ဗြဝတဳ၊ ဂျူလာၚ် ၁၆
အပ္ဍဲတွဵုရးကရေၚ် ဒေသမေန်လက်ပါန်ကေုာံ ဖလူ လပါ်သၠုၚ်ကျာဍုၚ်ဗြဝတဳဂှ် အပ္ဍဲပွိုၚ်မွဲသတ္တဟဏံဂှ် ဒပ်ပၞာန်သီအဝဵု ကလေၚ်ထပက်လဝ်ကရောၚ်ပၞာန်တုဲ အပ္ဍဲကဵုဒေသပရေၚ်အုပ်ဓုပ် ဂကောံဇြဟတ်ပၠန်ဂတးတံ ထိၚ်ဒဝ်လဝ်မွဲဒၞာဲဂှ် ဒးဗလးဏာတဲယျရောၚ် ဂွံတီကေတ် နူရိုဟ်ကၞက်ပရိုၚ်အပ္ဍဲဒေသကဵု ရဲလဝ်ဗဳ တြးဝါဒဒပ်ပၞာန်တံရ။
သွက်ဂွံကလေၚ်သီကေတ် ဒေသမေန်လက်ပါန်ကေုာံ ဖလူ ဗ္ဒာဲဍုၚ်တၟိလေဝ်ကေကဝ်ဂှ် ဒပ်ပၞာန်သီအဝဵု၊ ဒပ်မၚ်ပယျဵုကရေၚ် BGF၊ ဒပ် DKBA ပါ်တိတ်တံပံၚ်တောဲတုဲ စနူအခိၚ်နူဂယး ဂိတုဂျူလာၚ် ၈ ဏံဂှ် ထပက်ပၞာန်ဗတိုက်ကၠုၚ် ဂကောံဇြဟတ်ပၠန်ဂတး KNLA တံ သ္ကိုပ်သ္ကလဝ်ဂှ်ရောၚ်။
ကရောၚ်ပၞာန်ဒပ်ပံၚ်တောဲဒပ်ပၞာန်သီအဝဵုတံ သုၚ်စောဲဇြဟတ်မၞိဟ်ကဵုလ္ၚီတုဲ နကဵုကရောၚ်ပၞာန် ၅ ကရောၚ် နူကဵုဒၞာဲဒိုဟ်နာနာတံဂှ် ထပက်လုပ်ကၠုၚ်မံၚ်ဒေသမေန်လက်ပါန်ကဵုဖလူတံတုဲ နူဂိတုဂျူလာၚ် ၈ စဵုကဵု ၁၅ ဂှ် ပေါဲဗတိုက် က္တဵုဒှ်မံၚ်ဇၞော်ကဵုဇြဟတ်ရောၚ်။
နူကဵုဒပ်ပၞာန်ဗမာကေတ်အရီုဗၚ် သုၚ်စောဲလွဟ်ဇၞော် သီုကဵုအရီုဗၚ်ဗလးကျာဇၞော်ကဵုဇြဟတ်တုဲ နူလပါ်ဗလးတိလေဝ် နကဵုဇြဟတ်ဍိုက်ဗတိုက်ပေၚ်ၚ် ထပက်လုပ်ကၠုၚ်တုဲ၊ ဒၞာဲကုန်ဒဵု ဇြဟတ်ပၠန်ဂတးတံ ထိၚ်ဒဝ်လဝ်မွဲဒၞာဲဂှ် ပ္ဍဲဗ္တံဂိတုဂျူလာၚ် ၁၃ ဂှ် ဒးကလေၚ်ဆုတ်ဗလးထောံတဲရောၚ် ရိုဟ်ကၞက်ပရိုၚ်ပ္ဍဲဒေသမွဲတၠ သ္ဂးရ။
ကုန်ဗၠာဲသၟိၚ်ကော်စလဝ် ကုန်ဒဵုဒပ်ပၞာန်သီဂွံလဝ်လၟုဟ်ဏံဂှ် နွံဒၟံၚ်လပါ်ပလိုတ်ဍုၚ်လေဝ်ကေကဝ်ကီု၊ နကဵုပရေၚ်ပၞာန်မ္ဂး ဒှ်ဒၞာဲကိစ္စဟွံဇၞော်ကီုလေဝ် သွက်ဒပ်ပၞာန်မ္ဂး ဂွံအာဒၞာဲဖျေံသ္ဇိုၚ်မွဲမွဲ သွက်ဂွံဗတန်စွံအာဗဒိုပ်ရောၚ် ရိုဟ်ကၞက်ပရိုၚ်ဂှ် ဟီုရ။
ကုန်ဗၠာဲသၟိၚ် ဂကောံဇြဟတ်ပၠန်ဂတးတံထိၚ်ဂွံလဝ်ဂှ် ဒပ်ပၞာန်သီဂွံဏာတုဲ ဆက်ထပက်အာကရောၚ်ပၞာန် ဗက်ဗတိုက်မံၚ် ဂကောံဇြဟတ်ပၠန်ဂတးတံရောၚ် ရဲထံက်ဂလာန်ဒပ်ပၞာန်တံလေဝ် ချူထမံက်မံၚ် ပ္ဍဲကဵုဇာဖိုၚ်မှာဇန်တံရ။
ပ္ဍဲကဵုပေါဲဗတိုက် ဒေသမေန်လက်ပါန်ကဵု ဖလူ ဗ္ဒာဲပယျဵုသေံ-ဗၟာ ပေါဲဗတိုက်က္တဵုဒှ်မံၚ် ၁ သတ္တဟပြၚ်ဏံဂှ်၊ လပါ်ဒပ်ပံၚ်တောဲဒပ်ပၞာန်ဗမာတံ ၜိုန်ရဒးဝပ်ချိုတ်မံၚ်ဂၠိုၚ်ကီုလေဝ် ထပ်ဗပေၚ်မံၚ်ဇြဟတ်မာန်တုဲ ပရေၚ်ပေါဲဗတိုက်တံဏံဆက်ဒှ်အာ ဇၞော်ကဵုဇြဟတ်ပၠန်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media