၠ ကေုာံ မၞိဟ်ဗျုဗျု ၁၅ တၠတံ ပါလုပ်မံၚ်တုဲ ပ္ဍဲကဵုဒေသ ဒးဒုၚ်ဇီုကပိုက်မံၚ်ကဵု အခက်အခုဲပရေၚ်ဆက်စၠောံတံဂှ် က္တဵုဒှ်လဝ်ဂၠိုၚ်အိုတ်ရောၚ် MIP သ္ဂးရ။
ဟိုတ်နူ ပရေၚ်ပန်ဗတိုက်ကဵုလဝ် ပၞာန်ကျာတံတုဲ စမြိုၚ်ဒၞာဲ ပရေၚ်ဘာသာ ၂၂ မ၊ ဘာဗတောန်လိက် ၁၇ မ၊ ရုၚ်ဂဥုဲ ၇ မ ကေုာံ ဗဒိုပ်ရဲပါဲဘဲပၞာန် ၅ ဒၞာဲပါလုပ်မံၚ်ရောၚ် ချူထမံက်ထ္ၜးလဝ်ရ။
မွဲလပါ်ပၠန် အကြာပွိုၚ် ၃ ဂိတုဏံ ပ္ဍဲတွဵုရးချေၚ် ပရေၚ်ဗတိုက်လဝ်ပၞာန်ကျာ ၁၂၂ ဝါ ဒှ်လဝ်ဂၠိုၚ်အိုတ်တုဲ၊ ပ္ဍဲရးသကိုၚ် ၁၀၁ ဝါ ကေုာံ တွဵုရးရခေၚ် ၉၈ ဝါတံနွံတုဲ က္တဵုဒှ်လဝ်ဂၠိုၚ်အိုတ်ရ။
ပရေၚ်ပန်ဗတိုက်လဝ်ကဵုပၞာန်ကျာ သီုဖအိုတ်တံက္တဵုဒှ်လဝ် ၆၂ က္ဍိုပ်ကၠံဂှ် ဒှ်မံၚ်ဒၞာဲပရေၚ်ပၞာန်အသိၚ်ကာတ်မံၚ် ပ္ဍဲကဵုဒေသပိဒၞာဲဏံတုဲ ဒပ်ပၞာန်တံဂစာန်မံၚ်သွက်ဂွံကလေၚ်သီကေတ် ဒၞာဲတိဍာ်တံဏံမာန်ဂှ် သုၚ်စောဲလဝ်ဇြဟတ်ဗလးကျာ လောန်ၜက်မံၚ်ကဵုသၞောတ်ဗ္ၜတ်ရောၚ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – AA