ဗြဝတဳ၊ ဂျူလာၚ် ၁၈
အပ္ဍဲကဵုပေါဲဗတိုက် လပါ်သၠုၚ်ကျာဍုၚ်ဗြဝတဳ တိဍာ် KNU မဟာဒပ် ၆ ဂှ် ကရောၚ်ပၞာန်ဒပ်ပၞာန်သီအဝဵု သီုမွဲကရောၚ်သရိုဟ်လီုအာတုဲ ဂကောံဇြဟတ်ပၠန်ဂတးတံရပ်သီဂွံဏာ ကောန်ပၞာန်တံကဵုလွဟ်မကမ်တံရဂှ် ဂွံတီကေတ်ရ။
အပ္ဍဲတွဵုရးကရေၚ် လပါ်ပလိုတ်ဇၞောဝ်ဒဵုဍုၚ်လေဝ်ကေကဝ် ဒၞာဲဗ္ဒိုပ်ကုန်ဗၠာဲသၟိၚ် ဂကောံဇြဟတ်ပၠန်ဂတးထိၚ်လဝ်ဂှ် အခိၚ်ဗ္တံ ဂိတုဂျူလာၚ် ၁၃ တေံ ဒပ်ကဝ်မယှေန်ပၞာန်တံ သီကေတ်ဂွံဏာတုဲ ဂိတုဂျူလာၚ် ၁၆ ဂှ်ပၠန် အပ္ဍဲကဵုဒၞာဲဗ္ဒိုပ်ကုန်ဗၠာဲသၟိၚ် ဒပ်ပၞာန်သီလဝ်ဏံဂှ် ဂကောံဇြဟတ်ပၠန်ဂတးတံ ကလေၚ်ဗိုၚ်ဂေတ်ဗတိုက်မံၚ်ရ။
အပ္ဍဲဂိတုဂျူလာၚ် ၁၆ ဂှ်တှ်ေ ပေါဲဗတိုက်အကြာဒပ်ပၞာန်ကဵု ဂကောံဇြဟတ်ပၠန်ဂတးတံၜါလပါ် ဒှ်လဝ်ဇၞော်ကဵုဇြဟတ်တုဲ နူဒပ်ပၞာန်လေဝ်ကြဳဖျေံဗုမ်ပန်ဗတိုက်လဝ် နကဵုၜၚ်ကျာနွံရ။ ဆဂး ကရောၚ်ပၞာန်သၟဝ်တဲ စကခ ၁၃ တမ်ဒပ် ခမရ ၅၅၆၊ မွဲကရောၚ်ပၞာန် လီုလာ်အာလဝ်ရဂှ် ရိုဟ်ကၞက်ပရိုၚ်ပၠန်ဂတးတံ သ္ဂးလဝ်ရ။
အပ္ဍဲကဵုပရေၚ်လဝေၚ်ပၞာန် ဒေသဖလူ၊ မေန်လက်ပါန် လပါ်သၠုၚ်ကျာဍုၚ်ဗြဝတဳတံမ္ဂး နူကဵုတမ်ဒပ် သၟဝ်တဲၝောံဒပ်ဌာန်ဂအုပ် ၂၂ ဖျေံသ္ဇိုၚ် ဍုၚ်ဘာအၚ် တွဵုရးကရေၚ်၊ တမ်ဒပ်သၟဝ်တဲ ဌာနသ္ကိုပ်က္ဍိုက်ပ် လဝေၚ်ပၞာန် ၁၃ ဖျေံသ္ဇိုၚ် ဍုၚ်ဗုက်ပျေၚ် ရးတနၚ်္သဳ ကေုာံ ဒပ် BGF၊ ဒပ် DKBA ပါ်တိတ်တံလုပ်ထပက်ပၞာန်တုဲ ဗတိုက်မံၚ်ဖိုဟ်ရောၚ်။
အပ္ဍဲပေါဲဗတိုက် ရပ်ဂွံလဝ်ကောန်ပၞာန်ဗမာဂျိုၚ်ၚ် သီုကဵုလွဟ်မကမ်တံကီု ဟိုတ်နူဂကောံဒပ်ပၠန်ဂတးတံပန်ဗတိုက်ဂှ်ရ ကောန်ပၞာန်ဗမာတံဒးဝပ်ချိုတ်အာလဝ် ဗွဲမဂၠိုၚ်နွံမံၚ်အရိုဟ်ဟ်တ္ၚဲ ရောၚ် နူဂကောံဒပ်ပၠန်ဂတး ကရောၚ်ပၞာန်ကၠမပၞဟ်သာန် လလောၚ်တြးလဝ် ပ္ဍဲဂျူလာၚ် ၁၇ ဂှ်ရ။
အပ္ဍဲပေါဲဗတိုက်ဂှ်မ္ဂး ရဲဒးဒုၚ်ဓရတ်လဝ် ပရေၚ်ယိုက်ဝန်ပၞာန်တံ၊ ရဲဒးဒုၚ်တံၚ်လဝ်ပဝ်တာ ဟၟဲကဵုပရေၚ်ဓဝ်ဍာံတံဂှ် ဒပ်ပၞာန်သီအဝဵု သုၚ်စောဲစကာလဝ်တုဲ နူကဵုဒပ်ပၠန်ဂတးတံလေဝ် ညံၚ်ဇြဟတ်ကောန်ပၞာန်ဗမာ ထပက်ပၞာန်ဗတိုက်ကၠုၚ်မံၚ် ဇၟာပ်ပ်တ္ၚဲတံဂွံယအ်စှ်ေအာဂှ် ဆက်တဝ်စၞေဟ်ဗတိုက်မံၚ်ဇၞော်ကဵုဇြဟတ်ရောၚ် ကရောၚ်ပၞာန်ကၠမပၞဟ်သာန် ကဵုသမ္တီလလောၚ်တြးလဝ်ရ။
ဒပ်ပၞာန်သုၚ်စောဲလဝ်ဇြဟတ်ပၞာန် လောန်ၜက်အာနူသၞောတ်တုဲ ထပက်ပၞာန်ဗတိုက်မံၚ် လပါ်ဒေသဖလူ၊ မေန်လက်ပါန်တံဂှ် နကဵုဇြဟတ်ပၞာန်ဂၠိုၚ်ၚ်သီုကဵုပၞာန်ကျာ၊ ဒရုၚ်ဒုၚ်ဂစိုတ်ဇကု၊ လွဟ်ဇၞော်တံတုဲ ပန်သၠေက်ဗတိုက်မံၚ် ဂကောံဒပ်ပၠန်ဂတးတံဂှ်ကီု ပ္ဍဲအကြာစမြိုၚ်သ္ၚိဌာန်ဒၞာဲဝါဲ ညးဍုၚ်ကွာန်တံဂှ်လေဝ် စွံပွန်တုဲ ကြဳဖျေံဗုမ် ပလီုပလာ်ဗတိုက်မံၚ်ကီုရောၚ် လလောၚ်တြးလဝ်ရ။
ဂိတုဂျူလာၚ် ၁၇ တေံလေဝ် ပ္ဍဲကဵုဇၞောဝ်ဒဵုဖလူဂှ် နူလပါ်ဒပ်ပၞာန် ဆက်ကြဳဖျေံဗုမ်ဗတိုက်မံၚ် ဇၞော်ကဵုဇြဟတ်ကီုရောၚ် အတိုၚ်ပရိုၚ် ကၠုၚ်နူရိုဟ်ကၞက် အပ္ဍဲဒေသတံဂှ် ဂွံတီရ။
ပရိုၚ် – သြၚ်လောန်တိုၚ်မ်
Photo – PDF